Lukas 10:42 - Kaili Ledo

⁴² Tano mai aga sangaya nopoko, haitumo mangepe tesa nu Alatala. I Maria nompelisi tobelona, anu ledo mamala raalasi ntona lako nte ia.”

Lukas 10:42 Iomraidhean Croise

Markus 8:36

Nuapa gunana ane rakavamiu pura-pura anu naria ri dunia hitu tapi ledo manggava katuvua nabelo sampe ri kasae-saena?

Lukas 10:39

Naria saito sampesuvuna mombine, nosanga i Maria. I Maria haitu nakava nonturo napara kada i Yesus bo nompetalingai pepatudukiNa.

Lukas 11:1

Naria sanggani i Yesus hau nosambaya. Naupu Ia nosambaya, nangulimo saito anaguruNa, “Pue, patuduki muni kami mosambaya mpo i Yohanes Topediu nompatuduki anaguruna nosambaya.”

Lukas 12:20

Tapi Alatala nanguli ka ia, ‘Heh, todoyo! Bongi hitu iko mamate. Pura-pura anu nipakasadiamu, isema tupuna ngena?’ ”

Lukas 12:33

Jadi pobalumo mbara-mbaramiu bo dekeimo alina haitu ka tona napakasi. Poviamo batutu doi anu ledo mamala magero. Batuana, poviamo anu mompakadamba rara nu Alatala. Ivesiamo komiu momboli kakalumana ri suruga, anu ledo maupu-upu bo ledo rapangangga ntona atau rakandesi nu saipa.

Lukas 16:2

Jadi nipokiona topompasiayu haitu bo niulikana, ‘Natantu mpuu pokainggumu niepeku! Dekei kakumo buku nu doi pokarajaamu nompasiayu kakalumanaku. Domo iko mompasiayu kakalumanaku!’

Lukas 16:25

Tapi nesana i Abraham, ‘Toramo anaku, tempo iko ri dunia, nikavamu puramo belona, tapi i Lazarus aga nanggava anu nadaa. Sii-sii ia nipakadamba, bo iko nipandasa.

Lukas 18:22

Nangepe haitu, nangulimo i Yesus ka ia, “Da naria sangayapa kana mupovia. Pobalu pura-pura kakalumanamu bo dekei alina haitu ka tona napakasi ala mukava kakalumana ri suruga. Maupu sia, oseakamo Yaku!”

Lukas 8:18

Jadi pariara pakabelo-belo Tesa nu Alatala niepemiu, sabana isema-sema mantarima bo mangoseaka Tesa haitu kana ratambaika pangisanina Tesa haitu. Tapi isema-sema ledo ratarimana bo ledo raoseakana Tesa nu Alatala, pangisani sakide naria nte ia ralelakasi lako nte ia.”

Yohanes 11:1

Naria saito langgai nosanga i Lazarus anu nonturo ri ngata Betania nosanggani-nggani ante sampesuvuna mombine anu nosanga i Maria bo i Marta. I Maria mombine nombatoli lana dupa ri kada i Yesus bo nipakabaina ante buluana. Naria sanggani i Lazarus nadua ntamo.

Yohanes 11:19

Jadi nadeamo toYahudi nakava nte i Marta bo i Maria mompakavoe rarara sabana sampesuvura i Lazarus namatemo.

Yohanes 12:3

Tempo ira nonturo hamai, i Maria nangala sabotolo lana vangi narwastu anu nasuli mpuu alina, nitasere santanga lite isina. Bo nakavamo ia mombatoli lana haitu ri kada i Yesus tanda pebilana, bo nipakabaina ante buluana. Bo riara banua haitu navangi mpuu soana lako ri lana vangi haitu.

Yohanes 17:3

Iveimo sampe manusia matuvu mabelo sampe ri kasae-saena: ira mosisani nte Komiu, Alatala aga saito-itoMiu nakana, bo ira mosisani muni ante Yaku, i Yesus Kristus, anu nituduMiu.

Yohanes 4:14

Tapi isema-sema manginu uve Kudekei ka ia, domo mabai tambolona sampe ri kasae-saena. Sabana uve Kudekei ka ia haitu majadi uve mpemata moili lako riara ntaina bo nombadekei katuvua mabelo ka ia sampe ri kasae-saena.”

Yohanes 5:24

Pariaramo tesaKu, isema-sema nangepe tesaKu bo nomparasaya Alatala anu nantudu Yaku, ia manggava katuvua nabelo sampe ri kasae-saena. Ia ledo mambela pehuku bo ledo rapopogaa lako nte Alatala tapi nariamo katuvua nabaru nte ia.

Yohanes 6:27

Nee aga mokarajaa ala manggava kandea anu masalisa maupu atau mavai. Agina komiu mokarajaa ala manggava kandea anu ledo mavai bo anu mombadekei katuvua mabelo sampe ri kasae-saena. Yaku, Ana nu Manusia mombadekei kandea haitu ka komiu, sabana Yakumo nianggataka nTuamaKu Alatala mantui pokarajaa haitu.”

1 Korintus 13:3

Bo ane kudekei pura-pura mbara-mbaraku ka tona napakasi, bo kudekei karoku mboto rapatesi rapalabu ntona sabana pomparasayaku i Yesus, tapi ane ledo kupotove tona ntanina, pura-pura anu nidekeiku ledo ntoto naria gunana.

Galatia 5:6

Ane nosangu rara ante i Yesus Kristus kita, ledo ria gunana kita nisuna atau ledo nisuna. Aga nomparasaya i Kristus noguna. Bo ane kita mpuu-mpuu nomparasaya, rapotoveta roata.