Matius 5:22 - Kaili Ledo

²² Tapi Kuuli ka komiu, isema-sema narau rarana nte sampesuvuna masipato ratangara. Bo isema-sema nanjalai sampesuvuna masipato raposintingayo ri Polibu Mbaso Agama. Tapi isema-sema manguli ka sampesuvuna, ‘Kanavumo ri narakaa iko!’ ia haitumo masipato ratedaka riara apu narakaa.

Matius 5:22 Iomraidhean Croise

Matius 10:17

Komiu kana mainga apa komiu rasaka ntona bo rakeni rapangadu ri ngayo ntopotangara. Bo komiu raboba riara banua-banua petupu.

Matius 10:28

Nee maeka nte tona madota mompatesi komiu. Ira mamala mompatesi karomiu tapi ledo ria kuasara mombanavusaka komiu ri narakaa. Aginapa komiu maeka nte Alatala sabana Iamo nakuasa mompatesi karomiu bo Ia muni nakuasa mombahuku komiu riara narakaa.

Matius 12:24

Tapi tempo toFarisi nangepe tesa ntodea haitu, nesana ira, “Bai! Kuasa ntona haitu lako nte i Beelzebul, Magau nu Seta. Haitu sampe Ia nakuasa nompopalai seta-seta.”

Matius 17:5

Da notesa i Petrus, nakavamo kulimu nareme nombabungu ira, bo lako riara kulimu haitu niepera suara nanguli, “Hitumo AnaKu nipotoveKu. Iamo nompakadamba raraKu. Pariaramo tesaNa”!

Matius 18:21

Naupu haitu nakava i Petrus nompekutana nte i Yesus, “Pue, ane maria sampesuvuku sampomparasaya ledo naupu-upu madaa nte yaku, sampe sako-nggani ntoto yaku kana mombaampungi ia? Bara sampe pitu-nggani?”

Matius 18:35

I Yesus nompakaupu porapaNa bo nanguli, “Ivesia muni TuamaKu ri suruga movia ka komiu ane ledo raampungimiu sampesuvumiu ante mpuu-mpuu raramiu!”

Matius 23:15

Mandasa mpuu komiu guru-guru agama bo toFarisi! Komiu aga nabelo ri lenje tapi nadaa riara! Nakadiki mpuu komiu mompatuduki tona ntanina mangoseaka pepatudukimiu. Komiu hau nevote tasi bo nolipa nakavao mangelo nau aga saito tona mesua agamamiu. Bo nesuapa ia, komiu nanggeni ia majadi rongganipa kadaana pade komiu mboto!

Matius 23:33

Komiu tona nadaa bo muli ntona nadaa! Nisarumakamiu komiu ledo rapambela pehuku riara narakaa?

Matius 25:41

Maupu haitu Kuuli ka ira ri sabingga njidiKu, ‘Palaimo lako nte Yaku, komiu anu nihuku nTuamaKu! Koi hau riara apu anu navaya sampe ri kasae-saena nipakasadia ka Magau nu Seta ante malaeka-malaeka anu nangoseaka ia.

Matius 26:59

Tempo haitu balengga-balengga ntopanggeni pesomba bo pura-pura topolibu ntanina ri Polibu Mbaso Agama Yahudi nompasimbuku mangelo tona nasadia mosabi dava ala i Yesus mamala rahuku mate.

Matius 3:17

Bo naria suara lako ri suruga nanguli, “Hitumo AnaKu nipotoveKu. Iamo nompakadamba raraKu.”

Matius 5:34

Tapi Kuuli ka komiu, nemo ntoto mosumpa ante manguli langi, sabana langi gadera nu Alatala.

Matius 5:44

Tapi Kuuli ka komiu, potovemo balimiu bo posambayaka tona nompandasa komiu.

Markus 14:55

Tempo haitu balengga-balengga ntopanggeni pesomba ante pura-pura topolibu ntanina ri Polibu Mbaso Agama Yahudi nompasimbuku mangelo tona mosabi dava ala i Yesus mamala rahuku mate. Tapi ledo ntoto nikavara salaNa.

Markus 15:1

Sanggaeo mpisina, pura-pura balengga-balengga ntopanggeni pesomba ante guru-guru agama, totua-totua, bo topolibu ntanina lako ri Polibu Mbaso Agama, nasintuvu bo nosangu patujumo. Nitipungguramo i Yesus pade nikenira hau nte Gubernur Pilatus.

Lukas 12:5

Kuuli ka komiu isema masipato rapokaekamiu! Aginamo komiu maeka nte Alatala, sabana Ia nakuasa mompatesi karomiu bo mombanavusaka komiu riara narakaa! Pariaramo tesaKu hitu! Aga Alatala masipato rapokaekamiu!

Lukas 22:66

Naeo mpadondo nasiromumo tona ri Polibu Mbaso Agama Yahudi, haitumo totua-totua ntoYahudi, balengga-balengga ntopanggeni pesomba, bo guru-guru agama. Pade nikenira i Yesus hau ri ngayo ntoPolibu haitu.

Yohanes 11:47

Jadi balengga-balengga ntopanggeni pesomba bo toFarisi nompasiromu toPolibu Mbaso Agama Yahudi. Niulira ka topolibu anu nasiromu haitu, “Nuapa masipato rapoviata? Nadea mpuu kabaraka nipovia ntona haitu.

Yohanes 15:25

Haitu najadi ala madupa tesa nitulisi riara Buku Gasa ivei: ‘Ira navuu matara nanggita Yaku nau ledo naria sabana.’

Yohanes 7:20

Nesanamo tona dea haitu, “Iko nipesua nu seta! Isema nompasimbuku mompatesi Iko?”

Yohanes 8:48

Nangepe tesa haitu, nangulimo toYahudi ka i Yesus, “Hm! Nakana mpuu niuli kami! Iko nipesua nu seta! Iko nasimbayu mpo toSamaria naruto!”

Suro-Suro 17:18

Nosinjula tesa muni ia nte guru-guru anu nangoseaka pepatuduki i Epikuros bo guru-guru nangoseaka pepatuduki anu niuli Stoa. Bara sako-ndua guru-guru haitu nosisanai ante i Paulus. Naupu sia, naria sanu nanguli, “Nuapa nisani ntona moitu? Pangisanina aga sakide, tapi tesana nadea!” Bo naria tona ntanina nanguli, “Ia bara madota mompopaisani viata-viata nisomba ntosangatana ka kita!” Niulikara ivesia apa i Paulus notesa i Yesus, bo nitesana muni tona natuvu mpanjili lako ri kamatena.

Suro-Suro 22:30

Tadulako Magau Mbaso haitu mpuu-mpuu madota mangisani nuapa sabana toYahudi nompakasala i Paulus. Jadi kamailenapa nitudunamo balengga-balengga ntopanggeni pesomba ante pura-pura toPolibu Mbaso Agama masiromu. Bo nipekivolenamo rante i Paulus pade nikenina hau mantingayo polibu haitu.

Suro-Suro 23:1

Nakava sumai, nikanoto i Paulusmo toPolibu Mbaso Agama bo niulina, “Sampesuvu-sampesuvuku. Sampe ri eo hitu, yaku natuvu nanoa, nagasa ri panggita nu Alatala.”

Suro-Suro 24:20

Tapi ira ledo ria ri sii, jadi aginamo tona ri sii anu nompangadu yaku, manguli pakalanto sala nuapa nikavara tempo yaku naria ri ngayo Polibu Mbaso Agama Yahudi.

Suro-Suro 4:15

Jadi nitudura suro haitu rakeni hau ri savalikuna sampalai, bo topolibu pangane nosimpekutana,

Suro-Suro 5:21

Naupu nangepe tesa haitu, hau mpuumo suro-suro nanturusi anu niuli nu malaeka ka ira. Nasadondo mpuu ira hau ri doyata Banua nu Alatala bo nompamulamo nompatuduki tona ri sia. Tempo haitu Pakeni nTopanggeni Pesomba ante roa-roana nompokio pura-pura pakeni-pakeni ntoYahudi masiromu ri Polibu Mbaso Agama. Nitudura tona hau mangala suro-suro lako ri tarunggu, rakeni ratangara ri ngayora.

Suro-Suro 5:27

Suro-suro nikenira nesua nantingayo Polibu Mbaso. Pade Pakeni nTopanggeni Pesomba nomparesa ira, ivei:

Suro-Suro 6:12

Ivesiamo ira nompakapane rara ntodea bo totua-totua ntoYahudi bo guru-guru agama sampe narau rarara nte i Stefanus. Jadi hau ira nombasaka i Stefanus, pade nikenira ratangara ri ngayo Polibu Mbaso Agama Yahudi.

Suro-Suro 6:15

Pura-pura tona ri Polibu Mbaso haitu nangganotosi i Stefanus. Bo nikitara lenje i Stefanus nasimbayu mpo lenje nu malaeka.

Suro-Suro 7:37

I Musa muni nanguli ka todea toIsrael, ‘Alatala mombadekei ka komiu saito Nabi nasimbayu mpo yaku, rapelisiNa lako nte komiu mboto.’

Roma 12:10

Posimpotovemo mpo posimpotove ntali sampesuvu. Bila ntanimo roamiu pade karomiu mboto.

1 Korintus 6:10

Ivesia muni ante topangangga, tona ledo ria kabasa-basana manggava untu ka karona mboto, tona nanginu sampe nalangu, tona nanjalai-lai roa, bo topeago. Ira muni ledo ntoto manggava bagia riara Poparenta nu Alatala.

1 Korintus 6:6

Tapi ledo ivesia nipoviamiu. Komiu aga nosipangadu ntali sampesuvu sampomparasaya bo nanggeni parakara haitu ratangara ntona ledo topomparasaya i Yesus!

1 Tesalonika 4:6

Nee movia dosa ka sampesuvumiu sampomparasaya bo nee rabagiu ia ante mangala bereina, sabana Alatala mombahuku pura-pura tona nokainggu ivehaitu. Haitu pura-pura nipatuduki bo nipopatora kami ka komiu bara ipia.

Titus 3:2

Ulika ira nee mositunturaka, bo nee mosinjanai. Ira kana moada bo malusu rara nte tona pura-pura.

Ibrani 12:25

Jadi sampesuvu-sampesuvu, pakabelo-belo, nee sampe komiu ledo madota mangepe tesa niuli nu Alatala ka komiu. Apa isema-sema ledo nadota mangepe pepatora nu Alatala anu nipapola Nabi Musa ri dunia bara ipia, ira ledo rakabasaka lako ri pehuku nu Alatala. Nemopa kita anu nangepe Ia notesa lako ri suruga! Ane kita ledo madota mangepe Ia, natantumo kita muni ledo rakabasaka lako ri pehukuNa.

Ibrani 5:9

Naganapa pura-pura haitu nirasaiNa, Ia najadi puna katuvua nabelo sampe ri kasae-saena ka pura-pura tona matundu nte Ia.

Yakobus 2:20

Nadoyo mpuu komiu ane raulimiu naganamo momparasaya bayangi, ledo paraluu mokainggu nabelo! Ledo ria gunana pomparasaya ivehaitu.

Yakobus 3:6

Ivesia muni tesa nisovadaka nu dilata. Tesata nasimbayu kadaana ante apu. Dilata nompopesuvu mpengaya-ngaya anu nadaa, nelabipa pade sipa-sipa ntanina ri karota. Tesa-tesa nisovadaka nu dilata nasimbayu mpo apu lako ri narakaa nompakadaa pura-pura katuvuta.

1 Petrus 2:23

Tempo Ia nisalai ntona, ledo nibalasiNa. Tempo Ia nipandasa, Ia ledo nesava. Tapi Ia aga nanjarumaka Alatala, Topotangara nanoa anu manjaliku Ia.

1 Petrus 3:9

Ane maria tona movia anu nadaa nte komiu, nee rabalasi ira ante anu nadaa. Ane rasalai ntona komiu, nee rapesava. Agina komiu merapi Alatala mombadekei belo ka ira. Apa komiu nipokio nu Alatala manggeni belo ka tona ntanina, ala komiu manggava belo lako nte Ia.

1 Yohanes 2:9

Isema-sema nanguli ia natuvu riara reme tapi navuu matana nte sampesuvuna sampomparasaya, tona haitu bate-batena da riara kalandana sampe sii-sii.

1 Yohanes 3:10

Hitumo posisalana ana-ana nu Alatala bo ana-ana Magau nu Seta: isema-sema ledo novia dota nu Alatala bo ledo nompotove sampesuvuna, ia ledo ana nu Alatala.

1 Yohanes 5:16

Sampesuvu-sampesuvuku, ane rakitamiu roamiu sampomparasaya novia dosa anu ledo mompopogaa ia lako nte Alatala sampe ri kasae-saena, komiu kana mosambaya ka roamiu haitu. Posambayamo ala ia majea bo Alatala mombadekei ka ia katuvu mabelo sampe ri kasae-saena. Tona niuliku hitu, tona novia dosa anu ledo nompopogaa ia lako nte Alatala sampe ri kasae-saena. Naria muni dosa anu nompopogaa tona lako nte Alatala. Ledo paraluu raposambayakamiu tona novia dosa haitu.

Yudas 1:9

Tano i Mikhael mboto, nau ia tadulako malaeka nu Alatala, ledo nabia nanjalai Magau nu Seta. Tempo kamate i Musa, i Mikhael bo Magau nu Seta nosinjanaika isema mangala karobata i Musa. Nirasai i Mikhael ledo masipato ia manjalai Magau nu Seta. Ia aga nanguli, “Damo Tupu mombahuku iko!”

Pompakita 20:14

Isema-sema ledo nitulisi sangana riara Buku Katuvua haitu, nitedaka riara ntasi apu. Haitumo niuli kamatea karongganina, pehuku riara ntasi apu. Naupu haitu domo ria kamatea bo domo ria ponturo ntomate, apa kamatea bo ponturo ntomate nitedaka riara ntasi apu.