Ibrani 11:4 - Kaili Ledo

⁴ Lako ri pomparasaya i Habel, pesomba nikenina ka Alatala nabelopa pade pesomba nikeni ntuakana i Kain. Lako ri pomparasayana haitu, i Habel nitarima nu Alatala mpo tona nanoa apa nalantomo pesombana nipodamba nu Alatala. Bo nau namatemo ia, da nariapa tesana bo jonjo pomparasayana.

Ibrani 11:4 Iomraidhean Croise

Matius 23:35

Haitumo sampe komiu natuvu sii-sii mombatanggu pura-pura raa ntonoa nipatesi, nompamula lako ri pompatesi i Habel anu ledo nasala, sampe pompatesi i Zakharia, ana i Berekia. Ia nipatesi ntotuamiu ri olo Banua nu Alatala bo lanta pesomba.

Lukas 11:51

Nompamula lako ri pompatesi i Habel sampe ri pompatesi i Zakharia anu najadi ri doyata Banua nu Alatala ri olo nu lanta pesomba bo Banua nu Alatala. Parasayamo! Komiu natuvu sii-sii mpuu-mpuu rahuku sabana pokainggu ntotuamiu!

Titus 1:16

Pangulira ira nosisani ante Alatala, tapi pokainggura ledo nosinggambela nte tesara. Pokainggura aga nompakarunggu rara nu Alatala, bo ira ledo nadota natundu nte Alatala. Ledo nipakulera nokainggu nabelo.

Ibrani 11:2

Lako ri pomparasaya ntona nggaulu, ira nipodamba nu Alatala.

Ibrani 12:1

Jadi namala raulita, pura-pura ira pangane nombatiku kita bo nompakaroso rarata ante posabira. Sabana haitu, kita muni kana mombatedaka pura-pura anu nompopekai rarata bo dosa anu nekantaka nte kita. Kita kana maroo rarata mangoseaka dala nipakatantu nu Alatala ka kita, nasimbayu mpo topangova ri posilumba.

Ibrani 12:24

Bo komiu muni nantingayo i Yesus, Topetariolo anu nompasiayu pojanji nabaru haitu. Bo komiu nantingayo raa nipatiti i Yesus anu nabelopa pade raa i Habel.

Ibrani 5:1

Pura-pura Pakeni nTopanggeni Pesomba nipelisi lako nte todea bo nianggataka manjambei todea mantingayo Alatala. Pokarajaara haitu, manggeni pedekei-pedekei ka Alatala bo pesomba-pesomba anu majadi posompo dosa.

Ibrani 9:22

Kakanana, nangoseaka Atura-atura agama Yahudi sakidepa pura-pura anu naria nipakagasa ante raa. Bo ane ledo ria katiti nu raa, dosa ledo namala raampungi.

2 Petrus 2:8

Apa i Lot haitu tona nabelo. Ia nonturo ri tatangara bo eo-eo nikitana bo niepena poviara nadaa sampe nasusa mpuumo rarana.

Yudas 1:11

Mandasa mpuu ira! Nipasialara katuvu i Kain nggaulu anu nasiriati bo navuu matana nte tueina. Nipasialara ntoto sala i Bileam anu nasadia movia nuapa-nuapa asaa manggava doi. Bo pangevara Alatala nasimbayu mpo peeva i Korah nggaulu, sampe ira muni masipato rahuku nu Alatala.