Matius 20:1 - Kaili Ledo

¹ I Yesus nanguli, “Tempo Alatala momparenta mpo Magau bo mombabalasi pokainggu ntodeaNa bara maipia masimbayu eva porapa hitu: Naria saito tona notalua anggur. Nasadondo mpuu ia nesuvu lako ri banuana hau mangelo tona ragajina mokarajaa ri taluana.

Matius 20:1 Iomraidhean Croise

Matius 13:24

Naria porapa ntanina nitesa i Yesus ka todea haitu ivei: “Poparenta nu Alatala nirapaka tona hau nosavu savua tobelona ri taluana.

Matius 13:31

Pade naria porapa ntanina nitesa i Yesus ka todea ivei: “Poparenta nu Alatala namala nirapaka batu mandoe anu niala ntona bo nitudana ri taluana.

Matius 13:33

Naupu sia nitesa i Yesus vaimo sangu porapa ntanina. NiuliNa, “Poparenta nu Alatala nasimbayu eva ragi niala nu mombine bo niposigalona ante talu-njuka labu nu gando. Naupu nipasigalona, nenggamba puramo labu gando haitu.”

Matius 13:47

“Poparenta nu Alatala nirapaka jala ri porapa hitu: Sangu jala bau nitendeaka ntopebau riara ntasi, bo nompengaya lenje bau nesua riarana.

Matius 20:2

Nikavana bara sako-ndua topokarajaa bo nasitujumo ira simbo sampeka doi salaka gajira saeo. Naupu sia nituduna ira hau mokarajaa ri taluana.

Matius 21:28

I Yesus nompekutana pakeni ntoYahudi, “Berimba panggavamiu? Naria saito tuama, randua anana langgai. Nanguli ia ka anana lumbua, ‘Anaku, koimo iko mokarajaa ri talua.’

Matius 22:2

“Poparenta nu Alatala nasimbayu nte porapa hitu. Naria saito magau novia posusa poboti ka anana langgai.

Matius 23:37

“Heh, komiu toYerusalem! Komiu nompatesi nabi-nabi bo tona nisuro nu Alatala nirempemiu vatu sampe namate! Nadea ngganimo Yaku madota mombasaliku komiu pura-pura, nasimbayu mpo manu tina nombarumutasi anana, tapi ledo nadota komiu.

Matius 25:1

“Tempo Yaku makava mpo Magau, maria tona mainga bo maria tona ntanina malinga nasimbayu nte porapa hitu: Naria sapulu randaa hau mantomunaka boti langgai, simbo nanggeni poindona.

Matius 25:14

“Tempo Yaku makava mpanjili masimbayu nte porapa hitu: Saito madika nopatuju hau ri ngata nakavao. Dopame ia hau, nirondena batua-batuana bo niparasayana ka ira kakalumanana.

Matius 3:2

Niulina, “Kajeamo lako ri dosamiu sabana naparamo tempona Alatala mompamula momparenta mpo Magau!”

Markus 13:34

Haitu nasimbayu nte porapa hitu: Naria saito tona hau ri ngata nakavao. Dopame ia hau, nidekeina mami kuasa ka batua-batuana mombaurusi banuana. Saito-saito nipakatantuna pokarajaa ka ira. Bo topojagai vamba nitevaina mainga-inga ante kakavana.

Yohanes 15:1

I Yesus nompapola tesaNa, “Yakumo hii valaa anggur nakana, bo TuamaKu tupu ntalua anggur haitu.

1 Korintus 15:58

Jadi sampesuvu-sampesuvu nipotoveku, pakaroso pomparasayamiu bo nee molengga-lengga. Pasimbuku ante mpuu-mpuu raramiu mantui pokarajaa nidekei i Pue Yesus ka komiu, apa nisanimiu ledo ria nuapa-nuapa anu ledo ria gunana rapoviamiu ka Ia. Natantu kana maria aselena.