Kolose 1:12 - Kaili Ledo

¹² Kami nerapi ala raramiu batena madamba manguli tarima kasi ka Tuamata Alatala, apa Iamo nompakasipato komiu manggava bagia lako ri anu nipakasadiaNa ka pura-pura todeaNa riara PoparentaNa nareme.

Kolose 1:12 Iomraidhean Croise

Matius 25:34

Bo Kuuli ka ira ri sabingga ngganaKu ivei: ‘Kamaimo komiu nipobelo nTuamaKu. Pesuamo riara KamagauaKu, naria ponturo ri sii nipakasadia ka komiu lako ri lamba pamulana.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Yohanes 20:17

Nanguli i Yesus ka ia, “Nee rakabe Yaku, apa Yaku dopa neore hau nte TuamaKu. Tapi koimo hau nte sampesuvu-sampesuvuKu bo uli ka ira ivei: ‘Yaku hau nte TuamaKu bo Tuamamiu, haitumo Alatala nisombaKu bo nisombamiu.’ ”

Yohanes 4:23

Tapi makava tempona bara maipia, bo kakanana tempo haitu nariamo, tona anu mpuu-mpuu mombasomba Tuamata Alatala kana mombasomba Ia ante petulungi nu Nosa GasaNa nangoseaka pepatuduki nakana. Pesomba ivehaitu nipokono nu Alatala.

Suro-Suro 20:32

Jadi sampesuvu-sampesuvuku, hitupa yaku nekakai nte Alatala nerapi Iamo mombajagai komiu. Bo kuuli ka komiu, oseakamo tesa nu Alatala anu nompopaisani kabelo nu Alatala ka kita. Aga Iamo nakuasa mompakaroso pomparasayamiu bo mombadekei belo ka komiu, haitumo belo nipakasadiaNa ka tona nipelisiNa majadi todeaNa.

Suro-Suro 26:18

Kutudu iko hau mombabuka matara, ala ira domo matuvu ri kalandana tapi matuvu riara reme nu Alatala, ala ira rakabasaka lako ri kuasa Magau nu Seta bo matundu nte Alatala. Bo dosa-dosara raampungi bo ira majadi todea nu Alatala anu nipelisiNa, sabana pomparasayara Yaku.’ ”

Roma 11:17

ToYahudi namala nirapaka kayu zaitun nipiara nu Alatala. Bo sanu tingguna nikotosi nu Alatala. Komiu tona ledo toYahudi anu nomparasaya i Yesus, nirapaka tinggu-tinggu lako ri kayu zaitun anu ledo nipiara. Tinggu-tinggu haitu niala nu Alatala bo nipatakaNa ri bela ntinggu nikotoNa pangane ala tinggu-tinggu nabaru haitu matuvu bo movua lako ri kayu nipiaraNa. Ivesiamo komiu nantarima belo lako nte Alatala, nasimbayu mpo belo nitarima ntoYahudi nggaulu.

Roma 15:27

Niara haitu nipoviara lako ri dotara mboto, ledo nipasuu. Tapi kakanana, masipato muni ira mantulungi roara toYahudi sampomparasaya. Apa lako ri toYahudi sampe tesa nu Alatala nikeni ka tona ledo toYahudi. Jadi masipato mpuu tona ledo toYahudi mantulungi toYahudi ante mbara-mbara lako ri dunia hitu.

Roma 8:17

Bo ane kita mpuu-mpuu ana-ana nu Alatala, natantumo kita mantarima belo nipakasadia nu Alatala ka ana-anaNa. Kita muni mantarima pura-pura anu nipakasadia nu Alatala ka i Kristus, sabana ane kita nombarasai kasusa bo kapari mpo anu nirasaiNa, kita muni rapakaoge nasimbayu mpo Ia.

Roma 9:23

Ia nosabara nte ira ala mompopakita kambaso nu kaogeNa ka kita anu nipoasiNa bo nipasadiaNa mami lako ri nggauluname manggava bagia ri kaogeNa.

1 Korintus 8:6

Tapi ane kita topomparasaya, nisanita aga saito Alatala nakana. Iamo Tuamata anu nompajadi pura-pura anu naria ri dunia. Iamo nombadekei katuvu ka kita ala kita mombasomba Ia. Bo aga saito Tuputa, i Yesus Kristus anu nipopale nu Alatala nompajadi pura-pura anu naria, bo lako nte Ia sampe natuvu kita.

1 Korintus 9:23

Haitu pura-pura nipoviaku ala madea mpuu tona momparasaya Kareba Belo bo ala yaku mboto manggava belo nijanji ri Kareba Belo haitu.

2 Korintus 11:14

Tapi kita ledo mahera manggita pokainggura haitu, sabana Magau nu Seta mboto nombabali karona ala rasarumaka ntona ia malaeka nanggeni reme.

2 Korintus 5:5

Alatala mbotomo nompakasadia kita mantarima karo nabaru, bo nidekeiNa ka kita Nosa GasaNa anu najadi panggangisita ala rasanita anu nijanjiNa haitu mpuu-mpuu majadi.

Efesus 1:11

Alatala novia mpengaya-ngaya nangoseaka patujuNa bo pobotusiNa mboto. Jadi, nangoseaka pobotusiNa lako ri lamba pamulana, Alatala nompelisi kita, apa patujuNa kita majadi todeaNa lako ri posangu rarata nte i Kristus.

Efesus 1:18

Kuperapi ala Ia mompakareme pekirimiu ala mpuu-mpuu rasanimiu kabelo anu nisarumakata lako nte Alatala anu nompokio kita majadi todeaNa. Kuperapi ala rasanimiu kabelo bo kaoge nu belo nipakasadia nu Alatala radekei ka todeaNa bara maipia.

Efesus 2:18

Jadi, kita pura-pura, toYahudi bo tona ledo toYahudi, namala mosinggava nte Tuamata Alatala riara posambayata sabana anu nipovia i Kristus. Kita mamala mosinggava nte Ia ante petulungi Nosa GasaNa sangu.

Efesus 3:6

Iveimo nia nipopaisaniNa: tona ledo toYahudi mantarima belo lako nte Alatala mosanggani-nggani ante toYahudi. Bo tona ledo toYahudi mosanggani-nggani nte toYahudi majadi sipa-sipa ri sangu karo, haitumo karo i Kristus. Bo ratarimara munimo pura-pura anu nijanji nu Alatala ka tona nosangu rara nte i Yesus Kristus. Pura-pura haitu ratarimara sabana niparasayara Kareba Belo.

Efesus 4:6

Aga saito Alatala, Tuamata pura-pura. Iamo nomparenta pura-pura, bo Iamo nompake kita pura-pura, bo Iamo nonturo riara ntaita pura-pura.

Efesus 5:11

Nee rapasialamiu pokainggu ntona anu da natuvu ri kalandana, apa pokainggura haitu ledo ntoto naria gunana. Tapi komiu kana batena mokainggu mabelo ala katuvumiu majadi reme ka ira bo rasanira pokainggura nadaa.

Efesus 5:20

Komiu kana masaro motarima kasi nte Tuamata Alatala ka pura-pura anu najadi. Ulimo tarima kasi ka Ia sabana komiu nosangu rara nte Tuputa Yesus Kristus.

Efesus 5:4

Ledo muni masipato komiu mosovadaka tesa-tesa nasuloka bara tesa-tesa ledo ria gunana bara kuvava-kuvava anu ledo masipato. Aginapa sumbamiu rapakemiu manguli tarima kasi ka Alatala.

Efesus 5:8

Komiu mboto natuvu ri kalandana bara ipia, tapi sii-sii komiu natuvu ri karemena sabana komiu nosangu rara ante i Pue. Jadi komiu kana matuvu ante pokainggu masipato ka tona anu natuvu ri karemena.

Kolose 2:2

Yaku nompasimbuku ala raramiu pura-pura rapakaroso bo komiu mosangu rara bo mosimpotove. Apa ane ivesia, pomparasayamiu mpuu-mpuu maroso bo komiu ledo molengga-lengga sabana nisanimiumo anu nakana. Jadi komiu mosisani belo nte i Kristus, Iamo poko nia nu Alatala, nia anu nitabuniaka lako ri nggauluname.

Kolose 3:15

I Kristus nompoposinggabelo kita. Jadi nee rapoviata anu mombagerosi posinggabelo haitu, sabana kita nipokio nu Alatala ala kita pura-pura matuvu mosinggabelo mpo sipa-sipa nu karo sangu. Bo nee menonto motarima kasi nte Alatala.

Kolose 3:17

Bo nuapa-nuapa rapoviata bara raulita, rapoviata bo raulita muni anu masipato ka topomparasaya i Pue Yesus. Bo raulita munimo tarima kasi ka Tuamata Alatala sabana anu nipovia i Yesus ka kita.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Ibrani 12:23

Bo komiu nantingayo todea topomparasaya Alatala. Ira nireke ana-ana lumbua nu Alatala bo sanga-sangara nitulisi riara buku nu Alatala ri suruga. Komiu nantingayo Alatala, Topotangara pura-pura manusia. Bo komiu nantingayo nyawa-nyawa ntona nanoa anu namatemo, anu najadi nagasa.

Ibrani 3:1

Jadi, sampesuvu-sampesuvuku anu nipelisi nu Alatala bo nipokioNa matuvu mabelo ri suruga. Pekirimo pakabelo-belo i Yesus hitu. Ia nisuro nu Alatala najadi Pakeni nTopanggeni Pesomba ri agama nioseakata.

Ibrani 3:14

Apa kita manggava bagia lako ri pura-pura anu naria nte i Kristus asaa anu niparasayata lako ri pamulana bate-batena raparasayata sampe ri kaupuna bo ledo molengga-lengga.

Yakobus 3:9

Ante tesata kita nombatoiya Tuamata Alatala, bo ante tesata muni kita nopindasi singgamanusiata anu nipajadi nu Alatala nangoseaka lenjeNa mboto!

1 Petrus 5:1

Naria muni anu kuuli ka komiu pakeni ntodea topomparasaya! Yaku nabia notulisi ka komiu sabana yaku muni pakeni ntopomparasaya, bo yaku mboto nanggita kasusa bo kapari nirasai i Kristus bara ipia. Bo ane i Kristus makava mpanjili bo mompopakita kuasaNa bo kaogeNa ka pura-pura manusia, yaku muni manggava bagia ri kuasaNa bo kaogeNa haitu. Jadi yaku mpuu-mpuu nerapi nte komiu

1 Yohanes 1:3

Anu nikita kami bo anu niepe kami, haitu munimo rapatolele kami ka komiu ala komiu mosangu rara nte kami. Bo kita pura mamala matuvu mosangu rara ante Tuamata Alatala bo AnaNa i Yesus Kristus.

Pompakita 21:23

Bo ngata haitu ledo paraluu reme nu eo bara reme nu bula, sabana reme lako nte Alatala nompakaremena, bo Ana Bimba najadi poindona.

Pompakita 22:14

Nabelo mpuumo tona notoposi pakeana sampe nagasa, apa iramo rapaloga mangande vua lako ri Kayu Katuvua. Iramo rapaloga mesua riara ngata haitu mangose bobaa.

Pompakita 22:5

Domo maria bongina. Tupu ngata haitu domo paraluu poindo bara reme nu eo mombavanta ira, sabana reme lako nte Alatala mbotomo mombavanta ira. Bo ira momparenta mpo magau sampe ri kasae-saena.