Lukas 1:46 - Kaili Ledo

⁴⁶ Nanguli i Maria, “Ante raraku mpuu kutoiya Tupu,

Lukas 1:46 Iomraidhean Croise

Roma 5:11

Bo ledo aga haitu. Nadamba rarata sabana posangu rarata nte Alatala, anu nirasaita sabana anu nipovia nTuputa Yesus Kristus. Apa lako nte i Yesus Kristus kita nipoposinggabelo nte Alatala.

1 Korintus 1:31

Jadi evamo nitulisi riara Buku Gasa, “Isema-sema madota mantoiya bara nuapa, aginapa ia mantoiya anu nipovia nTupu!” Yeremia 9:24

2 Korintus 2:14

Yaku nosukuru nte Alatala! Ia batena nanggeniaka kami nosanggani-nggani nte Ia bo nitulungiNa kami najadi padagi sabana kami nosangu rara ante i Kristus. NitulungiNa kami nompatolele Kareba Belo i Kristus ri umba-umba ala pura-pura tona mangepena bo mosisani nte Alatala. Bo Kareba haitu nasimbayu mpo soa navangi nasilele nienga ri umba-umba.

Filipi 3:3

Kakanana, kitamo anu nanoa ri panggita nu Alatala, ledo ira, apa kita nombasomba Alatala ante pekeniaka Nosa GasaNa. Kita nadamba sabana kita nosangu rara nte i Yesus Kristus, bo ledo nisarumakata pompasimbukuta mboto atau tonuapa kita, ala majadi manoa ri panggita nu Alatala.

Filipi 4:4

Sampesuvu pura-pura, kadambamo raramiu sabana komiu nosangu rara ante i Pue Yesus. Sangganipa kuuli ka komiu, kadambamo raramiu!

1 Tesalonika 5:23

Kuperapi nte Alatala, topombadekei katuvua nabelo ka kita, ala Ia mboto mompakagasa katuvumiu sampe komiu mpuu-mpuu matuvu mpo todeaNa nagasa. Kuperapi Alatala mombajagai karomiu, rara ntaimiu, bo pekirimiu sampe ledo ntoto maria nuapa-nuapa rasalai tempo Tuputa Yesus Kristus makava mpanjili.

1 Petrus 1:8

Nau ledo nikitamiu Ia bara ipia, komiu nompotove Ia. Bo nau ledo nikitamiu Ia sii-sii, tapi komiu batena nomparasaya Ia. Bo kadamba raramiu naoge mpuu sampe ledo rapakule mombasovadakana.