Ibrani 7:19 - Kaili Ledo

¹⁹ Batuana, Atura-atura agama ledo ntoto nompakule manggeni tona majadi manoa ri panggita nu Alatala. Tapi sii-sii naria sangaya dala nabelopa nipopaisani ka kita. Ane raoseakata dala hitu kita mamala mosisani belo nte Alatala.

Ibrani 7:19 Iomraidhean Croise

Yohanes 1:17

Lako nte Nabi Musa nitarimata Atura-atura agama. Tapi lako nte i Yesus Kristus sampe mpuu-mpuu nisanita Alatala bo toveNa ka kita.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Suro-Suro 13:39

Kita ledo namala rakabasaka lako ri dosata ane aga nangoseaka Atura-atura nipapola Nabi Musa. Tapi isema-sema nomparasaya i Yesus, rakabasaka lako ri pura-pura dosana bo majadi nanoa ri panggita nu Alatala.

Roma 5:2

Kita nomparasaya i Yesus, jadi nidekeiNa ka kita loga mombarasai kabelo rara nu Alatala bo sii-sii nirasaitamo riara nggatuvuta. Nadamba mpuu rarata sabana naroso panjarumakata rakavata bagia ri kaoge nu Alatala.

Roma 7:7

Niuliku pangane i Kristus nombakabasaka kita lako ri Atura agama. Jadi ane ivesia, nuapa raulita? Nadaa Atura agama? Tantu ledo! Atura-atura agama nabelo, sabana lako ri Atura haitu nisanita nuapa niuli dosa. Ane rapana ledo ria parenta nanguli <> ledo kusani kadaa nu dota anu naria riara ntaiku.

Roma 8:3

Atura agama ledo namala mombakabasaka kita lako ri kuasa dosa sabana kita manusia ledo nompakule mangoseaka Atura haitu. Tapi anu ledo namala nipovia nu Atura agama, namala nipovia nu Alatala. NituduNa AnaNa mboto tumai ri dunia, bo AnaNa najadi manusia ante karo nasimbayu mpo karo nu manusia nadosa ala Ia mombarasai pehuku nu Alatala ri karoNa sabana dosata. Bo ante pohuku karo i Yesus, Alatala nombadagi kuasa nu dosa riara ntaita.

Galatia 2:16

Tapi nau ivesia, nisani kami manusia nireke nanoa ri panggita nu Alatala ledo sabana nangoseaka Atura-atura agama, tapi sabana pomparasayara i Yesus Kristus. Jadi kami mboto nomparasaya i Yesus Kristus ala majadi manoa ri panggita nu Alatala. Kami najadi nanoa sabana pomparasaya kami i Kristus, ledo sabana nangoseaka Atura-atura agama! Apa ledo ria saitoa majadi manoa ri panggita nu Alatala sabana pangoseakana Atura-atura agama.

Galatia 3:21

Jadi nuapa batuana? Atura agama nositaliku ante pojanji nu Alatala? Tantu ledo. Ane rapana rapakuleta mangoseaka Atura agama sampe rakavata katuvua nabelo, tantu haitumo majadi dalata mompakanoa karota mboto ri panggita nu Alatala.

Galatia 3:24

Jadi Atura agama haitu nirapaka topopaa ngana anu nombajagai kita sampe makava i Yesus Kristus, ala kita majadi manoa ri panggita nu Alatala sabana pomparasayata i Kristus.

Efesus 3:12

Kita nomparasaya i Kristus bo kita nosangu rara ante Ia, jadi domo makaja rarata mosinggava nte Alatala riara posambayata, bo nisanita ratarimaNa.

Kolose 1:27

Apa dota nu Alatala ala rasani ntodeaNa kabelo bo kaoge niaNa ka pura-pura manusia. NiaNa haitumo: i Kristus natuvu riara ntaita, jadi nisanita kita mpuu-mpuu matuvu mabelo nte Alatala sampe ri kasae-saena.

1 Timotius 1:1

Timotius nipotoveku; iko mpuu-mpuu nirekeku anaku mboto sabana kita sampomparasaya: Sura hitu lako nte yaku Paulus, suro i Yesus Kristus. Yaku najadi suroNa nangoseaka parenta nu Alatala anu nompakasalama kita, bo nangoseaka parenta i Yesus Kristus anu nisarumakata. Kuperapi Tuamata Alatala bo Tuputa Yesus Kristus mompoasi iko bo mombadekei belo bo katinonto ka iko.

Ibrani 10:1

Atura-atura agama Yahudi aga gambara. Riara Atura-atura haitu dopa nisanita mpuu kabelo rakavata lako nte i Kristus. Aga vayona nikitata, ledo lenjena mpuu. Mpae-mpae tona nakava nanggeni pesomba nasimbayu rapesomba ka Alatala, nangoseaka Atura-atura haitu. Tapi pesomba-pesomba haitu ledo ntoto nompakule manggeni tona majadi nanoa ri panggita nu Alatala.

Ibrani 11:40

sabana naria nia nabelopa nipakasadia nu Alatala ka kita pura-pura. PatujuNa ala ira mompopea sampe kita pura-pura mosanggani-nggani rapajadi magasa bo ledo makura nuapa-nuapa.

Ibrani 11:6

Ledo ria saitoa namala rapodamba nu Alatala ane ledo ria pomparasayana. Apa isema-sema madota metupu nte Alatala, kana raparasayana naria Alatala. Bo kana raparasayana muni Alatala mombadekei belo ka tona nangelo Ia ante rara mpuu-mpuu.

Ibrani 3:6

Tapi i Kristus ledo aga potudua, Ia Ana nu Alatala mami anu natutu nompasiayu pura-pura todea nTuamaNa. Bo kitamo nireke todea nu Alatala asaa kita naroo nomparasaya bo ledo nolengga-lengga nanjarumaka i Yesus ante damba rara sampe ri kaupuna.

Ibrani 4:16

Sabana haitu, nee maeka. Kita kana mabia mosinggava nte Alatala riara posambayata apa Alatala nabelo raraNa bo nipotoveNa kita. Ane kita mekitulungi nte Ia, kita rapoasiNa bo ratulungiNa ri tempo niparaluuta.

Ibrani 6:18

Pojanji bo posumpaNa haitu ledo mabali. Alatala ledo ntoto nodava. PatujuNa nojanji ivesia ala kita anu nekisaliku nte Ia maroso rarata sampe kita maroo manjarumaka anu nijanjiNa haitu.

Ibrani 7:11

Tempo Alatala nombadekei Atura-atura agama ka toIsrael, nianggatakaNa tona lako ri valaa i Lewi majadi topanggeni pesomba anu momparenta todea mangoseaka Atura haitu. Tapi pokarajaa ntopanggeni pesomba haitu ledo nompakule mompakanoa manusia ri panggita nu Alatala. Jadi haitumo sampe paraluu raanggataka tona ntanina majadi topanggeni pesomba. Topanggeni pesomba haitu nasimbayu mpo i Melkisedek, bo domo mpo i Harun muli i Lewi anu najadi topanggeni pesomba ntoIsrael pamulana.

Ibrani 7:20

Nisanita i Yesus naogepa pade topanggeni pesomba lako ri valaa i Lewi sabana Alatala mboto nosumpa tempo i Yesus najadi topanggeni pesomba. Alatala ledo nosumpa tempo muli i Lewi nianggataka najadi topanggeni pesomba.

Ibrani 7:25

Jadi haitumo sampe Ia nompakule nompakasalama sampe ri kasae-saena tona nikeniNa natundu nte Alatala. Apa i Yesus batena natuvu nombasaliku ira ri ngayo nu Alatala.

Ibrani 8:6

Tapi i Yesus nanggava pokarajaa nanggeni pesomba anu nabelopa pade pokarajaa ntopanggeni pesomba ri dunia hitu anu nangoseaka Atura-atura agama nggaulu. Bo ivesia muni pojanji nabaru anu nipasiayuNa ri olo nu Alatala bo manusia nelabipa kabelona pade pojanji nokolu, sabana pojanji nabaru nipovia nangoseaka janji-janji tobelona.

Ibrani 9:9

Haitu muni naria batuana ka kita sii-sii, haitumo pedekei-pedekei bo pesomba-pesomba nipesomba ntona nangoseaka atura-atura pojanji nokolu, ledo nakuasa mompakagasa rara ntai ntopesomba ri panggita nu Alatala.

Yakobus 4:8

Pekitulungimo nte Alatala bo Alatala mpuu-mpuu mombatulungi komiu. Komiu topovia dosa, tumo movia dosa. Komiu toporompenga pekiri, pakasangumo pekirimiu mangoseaka Alatala.