1 Timoti 2:1 - Telefol

^1-2 Kale intap sang o agomap kale, mufekmufek afaligen umi sang uta bogopkelan-temi kale, tinangku-salapta. Kristen unang tinum ibaa. Ibo God iyo aman duga-e-bom-nilip e, alugum unang tinum iyo beten ke-e-bom-nilip e, bilip imi aget uyo fugun-bom God iyo, “Misam o,” agan-bom-nilip e minte, alugum king so gavman so yak kamok migik migik so iyo beten ke-e-bilipta, God iyo dong daga-e-balata, tambaliim tiin molipta, alugum nuyo aget iluum binim, waasi binim, tambaliim kup ton-bom-nulupta, God ita kup o age-nulupta, imi kuguup tambal uta kup waafuu kwep tebe-bom-bulupta o ageta kale,

1 Timoti 2:1 Iomraidhean Croise

Aposel 17:30

Kale siin uyo tinum bilip iyo God iyo tele atamin-tem ke-nilipta, kanumin kanumin kuguup mafak uyo waafulip kalaa age-nalata, God iyo tiin kup itam kupkasa kuta, beyo alugum kafin kaa kutufosu komi unang tinum imi tele itama-bom im-kuguman-tema umi am ko age de uyo kwep daasa kale, kamaa kagal alugum abiip maak maak umi unang tinum imi bogobe-nala e, ‘Ipmi kuguup mafak uyo kupkaa ipmi aget uyo fupkela kolin o,’ agan-be kale, God iyo tinum maak ulaa du-nala e, bogobe-nala e, ‘Kabo tebe nimi baan diim uksu-nalapta, tele itama-bom im-kuguman-temap o,’ age-nala e minte, alugum bilip iyo utamta, boyo tuluun aafentap kalaa agelin o age-nalata, bemi angkolip kaan-se uyo, God yagal tebe dufolata, fen tigi mo-se o,” age Fol iyo baga-ema ko.

Fol tebe Rom kutam imi suuk kon dola kobesa uta ko 1:8

Kale nimi kamaki komi sang usiik ipmi baga-eman-temi uyo kulbu kale, ipmi Krais imi ilak fomtuup dugamin umi sang uyo bogo kwep una tala kem tebesip kale, niyo alugum ipmi aget uta fugun-bomta Yesus Krais imi win tolop diim God iyo, “Misam o,” agan tebesi kale,

Fol tebe Rom kutam imi suuk kon dola kobesa uta ko 6:17

Kale siin bole fengmin uyo tebe ibo sok de imolin kelu umi ogok uyo bisop waafu-bii-silip kuta, kamaa kota God iyo ilami weng uyo kwaala yak ipmi diim uyo abelu atin waafu-silip kale, boyo ipso niso nugol God iyo, “Misam o,” agan-bom-nulupta o ageta kale,

1 Korin 15:3

Kale nimi weng siin ku-sii boyo atin ki kwiin kiim kale, ko ipmi kobe-sii kale, boyo sugami God imi suuk kon tem umi bogosu uyo ki, Yesus Krais imi kaan-nala numi fengmin takan kebe-se umi sang uta bogo-nulu e minte,

2 Korin 8:6

Utamupta, Masedonia kasel iyo mani kupka-e-bilip kalaa age-nulupta, Korin kasel ipmi aget uyo asok fugun-nak-bulup kale, siin uyo Tatias iyo tebe mani afetamin ogok boyo no ipmi diim uyo kufo afeta-bii kupkaa talba kalaa age-nulupta, nuyo fomtuup bogobe-nulup ki, “Kabo asok no mani afetamin ogok boyo binimanu kupkalapta o,” agebup ko.

Efesis 3:13

Atin nugumal ibaa. Waasi iyo tebe-nilipta, niyo ipmi dong daga-em tebesi umi kalan o age kaal fuyap uyo kupkane-bilip kuta, ibo nimi kaal fuyap bomi aget uyo fugun-bom aget iluum kugamin ba kale, nimi kaa dong daga-e-bili ipmi titil fagagan-bilip komi aget uta kup fugun-bom deng tebe-bom-nilipta o ageta ko.

Efesis 5:20

Kale ibo, “Nuyo Kamogim Yesus Krais imi unang tinum kesup o,” agan-bom suun kup mufekmufek alugum umi sang uyo Aatum God iyo baga-e-bom, “Misam o,” agan-bom no ke-bomta bom-bilipta o ageta ko.

Efesis 6:18

Ipmi God imi aman duga-eman-temip uyo, ilami Sinik iyo dong daga-e-balata, kanumin kanumin beten weng uyo ku suun kup aman duga-emin kup ke-bom-nilip e, kup-kagamin ba kale, daal binim abu binim tiin ak binim tiin alop ke tiginin kup ke-bom-nilipta, ibo God iyo aman duga-e-bilipta, yagal ilami unang tinum alugum iyo dong daga-e-bom-nala e minte,

Filipai 1:3

Kale suun kup niyo ipmi aget fugunoli uyo, beten ke-e-bom nimi God, “Suguul o,” agan-bomi kale,

Filipai 4:6

Ibo aget iluum ku aget afalik fugunin ba kale, alugum ipmi mufekmufek sang boyo God imi kobelipta o ageta kale, alugum ipmi beten keman-temip uyo ki, suun kup God iyo, “Suguul o,” agan-bom ipmi mufekmufek duumatanbip uyo dagaga-bom no kemin o ageta ko.

1 Tesalonaika 3:12

Kamogim iyo dagaga-bulupta, yagal dong dogobelata, ibo tebe ipmi ipkumal Kristen iyo aget kupka-e-bom-nilip e minte, unang tinum kek kek God imi ilak dolin binim bilip igil mungkup aget kupka-e-bom no ke-bom-nilipta, ipmi ipkumal aget kupka-emin kuguup uyo fomtuup titil fagalu te tam ninggil numi tebe fomtuup ipmi aget kupka-em-nuubup ulutap ke-nilipta, ipmi ipkumal sino kek kek sino iyo aget kupka-emin o age dagaga-bom no kem-nuubup ko.

2 Tesalonaika 1:3

Nugumal ibaa. Nuyo tinangkulupta e, ipmi God imi ilak dugamin uyo afaligen ke-bulu e minte, ipmi ipkumal Aatum God imi ilak dolin iyo fomtuup aget kupka-emin uyo mitam kwiin kiim ke-bom no kem talan-bo kalaa age-nulupta, nuyo God imi, “Suguul o,” agan-kalin uyo felepmuta, kupka-em tebesup ko.

1 Timoti 2:4

God beyo, “Alugum unang tinum iyo kulep meng nalami miit tem tolita, utamipta, God bemi kanu-be uyo kulba kalaa nagelin o,” agan-nuuba ko.

1 Timoti 5:5

Kale kanube unang kaluun umi dong daga-emin binim ugol ulusinon nu uyo, umi aget uyo kwaalu yak God imi diim abelu umdii, umi aget fugunin uyo, God ita dong dogopnelan-tema kalaa age-nuluta, suun kup mililep sino taap so uyo God iyo aman duga-eman-temu ko.

2 Timoti 2:24

Kamogim Yesus imi ogok kemin tinum kabo dinan-kalin ba kale, alugum unang tinum iyo kuguup tambal kupka-e-bom-nalap e, kafalemin kuguup uyo tambaliim kup waafu-bom-nalap e minte, olsak binim, alaang weng binim, bilili age-bom bet weng baga-e-bom no kemal o ageta kale,

Taitas 2:11

Kale God iyo unang tinum iyo alugum imdep meng nalami miit tem daalan o age-nalata, kuguup tambal uta kupka-em-nuuba kale,

Taitas 3:2

ipkumal imi tele baga-emin min, wengaal digin-bom waasi kebina tala ke-bom kemin ba kale ki, bal bal ke-bom-nilip e, suun kup dukmen biliit age-bom alugum ipkumal iyo alugum telele-bom no kemin o,” agan-bom-nalapta, baga-e-bom kemal o ageta ko.

Hibru 6:11

Kale numi aget fugunin uyo ki, alugum ibo kanube titil kup fagalin kup bom-nilipta, ipmi God imi ilak dugamin uyo fomtuup waafu-bom-nilip e, God imi imdulan-tema uyo fen-bom kanum kwep abe-bilipta, unanbu top ipmi binimanan-temip kwek diliit kelin o ageta ko.

Jems 5:16

Kale kanube ipkil ipmi fengmin uyo ipkumal imi diim uyo kupkem daabina tala ke-bom-nilip e, ipkumal iyo beten kebina tala ke-bilipta, God iyo dong dogopmata, tambalan waalanin o ageta ko. Tinum tol kup tebesa imi beten weng uyo daage no God imi tolong tem iinuta, tinangku dong dogopman-tema ko.