Matius 10:41 - Kaili Ledo

⁴¹ Isema-sema nantarima saito suro nu Alatala sabana ia mpuu-mpuu suro nu Alatala, tona haitu manggava tambo nasimbayu eva anu radekeika suro haitu. Bo isema-sema nantarima saito tonoa sabana ia mpuu-mpuu nanoa, tona haitu manggava tambo nasimbayu eva tambo radekei ka tona nanoa haitu.

Matius 10:41 Iomraidhean Croise

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Matius 25:44

Bo ira manguli ka Yaku, ‘Pue, ipia nikita kami naara taiMiu, atau nabai tamboloMiu, atau Komiu tosangatana atau ledo nopakea, atau nadua, atau nitarunggu bo kami ledo nantulungi Komiu?’

Matius 25:45

Bo Yaku mesana ka ira, ‘Pariaramo tesaKu hitu! Tempo komiu ledo nadota nantulungi sampesuvu-sampesuvuKu hitu anu naede panggana, batuana komiu ledo nadota nantulungi Yaku.’ ”

Matius 6:1

“Toramo, ane komiu movia ada-ada nu agama, nemo rapopakita ri ngayo ntodea. Apa ane ivesia pokainggumiu, komiu ledo ntoto manggava belo lako nte Alatala, Tuamamiu ri suruga.

Matius 6:18

ala ledo rasani ntona ntanina komiu nopuasa. Aga Alatala, TuamaMiu ri suruga, anu ledo nikita, mangisanina. RakitaNa poviamiu anu ledo nisani ntona ntanina haitu bo radekeiNa tambo ka komiu.”

Matius 6:6

Tapi ane komiu mosambaya, pesuamo riara ntombimiu, upimo vamba, bo posambayamo ka Alatala, Tuamamiu anu ledo nikita. Bo Alatala anu nanggita poviamiu nggalino haitu, mombadekei tambo ka komiu.

Matius 7:8

Apa isema-sema merapi, kana radekei ka ia. Isema-sema mompaelo kana rakavana. Bo isema-sema mantanede vamba, kana raungge ka ia.

Suro-Suro 16:15

Naupu haitu i Lidia sambanua nidiu, tandana ira topangoseaka i Yesus. Naupu ira nidiu, i Lidia nombagaga kami hau ri banuana. Niulina, “Nikitamiu yaku hii mpuu-mpuu nomparasaya i Pue Yesus. Jadi kamaimo monturo ri banua kami.” Nipasimbukuna kami hau ri banuana.

Roma 16:23

Tarima muni tabe lako nte i Gayus. Yaku i Paulus, nipalogana nonturo ri banuana, bo topomparasaya ri sii muni biasa nasiromu nodade ri banuana. Tarimamo tabe lako nte i Erastus, topompasiayu doi ri ngata hitu. Bo tarima muni tabe lako nte sampesuvuta i Kwartus.

1 Korintus 9:17

Ane rapana dotaku mboto mompatolele Kareba haitu, tantu masipato yaku manggava tambo. Tapi ledo ivesia yaku. Yaku nompatolele Kareba Belo, ledo lako ri dotaku mboto. Bara kupodota bara ledo, kana kupatolele Kareba Belo apa haitumo pokarajaa niparasaya nu Alatala ka yaku.

Ibrani 6:10

Alatala ledo natenggo raraNa, Ia ledo malinga raraNa ante poviamiu bo pepotovemiu. Nipopakitamiu tovemiu ka Ia tempo komiu nombatulungi sampesuvumiu sampomparasaya, nompamula lako ri nggauluname sampe sii-sii.

2 Yohanes 1:8

Jadi komiu kana mainga! Nee sampe anu nipatuduki kami ka komiu ledo maria aselena. Pasimbukumo mangoseaka pepatuduki nakana ala rakavamiu pura-pura belo nipakasadia nu Alatala ka komiu.