Yohanes 10:3 - Kaili Ledo

³ Topojaga gimpu mombabuka bobaa ka ia, bo bimba-bimba haitu mombatalingai suarana ane rapokiona sangara sangu-sangu. Bo rakenina ira hau ri savalikuna.

Yohanes 10:3 Iomraidhean Croise

Yohanes 10:14

Yakumo hii topoevu nabelo. TuamaKu nisaniNa Yaku bo Yaku nisaniKu muni Ia. Ivesia muni nisaniKu pura-pura bimbaKu bo bimba-bimbaKu nisanira Yaku. Bo Yaku mamate ala bimba-bimbaKu mamala matuvu.

Yohanes 10:16

Da nariapa bimba-bimbaKu ntanina anu dopa nesua riara gimpu hitu. Ira muni kana Kukeni tumai. Ira mombatalingai suaraKu bo pura-pura bimbaKu majadi salunu rapoevu ntona saito.

Yohanes 10:4

Ane nesuvu ri savalikuna puramo bimba, topoevu molipa mokolu ka bimbana haitu. Bo bimba-bimba haitu mangoseaka purina, sabana nisanira suara ntopoevu.

Yohanes 10:9

Yakumo hii bobaa. Isema-sema mesua modala nte Yaku rapakasalama. Ia mamala mesua bo mesuvu manggava kandea.

Yohanes 6:37

Pura-pura tona nidekei nTuamaKu ka Yaku kana momparasaya Yaku, bo isema-sema momparasaya Yaku ledo ntoto Kupoara.

Yohanes 6:45

Riara buku nabi-nabi nitulisi ivei: ‘Pura-pura tona rapatuduki nu Alatala.’ Yesaya 54:13 Jadi isema-sema mompariara pepatuduki nTuamaKu bo meguru lako nte Ia, tantu raparasayana Yaku.

Roma 8:30

Bo kita anu nipakatantuNa lako ri lamba pamulana haitu, nipokioNa majadi todeaNa. Bo kita anu nipokioNa majadi todeaNa, nirekeNa nanoa ri panggitaNa. Bo kita anu nirekeNa nanoa, radekeiNa bagia ri kakuasaNa bo kaogeNa mboto.

1 Korintus 16:9

apa nadea loga ka yaku ri sii mokarajaa anu mamala manggeni belo ka todea, naupa nadea muni topangeva yaku ri sii.

Filipi 4:3

Bo kuperapi muni nte vega rapaku i Sunsugos, tulungimo mombine randua pangane ala ira mosangu rara mpanjili. Ira nokarajaa ntamo ante yaku nompatolele Kareba Belo nasimbayu mpo i Klemens bo roa-roaku ntanina sampokarajaa. Sangara nitulisi riara Buku Katuvua, anu nompakatantu isema masipato matuvu mabelo sampe ri kasae-saena.

Kolose 4:3

Posambayaka muni kami ala Alatala mombadekei loga nabelo ka kami mompatolele karebaNa anu notesaki niaNa anu nipakadupa i Kristus. NiaNa haitu da nitabuniaka bara ipia, tapi sii-sii nipatolelekumo kareba i Kristus haitu. Bo sii-sii yaku nitarunggu sabana pokarajaaku nompatolele kareba haitu.

2 Timotius 2:19

Tapi naupa ivesia, Tesa nu Alatala batena nakana bo namala raparasaya. Tesa nu Alatala naroso mpo pandasi nau ragoya ledo mogoya. Tesa nu Alatala haitu nitulisi ivei: “Nisani nTupu isema todeaNa.” Bo naria tesa ntanina nanguli, “Isema-sema nanguli ia topangoseaka Tupu, kana menonto mokainggu nadaa.”

1 Petrus 1:12

Bo Alatala nompakalanto ka ira anu nibotora haitu ledo nosinggambela ante ira mboto tapi nosinggambela ante komiu anu natuvu sii-sii. Kajadia-kajadia nibotora haitu, nipatolele ntopanggeni Kareba Belo ka komiu sii-sii. Nikenira kareba haitu ante petulungi Nosa Gasa nu Alatala, anu nipopanau lako ri suruga. Kakanana malaeka-malaeka nTupu mboto nadota mangisani batuana kajadia-kajadia pangane anu nipatolele ka komiu.

1 Yohanes 4:6

Tapi kita hitumo ana-ana nu Alatala, jadi isema-sema nosisani belo ante Alatala nompetalingai pepatudukita. Tapi isema-sema ledo nomparasaya i Yesus, ledo nipetalingaina pepatudukita. Jadi haitumo tandana ala rasanita isema nikeniaka Nosa Gasa lako nte Alatala anu nakana bo isema nikeniaka pekiri lako nte Magau nu Seta mpodava.

3 Yohanes 1:14

Nisarumakaku domo masae, yaku tou mosinggava nte iko bo mamala kita motesa ri mata.

Pompakita 3:20

Peintamo! Hitumo Yaku neangga nombatanede-nede ri vamba. Ane maria tona mangepe suaraKu bo mombabuka vamba, Yaku mesua nte ia bo mangande mosanggani-nggani ante ia.

Pompakita 7:17

Sabana, Ana Bimba anu naria ri sinjori Gadera Kamagaua nu Alatala haitu nompoevu ira. Ia nombanini ira hau ri mata uve anu nombadekei katuvua nabelo. Bo Alatala mboto nompaisi pura-pura uve mata lako ri matara mombaondopi ira.”