Lukas 9:28 - Kaili Ledo

²⁸ Nitasere saminggu kaliu i Yesus nombadekei pangajari ka ira, nikeniNa i Petrus, i Yohanes ante i Yakobus hau nantende ri bulu, mosambaya.

Lukas 9:28 Iomraidhean Croise

Matius 14:23

Naupu Ia nompopanjili todea, nantendemo Ia saitoNa mosambaya ri bulu. Nabongimo, da ri bulu Ia saitoNa.

Matius 5:1

Tempo i Yesus nanggita todea haitu, nantendemo Ia hau ri bulu. Nonturopa Ia ri sia, nakavamo topangoseaka Ia.

Markus 1:35

Nasadondo mpuu, da naruyona, nembangumo i Yesus bo nompalaisi banua. Ia hau ri ponturo nakalinoa bo nosambaya hamai.

Markus 6:46

Nogaapa nte todea, haumo Ia mosambaya ri bulu.

Lukas 3:21

Dopame i Yohanes nisuaraka riara ntarunggu, naria saeo ia nombadiu todea. Naupu todea nidiuna, i Yesus muni nidiuna. Tempo i Yesus nosambaya, natebukamo langi

Lukas 5:16

Tapi i Yesus nasaro hau ri kalinona nosambaya.

Lukas 6:12

Tempo haitu, i Yesus ante topangoseaka Ia hau nantende ri bulu. Nakava sumai Ia nosambaya ka Alatala njambongi ntua.

Lukas 8:51

Nakava ira ri banua i Yairus, ledo nidekei i Yesus sambara tona mesua riarana mosanggani nte Ia. Aga i Petrus, i Yohanes, bo i Yakobus ante tina tuama nu ngana haitu nidekeiNa mesua mosanggani ante Ia.

Lukas 9:18

Naria sanggani, i Yesus da nosambaya saitoNa, nakavamo anaguruNa nte Ia. I Yesus nekutana nte ira, “Nantuntuni tesa ntodea, isema Yaku hii?”

Yohanes 6:3

Nakava ri sambote rano, i Yesus ante ana-anaguruNa nantende ri buntina bo nonturomo.

2 Korintus 13:1

Katalu-ngganikana hitu yaku makava nte komiu. Tempo yaku ri situ nte komiu karongganina bara ipia, nipopatoraku ka ira topovia dosa bo ka pura-pura tona ntanina, tumo rapovia dosa. Jadi hitupa nau yaku ledo ri situ nte komiu, kupopatora mpanjili ka komiu: tumo mpuu movia dosa! Riara Buku Gasa niuli ane maria tona nirai, kana maria randua atau tatalu sabi ala rasani kakanana, bara nasala ia bara ledo. Maupu sia pade mamala rahuku. Ane makava ri situ yaku bo komiu dopa nenonto novia nadaa, domo maasi mataku nanggita komiu tapi kuhuku mpuu!

Ibrani 5:7

Tempo i Yesus da naria ri dunia Ia nosambaya ante buku rara bo nekakai nerapi tulungi nte Alatala anu nompakule mompakasalama Ia lako ri kamateNa. Bo posambayaNa niepe nu Alatala sabana Ia batena nekou nte Alatala bo ledo nangoseaka dotaNa mboto.

2 Petrus 1:16

Kami nompatuduki ka komiu kuasa nTuputa Yesus Kristus bo kakavaNa mpanjili ri dunia hitu. Pepatuduki kami haitu ledo nangoseaka patesa-patesa nipovia nu manusia. Tapi kami mboto nanggita kaogeNa anu nipokumaaka.