Ibrani 13:5 - Kaili Ledo

⁵ Nee mompotove doi gaga sampe komiu aga natuvu mangelo doi. Tapi kana maosa raramiu ante anu naria nte komiu. Apa Alatala mboto nanguli ivei: “Ledo ntoto Kupalaisi iko.”

Ibrani 13:5 Iomraidhean Croise

Matius 6:19

“Nee mompasiromu kakalumana dunia ka karomiu mboto. Apa kakalumana dunia namala rakande nu ane atau tagara, bo rapangangga ntona.

Matius 6:25

“Haitu sampe Kuuli ka komiu, nee makini raramiu mompekirika katuvumiu, bara nuapa rakandemiu atau rainumiu. Nee makini mompekirika baju nuapa rapasuamiu. Apa katuvuta nopokopa pade kandea bo karota nopokopa pade pakea.

Matius 6:34

Jadi nee masesa raramiu nompekirika bara nuapa majadi maile, sabana maile maria kasusana mboto. Naganamo kasusa eo hitu rapekirita nee ratambai anu majadi maile!”

Markus 7:22

mobualo, madoko ka mbara-mbara, movia anu nadaa, mebagiu, majampa, masiriati, mesalai, malanga rara, bo metidoyo.

Lukas 3:14

Naria muni tantara-tantara nakava nekutana nte i Yohanes, “Berimba nte kami? Nuapa masipato rapovia kami?” Nesana i Yohanes, “Tumo momparangga tona bo nee raagosimiu doina. Nee raelomiu nelabi lako ri gajimiu. Naganamo gajimiu.”

Lukas 8:14

Savua nanavu ranggarui, nirapaka tona nangepe Tesa nu Alatala bo niparasayana. Tapi ira aga nompekirika katuvura ri dunia, ira madota makalumana bo madota matuvu masana ri dunia. Pura-pura haitu nompakabago ira sampe ira ledo napola nangoseaka Tesa nu Alatala bo katuvura ledo naria gunana.

Roma 1:29

Mpengaya-ngaya pekiri nadaa bo natenggo rarara. Ledo naosa rarara ante anu naria nte ira, navau rarara, nasiriati, nepatesi, nebagiu, bo nosinggarau. Ira nomboli rau rara, nantunturaka tona

1 Korintus 6:10

Ivesia muni ante topangangga, tona ledo ria kabasa-basana manggava untu ka karona mboto, tona nanginu sampe nalangu, tona nanjalai-lai roa, bo topeago. Ira muni ledo ntoto manggava bagia riara Poparenta nu Alatala.

2 Korintus 4:9

Kami nipandasa ntona tapi kami ledo nipalaisi nu Alatala. Naupa kami nasaro niboba sampe nadungga tapi kami ledo namate.

Efesus 5:3

Komiu todea nu Alatala. Jadi ledo ntoto masipato komiu mosipogau ante tona ledo bereimiu mboto, atau mokainggu nabuga, atau mario mata bo ledo ria kabasa-basana. Nee sampe maria sabana raraika ntona komiu nokainggu ivehaitu.

Efesus 5:5

Toramo pakabelo-belo! Tona nosipogau nte tona ledo bereina mboto bo tona nokainggu nabuga ledo ntoto manggava bagia riara Poparenta nu Alatala bo i Kristus. Ivesia muni ante tona nario matana bo ledo ria kabasa-basana, sabana anu niporiona haitu najadi anu nisombana bo haitu nasimbayu kadaana nte topompakande tupu-tupu ntanina.

Kolose 3:5

Sabana haitu, kabasakamo pokainggu-pokainggu anu nopuna lako ri dunia nadaa hitu. Nee mosipogau ante tona ledo bereimiu mboto, nee movia pokainggu anu ledo masipato, nee mangoseaka dota raramiu nabuga bo dota-dota ntanina anu nadaa. Bo nee muni maoge rara manggava melabipa pade tona ntanina, sabana anu nipooge rarata haitumo najadi anu nisombata, bo haitu nasimbayu nte metupu nte tupu ntanina.

1 Timotius 3:3

Ia ledo tolangu, bo ledo toposibaga. Tapi ia kana nalusu rarana bo natuvu nosinggabelo. Ia ledo muni aga nadoko ka doi.

2 Petrus 2:14

Ira bate-batena naino mompogau sambara mombine nikitara. Ledo nabasa-basa ira novia dosa! Ira nombaopa tona ledo naroso pomparasayana ala movia dosa. Bo najadi kabiasara nario mata ante ledo ria kabasa-basana. Ira mpuu-mpuu tona nasurukavu!

2 Petrus 2:3

Guru-guru mpodava haitu nadoko doi. Haitu sampe ira aga mangelo untu lako nte komiu ante tesa-tesa ledo nakana, anu nikarara mboto. Tapi pehuku ka ira nasaemo nipakatantu. Ira rahuku nu Alatala bo tempona ledo rasoro-soro.

Yudas 1:11

Mandasa mpuu ira! Nipasialara katuvu i Kain nggaulu anu nasiriati bo navuu matana nte tueina. Nipasialara ntoto sala i Bileam anu nasadia movia nuapa-nuapa asaa manggava doi. Bo pangevara Alatala nasimbayu mpo peeva i Korah nggaulu, sampe ira muni masipato rahuku nu Alatala.