Matius 10:2 - Kaili Ledo

^2-4 Sanga sapulu randua anaguru anu nisuroNa haitumo, Pamulana i Simon anu nosanga muni i Petrus; bo i Andreas, tuei i Petrus; i Yakobus bo i Yohanes ana-ana i Zebedeus; i Filipus; bo i Bartolomeus; i Tomas; bo i Matius topesingara balasitee; i Yakobus ana i Alfeus; i Tadeus; i Simon, saito lako ri partai Zelot, haitumo partai maradeka ntoYahudi; bo i Yudas Iskariot anu nompobalu i Yesus ka baliNa.

Matius 10:2 Iomraidhean Croise

Matius 17:1

Ono-mbongi kaliuna haitu, i Yesus nanggeni i Petrus, i Yakobus ante tueina i Yohanes hau nantende bulu nalanga. Aga i Yesus ante ira tatalu naria hamai.

Matius 20:20

Naliu haitu berei i Zebedeus nakava nte i Yesus niporoa anana randua haitumo i Yakobus bo i Yohanes. Nantaputumo mombine haitu ri ngayo i Yesus sabana naria anu raperapina.

Matius 26:37

NikeniNa i Petrus bo randua ana i Zebedeus nosanggani nte Ia. Hamai nompamulamo i Yesus nasusa bo napari raraNa.

Matius 4:18

Naria sanggani i Yesus nolipa ri tinggi Rano Galilea. NikitaNa hamai randua tona ntali sampesuvu, haitumo i Simon, anu nidae i Petrus, ante tueina i Andreas. Tempo haitu ira nantendeaka jala mompemala bau ri rano haitu sabana ira topebau mami.

Matius 4:21

Lako ri situ napolamo i Yesus sampe nikitaNa randuapa tona ntali sampesuvu, haitumo i Yakobus bo i Yohanes, ana-ana i Zebedeus. Tempo haitu ira nompakabelo jalara riara sakaya nosanggani ante tuamara i Zebedeus. I Yesus nompokio ira randua mangoseaka Ia.

Markus 1:29

I Yesus ante topangoseaka-topangoseaka Ia nompalaisi banua petupu haitu bo kaliu-liu hau ri banua i Simon bo Andreas. I Yakobus bo i Yohanes muni hau nosanggani nte ira.

Markus 13:3

I Yesus nonturo ri Bulu Zaitun nosintingayoka Banua nu Alatala. Tempo haitu i Petrus, i Yakobus, i Yohanes bo i Andreas nekutana nte Ia nggalino-lino,

Markus 6:30

Anaguru i Yesus nanjili lako nompatolele Kareba Belo, bo nasiromu mpanjili nte i Yesus bo notesa pura-pura anu nipoviara bo nipatudukikara.

Lukas 11:49

Sabana haitu, Noto nu Alatala nanguli pakalanto ivei: ‘Nabi-nabi bo suro-suroKu Kutudu hau nte ira gahaitu. Sanu rapatesira, bo sanu rapandasara.’ Alatala nanguli ivesia sabana nisaniNa komiu anu natuvu sii-sii nasimbayu kadaamiu ante totuamiu nggaulu.

Lukas 22:14

Nakavamo tempo mangande kandea Posusa Paskah haitu, i Yesus nangande singgani-nggani ante anaguruNa ri banua haitu.

Lukas 22:8

I Yesus nombatudu i Petrus bo i Yohanes ivei: “Koi pasadiamiu kandea Paskah ka kita.”

Lukas 5:10

Ivesia muni roa i Simon, haitumo i Yakobus bo i Yohanes, ana i Zebedeus. Nanguli i Yesus ka i Simon, “Nee maeka. Komiu topebau mami, tapi nompamula sii-sii komiu mompaelo tona bo mompatuduki ira mangoseaka Yaku.”

Lukas 9:10

Naupu ana-anaguru i Yesus nompatolele Kareba Belo bo nompakabelo tona nadua, nanjilimo ira. Bo pura-pura anu nipoviara hamai, nitesara ka i Yesus. Naupu haitu, ira niunaka i Yesus hau nompatani ri sangu ngata nosanga Betsaida.

Yohanes 12:22

Nangepe perapira haitu, hau i Filipus notesa ka i Andreas bo ira randua hau nanguli perapi haitu ka i Yesus.

Yohanes 13:23

Saito anaguruNa anu nipotoveNa nonturo ri sinjoriNa.

Yohanes 20:2

Jadi nangovamo ia hau nte i Simon Petrus bo anaguru nipotove i Yesus, bo niulina, “Niala ntonamo karobata i Yesus lako riara nu dayo, bo ledo nisani kami bara ri umba nipombolira!”

Yohanes 21:2

Bara sako-ndua anaguru i Yesus nasiromu ri sia, haitumo i Simon Petrus, i Tomas anu nidae “Ngana Rapi”, i Natanael lako ri ngata Kana ri bagia Galilea, bo randua ana i Zebedeus, bo randua anaguruNa ntanina.

Yohanes 21:20

Naupu haitu neilimo i Petrus bo nikanotona anaguru anu nipotove i Yesus. Anaguru haitumo anu nonturo ri sinjori i Yesus tempo ira nangande bongina, anu nekutana, “Isema mompobalu Komiu, Pue?”

Yohanes 21:24

I Yohanes hii anaguru nitesa ri bavona, iamo nanggita bo notesaki kajadia haitu. Bo ia muni notulisi kajadia haitu riara buku hitu. Bo nisanita anu nitesana haitu mpuu-mpuu nakana.

Yohanes 6:67

Jadi i Yesus nompekutana anaguruNa sapulu randua haitu, “Berimbamo? Rapalaisimiu muni Yaku?”

Yohanes 6:70

Nesana i Yesus, “Yaku mbotomo nompelisi komiu sapulu randua tutu. Tapi naupa ivesia, naria saito komiu nipopale nu Magau Seta!”

Yohanes 6:71

Tona nipatuju i Yesus iamo i Yudas ana i Simon Iskariot. Apa naupa i Yudas haitu saito lako nte ira sapulu randua, ia haitumo anu mompobalu i Yesus ngena.

Yohanes 6:8

Pade saito anaguruNa ntanina anu nosanga i Andreas, sampesuvu i Simon Petrus, nanguli

Suro-Suro 1:13

Nakava ri Yerusalem, hau ira ri banua ponturora bo nompene ri tombi kalangana. Sanga nu suro-suro haitu iamo: i Petrus, i Yohanes, i Yakobus, i Andreas, i Filipus, i Tomas, i Bartolomeus, i Matius, i Yakobus ana Alfeus, i Simon Zelot topangeva pomarenta, bo i Yudas ana Yakobus.

Suro-Suro 1:26

Naupu ira nosambaya, nitenderamo lamoro, bo nambela sanga i Matias. Jadi nompamula lako ri eo haitu, i Matias nireke saito lako ri sapulu randua suro i Pue Yesus.

Suro-Suro 12:2

Nituduna tona mompatesi i Yakobus, sampesuvu i Yohanes, ante guma.

Suro-Suro 3:1

Naria saeo i Petrus bo Yohanes hau ri Banua nu Alatala tinti tatalu ede eo, haitumo tempo posambaya ntoYahudi.

1 Korintus 15:7

Naupu haitu nipopakitaNa karoNa ka i Yakobus, bo ka pura-pura tona najadi suroNa.

Efesus 4:11

Iamo nompalele pedekei-pedekei ka kita. Sanu nidekeikaNa pompakule majadi suro, sanu nidekeikaNa pompakule majadi nabi anu mompasimbayu tesa nitarimana lako nte Alatala. Sanu muni nidekeikaNa pompakule majadi topompatolele Kareba Belo, bo ntanina nidekeikaNa pompakule manggeniaka bo mompatuduki todea topomparasaya.

Ibrani 3:1

Jadi, sampesuvu-sampesuvuku anu nipelisi nu Alatala bo nipokioNa matuvu mabelo ri suruga. Pekirimo pakabelo-belo i Yesus hitu. Ia nisuro nu Alatala najadi Pakeni nTopanggeni Pesomba ri agama nioseakata.

1 Petrus 1:1

Sampesuvu-sampesuvu anu nipelisi majadi todea nu Alatala bo nonturo mpo topesovo nasimpotare ri umba-umba ri propinsi Pontus, Galatia, Kapadokia, Asia bo Bitinia: Sura hitu lako nte yaku i Petrus, suro i Yesus Kristus. Kuperapi Alatala mpuu-mpuu mabelo nte komiu bo mompakatinonto raramiu. Komiu nipelisi nTuamata Alatala majadi todeaNa nangoseaka niaNa mboto lako ri lamba pamulana. Bo Nosa Gasa nompakajadi komiu todea nagasa, nipatani ka Alatala, ala komiu matundu nte i Yesus Kristus bo dosamiu raampungiNa sabana raaNa natiti ri kayu salib.

2 Petrus 1:1

Sampesuvu-sampesuvuku anu mpuu-mpuu nomparasaya i Yesus Kristus, nasimbayu mpo kami. Iamo Alatala bo Topompakasalama kita, anu nompopompakule pura-pura kita nomparasaya sabana Ia nanoa bo ledo nompelenje. Sura hitu lako nte yaku, i Simon Petrus. Yaku batua bo suro i Yesus Kristus.

2 Yohanes 1:1

Nina ntali ana, anu nipelisi nu Alatala: Sura hitu lako nte yaku, i Yohanes, pakeni ntodea topomparasaya. Yaku mpuu-mpuu nompotove komiu. Ledo aga yaku tapi pura-pura topangisani pepatuduki nakana lako nte Alatala, nompotove komiu muni.

3 Yohanes 1:1

Gayus, vega nipotoveku: Sura hitu lako nte yaku, i Yohanes, pakeni ntopomparasaya. Yaku mpuu-mpuu nompotove iko.

Pompakita 1:1

Isi buku hitu notesaki kajadia-kajadia anu majadi bara maipia, anu nipopaisani nu Alatala ka i Yesus Kristus. I Yesus nitudu nu Alatala mompopaisani kajadia haitu ka topangoseaka Ia ala rasanira anu domo masae majadimo. Jadi i Yesus nombatudu malaekaNa hau mompopaisani anu majadi haitu ka batuaNa i Yohanes.

Pompakita 1:9

Yaku hii i Yohanes, sampesuvumiu sampomparasaya. Yaku nombarasai susa bo pari nasimbayu ante pura-pura topangoseaka i Yesus, bo yaku muni najadi todea riara PoparentaNa nasimbayu ante pura-pura topangoseaka i Yesus, bo yaku muni nosabara tempo nipandasa, nasimbayu ante pura-pura topangoseaka i Yesus. Yaku nitaniaka ri levuto Patmos, sabana nompatolele Tesa nu Alatala bo pepatuduki i Yesus.

Pompakita 18:20

Bo nanguli malaeka, “Umbamo komiu toponturo ri suruga! Pakadambamo raramiu! Pakadambamo raramiu todea nu Alatala mosanggani-nggani ante suro-suroNa bo nabi-nabiNa! Sabana, tupu ngata mbaso Babel nihuku nu Alatalamo! NibalasiNamo pokainggura nadaa nte komiu.”

Pompakita 22:8

Yaku i Yohanes nanggita bo nangepe pura-pura kajadia pangane. Naupu yaku nangepe bo nanggita haitu pura-pura, nantaputumo yaku sampe ri tana mombasomba malaeka anu nombatuduaka pura-pura kajadia haitu ka yaku.