Lukas 6:22 - Kaili Ledo

²² Nabelo mpuu komiu ane rapovuu mata ntona, rasuko ntona, rasalai ntona bo sangamiu rapakadaa ntona sabana komiu nangoseaka Yaku, Ana nu Manusia.

Lukas 6:22 Iomraidhean Croise

Matius 10:18

Komiu rakeni ri ngayo gubernur-gubernur bo magau-magau sabana komiu nomparasaya Yaku. Haitumo loga nabelo ka komiu motesa pomparasayamiu Yaku ka ira bo ka tona ntanina anu ledo toYahudi.

Matius 10:22

Komiu rapovuu mata ntodea sabana komiu nangoseaka Yaku. Tapi isema-sema maroo momparasaya sampe ri kaupuna rapakasalama nu Alatala.

Matius 10:39

Isema-sema batena nangoseaka dota rarana mboto, ledo manggava katuvu mabelo sampe ri kasae-saena. Tapi isema-sema nombakabasaka pura-pura dota rarana mboto sabana nioseakana Yaku, iamo manggava katuvu mabelo sampe ri kasae-saena.

Lukas 20:15

Jadi nikenira ana ntupu ntalua haitu hau ri savaliku ntalua bo nipatesiramo.” Nanguli i Yesus ka topangepe porapa haitu, “Jadi, nuapa rapovia ntupu ntalua ka topokarajaa haitu?

Lukas 21:17

Komiu rapovuu mata ntodea, sabana komiu nangoseaka Yaku.

Lukas 6:21

Nabelo mpuu komiu anu naara sii-sii, sabana komiu rapakabosu. Nabelo mpuu komiu nasusa rara sii-sii, sabana raramiu rapakasana.

Yohanes 12:42

Naupa ivesia, nadea muni pakeni ntoYahudi nomparasaya i Yesus. Tapi ira aga nomparasaya nggalino sabana naeka ira nte toFarisi, nee-nee ira domo radekei metupu ri banua petupu.

Yohanes 16:2

Komiu domo radekei metupu ri banua petupu ntoYahudi. Bo makava tempona topompatesi komiu rasarumakara poviara haitu mompakadamba rara nu Alatala.

Yohanes 17:14

NipasimbayuKu ka iramo tesaMiu sampe tona riara dunia hitu navuu matara nanggita anaguruKu. Sabana, anaguruKu haitu ledo nosangu pekiri ante ira, nasimbayu mpo Yaku muni ledo nosangu pekiri ante tona haitu.

Yohanes 7:7

apa ledo ria tona navuu matana nte komiu. Tapi Yaku nipovuu mata ntona nadaa ri dunia hitu sabana Yaku nantuenaka pokainggura nadaa.

Yohanes 9:34

Nesana ira, “Hih! Iko tu todosa mami lako ri pompoanaka! Ledo ntoto masipato iko mompatuduki kami!” Jadi nompamula lako ri eo haitu, domo nidekeira tona haitu metupu ri banua petupu.

Suro-Suro 22:22

Todea haitu nalino nangepe tesa i Paulus. Tapi nieperapa ia hau nte ntona ledo toYahudi, domo nipokonora mangepe anu ratesana. Nongaremo ira ante suara namangga mpuu, “Patesimo tona tutu! Ia domo masipato matuvu!”

Suro-Suro 24:5

Nikita kami i Paulus tuu topegado nadaa ntoto. Nipakagadona toYahudi ri umba-umba ngata. Ia muni pakeni ntona nangoseaka pepatuduki i Yesus toNazaret.

Suro-Suro 9:16

Damo Yaku mboto manguli ka ia kasusa rakavana sabana nioseakana Yaku bo nipatolelena karebaKu.”

Yakobus 1:12

Nabelo mpuu tona naroso rarana riara kasusa bo pesori! Ane maroso rarana sampe ri kaupu pesori haitu, Alatala mombadekei katuvu nabelo ka ia sampe ri kasae-saena. Katuvu nabelo haitu nijanji nu Alatala ka tona nompotove Ia.

1 Petrus 3:14

Tapi nau komiu mombarasai kasusa sabana pokainggumiu nabelo, mauntu mpuumo komiu! Nee maeka ka tona, bo nee makini raramiu.