Matius 1:21 - Kaili Ledo

²¹ I Maria mompoanaka saito ngana langgai, bo ngana haitu kana mupoposanga Yesus sabana Iamo mompakasalama todeaNa lako ri dosara.”

Matius 1:21 Iomraidhean Croise

Matius 1:25

tapi ira dopa nosampaturu dopame i Maria moanaka anana langgai haitu. Bo i Yusuf nompoposanga ngana haitu i Yesus.

Lukas 1:13

Tapi nanguli malaeka, “Nee maeka, Zakharia. Nitarima nu Alatalamo posambayamu. Bereimu i Elisabet moana saito ngana langgai, bo mupoposanga Yohanes.

Lukas 1:31

Iko matiana bo mompoanaka saito ngana langgai bo kana mupoposanga Ia i Yesus.

Lukas 2:11

Bongina hitu ri ngata pompoanaka Magau Daud, nipoanakamo saito magau mompakasalama komiu. Iamo i Pue, anu nipelisi nu Alatala.

Lukas 2:21

Nagana valu-eo umuru nu ngana, nipoviaramo ada posuna. Pade nipoposangara ngana haitu i Yesus, nangoseaka tesa nu malaeka ka i Maria, dopame i Yesus nikatianaka ntinaNa.

Yohanes 1:29

Eo kamailena i Yohanes nanggita i Yesus nakava tumai nanggaparai ia, bo niulina ka tona hamai, “Peintamo! Tumaimo Ana Bimba nipakasadia nu Alatala anu mompakalali dosa manusia!

Yohanes 4:42

Naupu sia, niulikara mombine haitu, “Sii-sii niparasaya kami mpuumo, ledo aga lako ri tesamu tapi niepe kami mbotomo tesaNa. Bo nisani kamimo Ia mpuu-mpuu Magau Topompakasalama manusia.”

Suro-Suro 13:23

Lako ri muli i Daud, Alatala nompelisi ka toIsrael saito Magau Topepakasalama nangoseaka pojanjiNa nggaulu, haitumo i Yesus.

Suro-Suro 3:26

Haitumo sabana Alatala nanganggataka BatuaNa i Yesus, bo nantudu Ia tumai nte kita toYahudi ntani ruru, ala radekeiNa belo ka kita, haitumo, Ia manggeni kita majea lako ri pokaingguta nadaa.”

Suro-Suro 4:12

I Petrus nompapola tesana, “Aga i Yesus namala mompakasalama manusia, sabana ri njumangu dunia ledo ria saitoa tona ntanina nipakakuasa nu Alatala mompakasalama manusia, aga i Yesus saitoNa.”

Suro-Suro 5:31

Bo Alatala nompakaoge i Yesus bo nipoponturoNa Ia ri sabingga ngganaNa, bo nidekeiNa ka Ia kuasa momparenta bo mompakasalama kita, ala kita toIsrael radekei loga majea lako ri dosa-dosata bo raampungi.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Ibrani 7:25

Jadi haitumo sampe Ia nompakule nompakasalama sampe ri kasae-saena tona nikeniNa natundu nte Alatala. Apa i Yesus batena natuvu nombasaliku ira ri ngayo nu Alatala.

1 Yohanes 1:7

Tapi ane kita natuvu riara reme nasimbayu mpo Alatala naria riara nu reme, kita natuvu nosangu rara nte roa, bo Alatala mombalelaka pura-pura dosata sabana raa nu AnaNa i Yesus anu namate ala dosata mamala raampungi.

1 Yohanes 3:5

Nisanimiumo patuju i Yesus nakava ri dunia ala Ia mompakalali pura-pura dosa manusia. Bo nisanimiu muni Ia mboto ledo ntoto nadosa.

Pompakita 7:14

Nesanamo yaku, “Tua, ledo nisaniku, komiu nangisanina.” Bo nangulimo ia ka yaku, “Ira gahaitumo tona nipakasalama tempo pepandasa anu nelabi mpuu kadaana. Nitoposira pakeara sampe naramputi ante raa nu Ana Bimba, haitumo, dosara niampungi.