Ibrani 6:4 - Kaili Ledo

⁴ Sampesuvu-sampesuvu, toramo! Ledo ria dala manggeni tona majea mpanjili ane ratunggaira mombakabasaka pomparasayara. Apa bara ipia ira natuvu riara reme nu Alatala. Nitarimaramo belo lako ri suruga, bo nitarimara munimo Nosa Gasa nu Alatala.

Ibrani 6:4 Iomraidhean Croise

Matius 12:45

Jadi seta haitu hau nompokio papitu seta ntanina anu nadaapa pade ia mboto. Bo nakavamo ira nesua nte tona haitu bo nonturo ri sia. Kaupuna katuvu ntona haitu tantu melabipa kadaana pade ri pamulana bara ipia. Ivesia muni anu majadi nte tona nadaa anu natuvu sii-sii sabana ira ledo nadota nomparasaya tesaKu.”

Matius 5:13

“Komiu nasimbayu eva gara ri dunia. Tapi ane gara mamolimo, domo mapaga mpanjili! Natantu gara haitu domo ria gunana, bo aga ratedaka bo rajeje-jeje ntona.

Yohanes 15:6

Tona ledo naroo nosangu rara nte Yaku kana ratedeaka nasimbayu mpo tinggu nu valaa ratedeaka sampe mangau. Tinggu-tinggu nangau haitu aga rapasiromu ratedeaka ri mata nu apu bo rapalabu.

Yohanes 3:27

Nesana i Yohanes, “Ledo makuya. Ledo ria saitoa manggava nuapa-nuapa ane ledo radekei nu Alatala ka ia.

Yohanes 4:10

Nesanamo i Yesus, “Ane musani anu nidekei nu Alatala bo ane musani isema Yaku anu nerapi uve inu lako nte iko, natantu muperapi muni lako nte Yaku bo Kudekei ka iko uve anu nombadekei katuvua mabelo.”

Yohanes 6:32

Nanguli i Yesus ka ira, “Pariaramo tesaKu, ledo i Musa bara ipia anu nombadekei kandea lako ri suruga ka komiu. Tapi TuamaKu anu mombadekei kandea mpuu lako ri suruga ka komiu.

Suro-Suro 10:45

ToYahudi anu nomparasaya i Yesus, anu nantuntuni i Petrus lako ri Yope, ira pura-pura nokumaa sabana Nosa Gasa nipopanau muni ka tona ledo toYahudi.

Suro-Suro 11:17

Sampesuvu-sampesuvuku, nalantomo Alatala nombadekei Nosa GasaNa ka tona ledo noagama Yahudi nasimbayu mpo nidekeiNa ka kita tempo kita nomparasaya i Pue Yesus Kristus. Jadi isema yaku sampe mamala kutagi Alatala ane Ia mboto madota mombadekei Nosa Gasa ka tona ledo noagama Yahudi?”

Suro-Suro 15:8

Bo Alatala anu nangisani isi rara ntai manusia, nantarima tona ledo toYahudi. Nisanita, sabana nidekeiNa Nosa GasaNa ka ira, nasimbayu mpo nidekeiNa ka kita muni.

Suro-Suro 8:20

Tapi nesana i Petrus, “Masurukavu mpuu iko bo doimu! Nisarumakamu kabaraka nidekei nu Alatala mamala raali ante doi?

Roma 1:11

Apa naoge mpuu raraku mosinggava nte komiu ala yaku mamala mombabagi pedekei nu Alatala ka komiu, haitumo Nosa Gasa anu mompakaroso pomparasayamiu.

2 Korintus 4:4

Ira ledo nomparasaya sabana Magau nu Seta anu nombakuasai dunia hitu nompakaburo pekirira ala ledo rakitara reme nu Kareba Belo. Kareba Belo haitu nompakalanto kaoge i Kristus anu nasimbayu ntoto ante Alatala.

2 Korintus 4:6

Tempo Alatala nompajadi dunia niuliNa, “Lako ri kalandana meumbamo reme!” Ivesia muni nipakaremeNa pekirita ala pekirita majadi manoto bo rasanita kaogeNa. ToIsrael nggaulu nanggita kaoge nu Alatala nenggila ri lenje i Musa. Ivesia muni rasanita kaoge nu Alatala ane raposisanita i Kristus.

Galatia 3:2

Aga sangaya madota kusani lako nte komiu. Komiu nantarima Nosa Gasa nu Alatala sabana nangoseaka Atura agama? Atau nangepe bo nomparasaya Kareba Belo i Kristus? Tantu nitarimamiu Nosa Gasa apa niepemiu bo niparasayamiu Kareba Belo.

Galatia 3:5

Alatala najoi raraNa nompopanau Nosa GasaNa ka komiu bo nipoviaNa kabaraka-kabaraka ri tatangamiu. Jadi berimba? NipoviaNa pura-pura haitu sabana komiu nangoseaka Atura agama? Tantu ledo! NipoviaNa pura-pura haitu sabana komiu nangepe bo nomparasaya Kareba Belo i Kristus!

Efesus 1:18

Kuperapi ala Ia mompakareme pekirimiu ala mpuu-mpuu rasanimiu kabelo anu nisarumakata lako nte Alatala anu nompokio kita majadi todeaNa. Kuperapi ala rasanimiu kabelo bo kaoge nu belo nipakasadia nu Alatala radekei ka todeaNa bara maipia.

Efesus 2:8

Lako ri pomparasayamiu i Kristus, komiu nipakasalama sabana kabelo rara nu Alatala. Haitu ledo asele pompasimbukumiu mboto tapi pedekei nu Alatala bayangi.

Efesus 3:7

Lako ri kabelo nu raraNa, Alatala nombadekei ka yaku pokarajaa nompatolele Kareba Belo. Bo lako ri kuasaNa anu nokarajaa riara ntaiku, nipopompakuleNa yaku mompapola pokarajaa haitu.

Efesus 4:7

Tapi nau nadea kasimbayuta, pompakule nidekei nu Alatala ka kita ledo nasimbayu, sabana kita saito-saito nidekeika pompakule mokarajaa ka i Kristus nangoseaka anu nipakatantuNa ka kita.

1 Timotius 4:14

Nee malinga mompake pompakule nidekei nu Nosa Gasa ka iko tempo tona nompasimbayu petevai lako nte Alatala ka iko bo pakeni ntopomparasaya nodika palera ri balenggamu.

2 Timotius 2:25

Ia kana malusu rarana mompatuduki tona nangeva ia, mbelaka da mamala ira rakeni nu Alatala majea lako ri pokainggura nasala bo mangisani pepatuduki nakana.

2 Timotius 4:14

I Aleksander, pande nu tambaga, nadea anu nadaa nipoviana ka yaku. Damo Tupu mombabalasi ia mosinggambela nte pokaingguna haitu.

Ibrani 10:32

Tapi sampesuvu-sampesuvu, toramo katuvumiu tempo bara ipia. Tempo komiu dako nantarima reme lako nte i Pue, nadea susa bo pari nirasaimiu. Tapi naupa ivesia, komiu batena nomparasaya.

Ibrani 2:4

Bo Alatala mboto nompakalanto kareba nipatolelera mpuu-mpuu nakana. Apa nipoviaNa mpengaya-ngaya kabaraka bo tanda nipokumaaka, bo nipaleleNa pompakule lako ri Nosa GasaNa nangoseaka dotaNa mboto.

1 Yohanes 5:16

Sampesuvu-sampesuvuku, ane rakitamiu roamiu sampomparasaya novia dosa anu ledo mompopogaa ia lako nte Alatala sampe ri kasae-saena, komiu kana mosambaya ka roamiu haitu. Posambayamo ala ia majea bo Alatala mombadekei ka ia katuvu mabelo sampe ri kasae-saena. Tona niuliku hitu, tona novia dosa anu ledo nompopogaa ia lako nte Alatala sampe ri kasae-saena. Naria muni dosa anu nompopogaa tona lako nte Alatala. Ledo paraluu raposambayakamiu tona novia dosa haitu.