Ibrani 2:3 - Kaili Ledo

³ Ane ivesia nte Atura nTupu, nemopa Kareba Belo anu nipatolele i Yesus! Kareba haitu nombatesaki carana kita mamala rapakasalama. Kareba haitu nelabipa kabelona pade Atura nipapola malaeka-malaekaNa nggaulu. Jadi ane ledo rapeilita kareba haitu, berimbamo kita makabasaka lako ri pehuku? Kareba haitu pamulana nipatolele i Pue Yesus mboto. Tona anu nangepe Ia nompakalanto ka kita, kareba haitu mpuu-mpuu nakana bo namala rasarumakata.

Ibrani 2:3 Iomraidhean Croise

Matius 23:33

Komiu tona nadaa bo muli ntona nadaa! Nisarumakamiu komiu ledo rapambela pehuku riara narakaa?

Matius 4:17

Lako ri tempo haitu nompamulamo i Yesus nompatolele ka tona ivei: “Kajeamo lako ri dosamiu, sabana naparamo tempona Alatala moparenta mpo Magau.”

Markus 1:14

Naliu i Yohanes Topediu nisuaraka riara ntarunggu, haumo i Yesus ri bagia Galilea mompatolele Kareba Belo lako nte Alatala.

Lukas 1:2

Nitulisira nangoseaka tesa nipatolele ka kita, haitumo tesa ntona nanggita kajadia haitu ante matara mboto lako ri pamulana.

Lukas 1:69

NidekeiNa ka kita saito Magau naroso anu mompakasalama kita. Magau haitu muli Magau Daud, anu natundu nte parenta nu Alatala nggaulu.

Lukas 24:19

Nekutana i Yesus, “Nuapa najadi?” Nesana ira, “Anu najadi nte i Yesus, toNazaret! Ia nabi nu Alatala. TesaNa bo poviaNa nakuasa mpuu ri panggita nu Alatala, bo muni ri panggita ntodea.

Yohanes 15:27

Bo komiu muni mompopaisani Yaku ka todea sabana komiu nosanggani-nggani ante Yaku lako ri pamula panggaviaKu ri dunia hitu.”

Suro-Suro 2:22

I Petrus nompakapola tesana ivei: “Sampesuvu-sampesuvuku toIsrael! Pariaramo tesaku hitu! Alatala nompopakita ka komiu pura-pura, Ia mpuu-mpuu nompelisi bo nantudu i Yesus toNazaret, sabana nidekeikaNa kuasa movia kabaraka bo tanda-tanda nipokumaaka. Nisanimiu mboto tesaku hitu nakana, sabana kajadia haitu pura-pura najadi ri tatangata.

Suro-Suro 4:12

I Petrus nompapola tesana, “Aga i Yesus namala mompakasalama manusia, sabana ri njumangu dunia ledo ria saitoa tona ntanina nipakakuasa nu Alatala mompakasalama manusia, aga i Yesus saitoNa.”

Roma 11:14

Apa nisarumakaku maria sanu sampesuvuku toYahudi masiriati manggita komiu, sampe ira muni mamala kukeni momparasaya i Yesus bo rapakasalama.

Roma 2:3

Tapi berimba komiu? Pokainggumiu nasimbayu nte pokainggura! Jadi nee rasarumakamiu Alatala mombahuku tona ntanina, tapi komiu ledo rahukuNa!

1 Korintus 1:21

Alatala napande mpuu, bo nipakatantuNa manusia ledo mamala mosisani ante Ia ane aga manjarumaka kapandera mboto. Tapi nibotusiNa mompakasalama isema-sema momparasaya Kareba Belo nipatolele kami. Tano mai tona ri dunia nanguli Kareba haitu aga tesa ntodoyo.

1 Tesalonika 5:3

Tempo tona ledo nomparasaya Alatala aga manguli, “Katuvuta ri dunia nabelo pura, ledo ria nuapa-nuapa rapokaekata.” Tapi ri tempo haitumo ledo rasani-sanira, sampesanika maropumo ira, masimbayu mpo dua nu mombine tempona moana. Ledo ntoto maria dala mombaleva pehuku.

1 Timotius 1:15

Naria tesa nanguli ivei: “I Yesus Kristus nakava ri dunia ala mompakasalama tona nadosa.” Tesa haitu nakana bo masipato ratarimata bo raparasayata mpuu. Bo yakumo nelabipa nadosa pade pura-pura tona ntanina.

Titus 2:11

Iko kana mompatuduki tona matuvu nte pokainggu nabelo, sabana lako ri kabelo rara nu Alatala, nibukaNamo dala ala pura-pura manusia mamala rapakasalama.

Ibrani 1:1

Tempo nggaulu, nadea ngganimo Alatala nompasimbayu tesaNa ante mpengaya-ngaya cara ka nabi-nabi anu nompapola tesaNa haitu ka totuata nggaulu.

Ibrani 1:14

Jadi, isema kakanana malaeka-malaeka nTupu? Ira pura-pura topotulungi Alatala anu nisuroNa mantulungi bo manggeniaka tona rapakasalamaNa.

Ibrani 1:2

Tapi ri tempo nggapuri hitu AnaNa mbotomo nompasimbayu tesaNa ka kita. AnaNa haitu nipopale nu Alatala nompajadi dunia, bo Alatala nompakatantu AnaNa haitumo masipato majadi tupuna pura-pura anu naria.

Ibrani 12:25

Jadi sampesuvu-sampesuvu, pakabelo-belo, nee sampe komiu ledo madota mangepe tesa niuli nu Alatala ka komiu. Apa isema-sema ledo nadota mangepe pepatora nu Alatala anu nipapola Nabi Musa ri dunia bara ipia, ira ledo rakabasaka lako ri pehuku nu Alatala. Nemopa kita anu nangepe Ia notesa lako ri suruga! Ane kita ledo madota mangepe Ia, natantumo kita muni ledo rakabasaka lako ri pehukuNa.

Ibrani 4:1

Sampesuvu-sampesuvu, da naria pojanji nu Alatala nombadekei loga ka kita menonto mosanggani-nggani ante Ia. Haitu sampe kita kana mainga ala nee maria saitoa kita maboli.

Ibrani 4:11

Sabana haitu, kita kana mompasimbuku ante rarata mpuu-mpuu ala kita mamala menonto mosanggani-nggani ante Alatala. Nee sampe maria tona ledo radekei mombarasai kabelo haitu sabana ledo nomparasaya, evamo najadi nte toIsrael nggaulu.

Ibrani 5:9

Naganapa pura-pura haitu nirasaiNa, Ia najadi puna katuvua nabelo sampe ri kasae-saena ka pura-pura tona matundu nte Ia.

Ibrani 9:28

Jadi ivesia muni i Kristus namate aga sanggani majadi pesomba pompakalali dosa ntodea. Naupu haitu Ia makava sangganipa, ledo mompakalali dosa, tapi mompakasalama tona nalentora nompopea kakavaNa.

1 Yohanes 1:1

Tesa nu Alatala anu nombadekei katuvua nabelo naria mamimo lako ri lamba pamulana, bo haitumo ratesa kami riara sura hitu. Ia niepe kami bo nikita kami mboto. Ia nisabiki kami bo Ia natuvu singgani nte kami.

Yudas 1:17

Sampesuvu-sampesuvu nipotoveku, toramo tesa niuli nu suro-suro nTuputa i Yesus Kristus bara ipia.

Pompakita 7:10

Bo nongaremo ira ante suara namangga, “Kamaimo kita mombatoiya bo mombabila Alatala anu nonturo ri Gadera Kamagaua! Kamaimo kita mombatoiya bo mombabila Ana Bimba, sabana Iramo nompakasalama kita!”