Ibrani 6:6 - Kaili Ledo

⁶ Tapi ane rakabasakara pomparasayara naupa pura-pura haitu nirasaira, ledo ria dala manggeni ira majea mpanjili lako ri dosara. Apa ane ivesia rapoviara, nasimbayu mpo nipakura mpanjili i Pue Yesus ri kayu salib, bo nanjalai Ia ri ngayo ntodea.

Ibrani 6:6 Iomraidhean Croise

Matius 19:26

I Yesus nangganoto ira bo nanguli, “Ane aga lako ri pompakule manusia, natantu ledo ntoto maria saitoa rapakasalama. Tapi ane lako ri pompakule nu Alatala pura-pura mamala majadi.”

Lukas 11:48

Pokainggumiu nompakalanto komiu nasintuvu nte pokainggu ntotuamiu. Ira nompatesi nabi-nabi bo komiu nompakaramba dayora!

2 Timotius 2:25

Ia kana malusu rarana mompatuduki tona nangeva ia, mbelaka da mamala ira rakeni nu Alatala majea lako ri pokainggura nasala bo mangisani pepatuduki nakana.

Ibrani 10:26

Ane ratunggaita bate-batena movia dosa naliu nitarimata pepatuduki nakana, ledo ria pesomba mompakalali dosa haitu.

Ibrani 10:29

Ane ivesia pehuku ka tona nombasapuaka Atura agama, nemopa ka tona anu nompojejea Ana nu Alatala. Tona haitu nompandaente raa i Yesus, tano raa haitumo nompakaasa pojanji nu Alatala bo nompakalali dosana. Bo tona haitu muni nanjalai Nosa Gasa anu nompopaisani pepotove nu Alatala ka todeaNa.

Ibrani 12:2

Kita kana mangova mompetoto i Yesus, sabana Iamo nanggeni kita nomparasaya bo Iamo nompopompakule kita bate-batena momparasaya sampe ri kaupuna. I Yesus nombatidamaka kasusa bo kapari tempo nipaku ri kayu salib. Ri mata ntodea, namate ri kayu salib nepakaeya. Tapi ledo nipekirikaNa eyaNa, sabana nitoraNa kadamba nipakasadia ka Ia. Bo sii-sii Ia nonturo ri gadera magau ri panggana nu Alatala.

Ibrani 4:14

Jadi nariamo Pakeni nTopanggeni Pesomba anu naoge mpuu, Iamo i Yesus, Ana nu Alatala. Ia noliu ri langi bo nesua ri suruga ri ngayo nu Alatala ala mantulungi kita. Jadi kita kana maroo momparasaya bo nee menonto mangaku i Yesusmo Tuputa.

Ibrani 6:4

Sampesuvu-sampesuvu, toramo! Ledo ria dala manggeni tona majea mpanjili ane ratunggaira mombakabasaka pomparasayara. Apa bara ipia ira natuvu riara reme nu Alatala. Nitarimaramo belo lako ri suruga, bo nitarimara munimo Nosa Gasa nu Alatala.

2 Petrus 2:21

Aginapa ledo sanggania rasanira dala nakana, pade rasanira bo maupu sia aga rakabasakara parenta-parenta nu Alatala nipatolele ka ira.

1 Yohanes 5:16

Sampesuvu-sampesuvuku, ane rakitamiu roamiu sampomparasaya novia dosa anu ledo mompopogaa ia lako nte Alatala sampe ri kasae-saena, komiu kana mosambaya ka roamiu haitu. Posambayamo ala ia majea bo Alatala mombadekei ka ia katuvu mabelo sampe ri kasae-saena. Tona niuliku hitu, tona novia dosa anu ledo nompopogaa ia lako nte Alatala sampe ri kasae-saena. Naria muni dosa anu nompopogaa tona lako nte Alatala. Ledo paraluu raposambayakamiu tona novia dosa haitu.