Yohanes 8:44 - Kaili Ledo

⁴⁴ Komiu nasimbayu ante tuamamiu, Magau nu Seta! Komiu batena madota mangoseaka dotana. Lako ri pamulaname ia bate-batena topepatesi. Ia ledo nosabingga ka anu nakana, sabana ledo ria nuapa-nuapa nakana riara ntaina. Masipato ia modava, apa ia topodava mami bo puna nu dava.

Yohanes 8:44 Iomraidhean Croise

Matius 12:34

Komiu tano tona nadaa mpuu eva ule! Ledo ntoto nipakulemiu notesa anu nabelo, sabana nadaa mpuu raramiu! Apa tesa nisovadakata aga nangoseaka anu naria riara ntaita.

Matius 13:15

Sabana tona gahaitu nakaa bagara, bo ira aga netibongo, bo matara nipiriramo. Ane ledo nipoviara ivehaitu rakita nu matara anu najadi, raepe ntalingara bo rasanira batuana, rapahara anu nakana bo manjili nte Yaku, ala Kupakabelo ira.’ ” Yesaya 6:9-10

Matius 13:38

Dunia nirapaka talua haitu. Tona anu najadi todea riara Poparenta nu Alatala nirapaka savua tobelona. Bo topangoseaka Magau nu Seta nirapaka jono.

Yohanes 6:70

Nesana i Yesus, “Yaku mbotomo nompelisi komiu sapulu randua tutu. Tapi naupa ivesia, naria saito komiu nipopale nu Magau Seta!”

Yohanes 7:17

Isema-sema madota mangoseaka dota nu Alatala, natantumo rasanina pepatudukiKu hitu lako nte Alatala, bo ledo lako nte Yaku mboto.

Yohanes 8:38

Anu nikitaKu nte TuamaKu, haitumo nitesaKu ka komiu. Tapi komiu aga novia anu nipatuduki ntuamamiu ka komiu.”

Yohanes 8:41

Pokainggumiu tu nanjava pokainggu ntuamamiu mboto!” Nesana vaimo ira, “Kami ledo ana vone! Tuama kami aga saito, haitumo Alatala.”

Yohanes 8:55

nau komiu ledo nosisani ante Ia. Tapi Yaku nosisani belo ante Ia. Ane rapana Kuuli Yaku ledo nosisani ante Ia, tantu Yaku majadi topodava nasimbayu mpo komiu. Tapi Yaku mpuu-mpuu nosisani ante Ia bo Yaku natutu nangoseaka tesaNa.

Suro-Suro 13:10

bo niulikana, “He, topebagiu nggaraka, ana nu Magau Seta! Ikomo nangeva pura-pura anu nabelo! Nakuya iko ledo nenonto nombatenggosi tesa nu Alatala nanoa?

Suro-Suro 24:9

ToYahudi ntanina ri sia nompangadu i Paulus muni, bo niulira tesa i Tertulus nakana mpuu.

Suro-Suro 5:3

Nanguli i Petrus ka ia, “Ananias, nakuya iko nompalamba Magau nu Seta nombakuasai raramu sampe nidavaimu Nosa Gasa nu Alatala? Iko nombaboliaka doimu sagaa ka iko mboto.

2 Korintus 11:3

Tapi nakini mpuumo raraku, nee-nee raakalani ntona komiu sampe komiu domo ante raramiu mpuu-mpuu mompotove i Kristus. Apa ivesia najadi nte i Hawa anu niakalani nu ule tempo nggaulu.

1 Petrus 5:8

Komiu kana mainga bo manoto rara, sabana balimiu, Magau nu Seta hau tumai nasimbayu mpo singa nongao-ngao nompengavu tona rasakana.

2 Petrus 2:4

Toramo! Alatala ledo nombakabasaka malaeka-malaekaNa mboto lako ri pehuku tempo ira novia dosa, tapi ninavusakaNa ira riara narakaa. Ira nisuaraka riara bolo nalanda bo nirante hamai mompopea tempona ira rahuku ri Eo Potangara bara maipia.

1 Yohanes 1:8

Ane raulita ledo ria dosata, kita nombabagiu karota mboto. Haitu tandana ledo ntoto nioseakata dota nu Alatala.

1 Yohanes 2:21

Yaku notulisi sura hitu ka komiu ledo sabana ledo nisanimiu pepatuduki nakana. Nisanimiumo pepatuduki nakana. Bo nisanimiu munimo ledo naria dava riara pepatuduki nakana.

1 Yohanes 2:4

Tona nanguli ia nosisani belo ante Alatala, tapi ledo nioseakana parenta-parenta nu Alatala, tona haitu topodava. Ledo ntoto nioseakana dota nu Alatala.

1 Yohanes 3:12

Nee kita mompasiala inggu i Kain nangoseaka dota Magau nu Seta bo nompatesi tueina mboto. Nuapa sabana i Kain nompatesi tueina mboto? Sabana pokainggu i Kain nadaa bo ia nasiriati nanggita pokainggu ntueina nanoa.

1 Yohanes 3:15

Isema-sema navuu matana nanggita sampesuvuna, ia haitumo nasimbayu ante topepatesi. Nisanimiumo, topepatesi ledo manggava katuvua nabelo sampe ri kasae-saena.

Yudas 1:6

Tora muni malaeka-malaeka nTupu nggaulu. Sanu ira ledo naosa rarara nte kuasa nipakatantu nu Alatala ka ira, sampe nipalaisira ponturora ri suruga. Ira nitarunggu nu Alatala ri ponturo nalanda mpirika bo nipou ante rante anu ledo namala rapudusi. Bo ira ledo rakabasaka sampe makava tempona ira rahuku ri Eo Potangara bara maipia.

Pompakita 12:9

Jadi ule naga haitu nipopalai lako ri suruga bo nitedaka hau ri dunia nosanggani-nggani ante malaeka-malaeka anu nantulungi ia. Ia haitumo Ule Ntua anu nosanga Topangadu atau Magau nu Seta, anu nombabagiu manusia ri njumangu dunia.

Pompakita 13:14

Nipoviana tanda-tanda haitu ante kuasa nidekei nu binata pamulana ka ia ala mombabagiu tona nonturo ri dunia. Nituduna ira movia bo mompopeangga sangu pinoito nambaso nolenje mpo binata pamulana, anu nitimbe pakaoga tapi ledo namate.

Pompakita 2:10

Tapi nee maeka komiu mantingayo kasusa bo kapari anu domo masae kana rarasaimiu. Pariaramo! Magau nu Seta mompopesua sanu komiu hau rantarunggu bo mompesori komiu ala moura pomparasayamiu. Komiu rapandasa sapulu eo kasaena. Tapi nee maupu raramiu momparasaya Yaku nau komiu rapatesi, sabana Kudekei ka komiu hadia padagi, haitumo komiu matuvu mabelo sampe ri kasae-saena.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”

Pompakita 22:15

Tapi tona nadaa, topedoti, tona nogau sala ante tona ledo bereina mboto, topepatesi, tona netupu nte tupu ntanina, topodava bo pura-pura tona nompokono dava, ponturora pura-pura aga ri savaliku ngata haitu.

Pompakita 9:11

Naria saito magau najadi pakenira, iamo malaeka anu nakuasa mombabuka vamba lovu anu ledo rapakule mantuvu kandalana haitu. Sangana riara basa Ibrani, i Abadon, bo riara basa Yunani i Apolion. Batuana, Toperopu.