Lukas 5:29 - Kaili Ledo

²⁹ Naupu sia, i Lewi novia posusa ka i Yesus ri banuana. Nadea topesingara balasitee ante tona ntanina nangande nosanggani-nggani nte ira ri posusa haitu.

Lukas 5:29 Iomraidhean Croise

Matius 11:19

Yaku, Ana nu Manusia nakava nangande bo nanginu uve anggur eva tona biasa, tapi niuli ntona, ‘Peintamo tona haitu! Nadoko, nalangu, vega ntopesingara balasitee bo vega ntodosa!’ Tapi nau ivesia, nisanita kanoto nia nu Alatala sabana aselena nikita ri pokainggu ntopangoseaka Ia.”

Matius 5:46

Ane komiu aga mompotove tona nompotove komiu, natantumo komiu ledo masipato ratoiya nu Alatala. Apa nau topesingara balasitee nadaa ingguna, nompotove tona anu nompotove ira.

Matius 9:10

Naupu haitu i Yesus ante anaguruNa hau nangande ri banua i Matius. Bo nadea topesingara balasitee bo tona ntanina anu nireke ntoYahudi tona nadosa, nakava nangande nosanggani-nggani ante ira.

Matius 9:9

Naupu haitu nalaimo i Yesus lako ri sia. Nolipa-lipamo Ia, nikitaNa saito topesingara balasitee nonturo riara kantoro ntopesingara balasitee. Sangana i Matius. Nanguli i Yesus ka ia, “Kaimo! Oseakamo Yaku!” Nangepe haitu neanggamo i Matius bo hau nangoseaka i Yesus.

Markus 2:15

Naliu haitu, haumo i Yesus nangande ri banua i Lewi nosanggani-nggani ante anaguruNa. Nadea topesingara balasitee bo tona niuli ntona nadea dosara nangande nosanggani-nggani ante ira, apa nadeamo tona ivehaitu nantuntuni i Yesus.

Lukas 15:1

Naria sanggani nadea topesingara balasitee ante tona ntanina, anu niuli ntodea nadaa pokainggura, nakava nangepe tesa i Yesus.

Yohanes 12:2

Hamai nipovia posusa mombabila i Yesus. I Marta nantulungi nanggeni kandea ka toposusa bo i Lazarus nonturo ri tatangara nangande nosanggani-nggani ante i Yesus.

1 Korintus 10:27

Ane komiu ragaga ntona ledo topomparasaya mangande ri banuana, bo komiu madota mangande ante ia, kandemo nuapa-nuapa ratibo ka komiu. Ledo paraluu rapekutana kandea haitu bara nipakande ka tupu-tupu ntanina. Ledo paraluu monggai-nggai raramiu mompekirika bara nasala bara ledo.