Roma 1:3 - Kaili Ledo

^3-4 Kareba Belo haitu notesaki Ana nu Alatala, haitumo Tuputa Yesus Kristus. I Yesus najadi manusia apa Ia nipoanaka lako ri muli Magau Daud. KagasaNa nasimbayu nte kagasa nu Alatala sabana Ia Ana nu Alatala mami. Nisanita Ia mpuu-mpuu Ana nu Alatala sabana Alatala nompakatuvu Ia mpanjili lako ri kamateNa ante kuasa nipokumaaka.

Roma 1:3 Iomraidhean Croise

Matius 1:1

Iveimo sunju nu muli ntotua i Yesus Kristus, muli Magau Daud, muli i Abraham:

Matius 1:16

i Yakub nomulika i Yusuf berei i Maria, bo i Maria noanaka i Yesus anu niuli i Kristus, haitumo Magau Topepakasalama anu nijanji nu Alatala.

Matius 1:6

i Isai nomulika Magau Daud, Magau Daud nomulika i Salomo (tinana timbala i Uria),

Matius 12:23

Nanggita kajadia haitu, nokumaa mpuumo todea hamai sampe nosimpekutana ira, “Bara tona hitumo Muli Magau Daud anu nijanji nu Alatala nggaulu!”

Matius 15:22

Naria saito mombine toKanaan, tona ledo toYahudi, nonturo ri bagia haitu. Ia nakava nte i Yesus bo nongare-ngare ivei: “Pue, Muli Magau Daud! Poasimo yaku hii! Anaku mombine nipesua seta sampe nandasa mpuumo ia!”

Matius 26:63

Tapi nau ledo nasala, i Yesus ledo notingo. Bo sangganipa Pakeni nanguli ka Ia, “Ulimo ri ngayo nu Alatala anu Natuvu, uli ka kami ane Iko mpuu-mpuu Magau Topepakasalama, Ana nu Alatala!”

Matius 27:43

Ia nanjarumaka Alatala bo niuliNa Iamo Ana nu Alatala! Jadi hitupa rapeintakata ane Alatala madota mompakasalama Ia!”

Matius 3:17

Bo naria suara lako ri suruga nanguli, “Hitumo AnaKu nipotoveKu. Iamo nompakadamba raraKu.”

Matius 9:27

Tempo i Yesus nompapola polipaNa, naria randua toburo nantuntuni Ia bo nongare-ngare, “Muli Magau Daud! Poasimo kami!”

Lukas 1:35

Nesana malaeka, “Nosa Gasa makava nte iko, bo kuasa nu Alatala toNeliu KaogeNa, maria nte iko. Haitumo sabana ngana mupoanaka rakasangai Nagasa, Ana nu Alatala.

Lukas 1:69

NidekeiNa ka kita saito Magau naroso anu mompakasalama kita. Magau haitu muli Magau Daud, anu natundu nte parenta nu Alatala nggaulu.

Yohanes 1:14

Ia anu niuli Tesa nu Alatala haitu najadi manusia bo nonturo ri tatanga kami ri dunia hitu. Bo nikita kami kuasaNa bo kaogeNa, haitumo kuasa bo kaoge nitarimaNa lako nte TuamaNa apa Ia AnaNa saito-itoNa. Iamo sampe nisanita mpuu Alatala bo toveNa ka kita.

Yohanes 1:34

Bo i Yohanes nompapola tesana, “Yaku mboto nanggita kajadia haitu bo nombasabiki: Iamo mai Ana nu Alatala!”

Yohanes 1:49

Nangepe tesa haitu nangulimo i Natanael, “Guru, Komiumo Ana nu Alatala! Komiu mpuu-mpuu magau ntoIsrael!”

Yohanes 10:30

Yaku bo TuamaKu ledo ria posisalana, aga saito.”

Yohanes 10:36

nemopa Yaku! Apa Yakumo hii nipelisi nu Alatala bo nituduNa tumai ri dunia! Jadi nakuya niulikamiu Yaku nompandaente Alatala sabana niuliKu Yakumo hii Ana nu Alatala?

Yohanes 20:28

Nanguli i Tomas ka i Yesus, “Tupuku! Alatala nisombaku!”

Yohanes 20:31

Tapi anu nitulisi riara buku hitu, patujuna ala manggeni komiu momparasaya i Yesus mpuu-mpuu Magau Topepakasalama, Ana nu Alatala. Bo patujuna muni ala komiu mamala manggava katuvua mabelo sampe ri kasae-saena sabana niparasayamiu Ia.

Yohanes 5:25

Pariaramo tesaKu hitu. Kana makava tempona bara maipia, bo sii-sii nakavamo tempona haitu, tona namatemo mangepe suaraKu, Ana nu Alatala, bo ira anu mangepena bo mangoseakana, manggava katuvua mabaru.

Yohanes 7:42

Apa riara Buku Gasa nitulisi Magau Topepakasalama meumba lako ri muli Magau Daud, bo makava lako ri ngata Betlehem ngata nipompoanaka Magau Daud.”

Suro-Suro 2:30

Alatala nojanji bo nipakarosoNa ante sumpa, kana maria saito lako ri muli i Daud mboto raanggataka majadi magau bara maipia. Nisani i Daud pojanji haitu bo ia muni nabi, jadi nisanina anu rapovia nu Alatala. Nibotona Magau Topepakasalama anu nijanji nu Alatala matuvu mpanjili lako ri kamateNa. I Daud nanguli: ‘Ia ledo rapalamba maboli ri ponturo ntomate, karobataNa ledo maboli riara dayo sampe mapopo majadi avu.’ Mazmur 16:10

Suro-Suro 3:13

Alatala anu nisomba ntotuata bo Nabi Abraham, i Ishak, bo i Yakub, Iamo nombabila bo nompakaoge BatuaNa i Yesus. I Yesus haitumo nidekeimiu ka pomarenta, bo Iamo nipoaramiu ri ngayo i Pilatus tempo i Pilatus madota mombakabasaka Ia.

Suro-Suro 8:36

Riara polipara haitu, nikitara uve napara dala. Nanguli toEtiopia, “Peintamo! Moitu uve. Mamala yaku radiu sii-sii?”

Suro-Suro 9:20

Tempo haitu muni, ia kaliu-liu hau ri banua-banua petupu ntoYahudi ri Damsyik nompatolele kareba i Yesus ka toYahudi. Ia nanguli, “Yesusmo Ana nu Alatala!”

Roma 1:9

Nisani nu Alatala yaku nasaro nosambaya ka komiu. Yaku batena ante rara mpuu-mpuu nombatui pokarajaa nidekei nu Alatala ka yaku, haitumo nompatolele Kareba nu AnaNa.

Roma 4:1

Jadi pekirimo i Abraham, totua ntoYahudi nggaulu. Berimba sampe ia najadi nanoa ri panggita nu Alatala?

Roma 9:3

Ane rapana mamala, aginapa yaku rapindasi nu Alatala bo rapopogaa lako nte i Kristus, asaa sampesuvuku toYahudi momparasaya.

Roma 9:5

Ira muli i Abraham, i Ishak bo i Yakub, totua toIsrael nggaulu anu nipelisi nu Alatala. Bo tempo i Kristus najadi manusia, Ia nipoanaka lako ri muli ntoIsrael. Iamo nombakuasai pura-pura. Iamo Alatala anu masipato ratoiya sampe ri kasae-saena. Amin!

1 Korintus 1:9

Alatala namala raparasaya mompakadupa pojanjiNa ka kita. Bo Iamo nompokio komiu majadi nosangu rara ante AnaNa Yesus Kristus, Tuputa.

1 Korintus 10:18

Pekiri munimo kabiasa ntoYahudi. Ira nasiromu nangande sabagia kandea nipesomba ka Alatala ri lanta pesomba. Isema-sema nangande kandea haitu, nireke ia muni nombasomba Alatala nosanggani-nggani nte topesomba. Ane ivesia, tantu isema-sema nangande kandea nipesomba ka tupu ntanina, nireke ia muni nombasomba tupu ntanina haitu.

Galatia 4:4

Tapi nakavapa tempo nipakatantu nu Alatala, nisuroNa AnaNa makava ri dunia. AnaNa haitu nipoanaka nu mombine, bo Ia natundu nte Atura-atura agama Yahudi.

1 Tesalonika 1:10

Nitesara muni berimba komiu nanjarumaka kakava i Yesus, Ana nu Alatala lako ri suruga. Ia nipakatuvu nu Alatala mpanjili lako ri kamateNa. Bo Iamo nombakabasaka kita lako ri pehuku nu Alatala anu rapambela ka tona nadosa bara maipia.

1 Timotius 2:5

haitumo, Alatala aga saito, bo aga saito muni topetariolo anu nompoposinggabelo Alatala bo manusia. Topetariolo, Iamo i Yesus Kristus.

1 Timotius 3:16

Nabelo mpuu pepatuduki nakana niparasayata, anu dopa nisani ntona nggaulu tapi sii-sii nipopaisani nu Alatala ka kita ivei: Ia najadi manusia bo Nosa Gasa nosabiki Ia mpuu-mpuu tona nipelisi nu Alatala. Ia nikita nu malaeka nu Alatala bo karebaNa nipatolele ka tona dopa nosisani nte Alatala. Ia niparasaya ntona ri umba-umba ri dunia bo Ia nianggataka hau ri suruga.

2 Timotius 2:8

Ane murasai kasusa, toramo i Yesus Kristus, muli Magau Daud. Ia namate bo natuvu mpanjili evamo anu nitesa riara Kareba Belo nipatoleleku.

1 Yohanes 1:3

Anu nikita kami bo anu niepe kami, haitu munimo rapatolele kami ka komiu ala komiu mosangu rara nte kami. Bo kita pura mamala matuvu mosangu rara ante Tuamata Alatala bo AnaNa i Yesus Kristus.

1 Yohanes 3:23

Hitumo niparentaNa ka kita: kita kana momparasaya AnaNa, i Yesus Kristus. Bo kita kana mosimpotove nangoseaka parenta i Kristus mboto ka kita.

1 Yohanes 3:8

Tapi isema-sema batena novia dosa, ia nangoseaka dota Magau nu Seta, sabana Magau nu Seta nadosa mami lako ri lamba pamulana. Patuju kakava Ana nu Alatala ri dunia ala mompakaropu povia Magau nu Seta.

1 Yohanes 4:15

Isema-sema nomparasaya i Yesusmo Ana nu Alatala, iamo natuvu nosangu rara ante Alatala, bo Alatala natuvu riara ntaina.

1 Yohanes 5:1

Isema-sema nomparasaya i Yesusmo Magau Topepakasalama anu nijanji nu Alatala, iamo nireke ana nu Alatala. Bo isema-sema nompotove Tuamata Alatala, natantu nipotovena muni roa-roana anu najadi ana-ana nu Alatala.

1 Yohanes 5:20

Nisanita muni i Yesus, Ana nu Alatala, nakava ri dunia hitu mompakanoto rarata ala kita mamala mosisani belo ante Alatala anu nakana. Kita natuvu nosangu rara nte Alatala anu nakana sabana kita natuvu nosangu rara nte AnaNa, i Yesus. Iamo Alatala anu nakana bo Iamo nombadekei katuvua nabelo sampe ri kasae-saena.

1 Yohanes 5:5

Isema nompakule nombadagi kuasa nadaa ri dunia hitu? Aga tona nomparasaya i Yesus Ana nu Alatala.

2 Yohanes 1:7

Nadeamo topebagiu neumba bo hau ri njumangu dunia. Ledo niparasayara i Yesus nakava ri dunia najadi manusia. Ira haitumo nombabagiu tona ntanina bo nangeva i Kristus.

Pompakita 2:18

Bo nitudu Ana nu Manusia vai yaku motulisi ka malaeka anu nanggeniaka todea topomparasaya ri ngata Tiatira ivei: “Hitumo tesa lako nte Yaku, Ana nu Alatala anu nomata narega mpo apu bo nokada nenggila mpo tambaga.