Lukas 9:24 - Kaili Ledo

²⁴ Isema-sema aga nangoseaka dota nu rarana mboto bo natuvu ka karona mboto, ledo manggava katuvu nabelo sampe ri kasae-saena. Tapi isema-sema mombakabasaka dotana mboto sabana nangoseaka Yaku, nau ia rapatesi, iamo matuvu mabelo sampe ri kasae-saena.

Lukas 9:24 Iomraidhean Croise

Matius 10:39

Isema-sema batena nangoseaka dota rarana mboto, ledo manggava katuvu mabelo sampe ri kasae-saena. Tapi isema-sema nombakabasaka pura-pura dota rarana mboto sabana nioseakana Yaku, iamo manggava katuvu mabelo sampe ri kasae-saena.

Lukas 17:33

Isema-sema nompasimbuku nangoseaka dotana mboto, bo natuvu ka karona mboto, ledo manggava katuvu mabelo sampe ri kasae-saena. Tapi isema-sema nombakabasaka dotana mboto sabana nangoseaka Yaku, nau ia rapatesi, iamo matuvu mabelo sampe ri kasae-saena.

Yohanes 12:25

Isema-sema aga nompotove katuvuna ri dunia hitu kana malipo katuvuna bara maipia. Tapi isema-sema ledo nompotove katuvuna riara dunia hitu, manggava katuvua mabelo sampe ri kasae-saena.

Ibrani 11:35

Lako ri pomparasayara, mombine-mombine nanggita mpanjili tona-tonara anu nipakatuvu mpanjili lako ri kamatena. Tapi naria muni tona ntanina nompalamba karora nipandasa sampe namate sabana pomparasayara. Ira ledo nadota rakabasaka lako ri kasusa haitu apa ira madota rapakatuvu mpanjili bo manggava katuvua nabelopa.

Pompakita 12:11

Tapi todea sampomparasaya haitu nombadagi Magau nu Seta ante kuasa lako ri raa nu Ana Bimba anu namate nombasompo dosara. Bo nidagira ia ante pepatuduki i Yesus nipatolelera. Bo ledo nipotovera katuvura, ledo ntoto nenonto nomparasaya nau sampe rapatesi.

Pompakita 2:10

Tapi nee maeka komiu mantingayo kasusa bo kapari anu domo masae kana rarasaimiu. Pariaramo! Magau nu Seta mompopesua sanu komiu hau rantarunggu bo mompesori komiu ala moura pomparasayamiu. Komiu rapandasa sapulu eo kasaena. Tapi nee maupu raramiu momparasaya Yaku nau komiu rapatesi, sabana Kudekei ka komiu hadia padagi, haitumo komiu matuvu mabelo sampe ri kasae-saena.