Ibrani 1:3 - Kaili Ledo

³ AnaNa haitu nompopakita kuasa bo kaoge nu Alatala, bo Ia nasimbayu nte Alatala. Iamo nombakuasai bo nompiara mpengaya-ngaya ri dunia ante tesaNa nakuasa. Naupu Ia nombakabasaka manusia lako ri dosa, Ia nonturo ri ponturo magau ri suruga ri panggana nu Alatala toNeliu KaogeNa.

Ibrani 1:3 Iomraidhean Croise

Matius 22:24

Nipekutanara nte i Yesus, “Guru, Nabi Musa nompatuduki ivei: Ane maria langgai namate ledo noana, sampesuvuna langgai kana mompoberei timbalana haitu ala moana bo ana haitu rareke muli nu sampesuvuna anu namate.

Markus 16:19

Naupu i Yesus notesa ivesia ka ira, neoremo Ia hau ri suruga bo nonturo ri sabingga nggana nu Alatala.

Yohanes 1:14

Ia anu niuli Tesa nu Alatala haitu najadi manusia bo nonturo ri tatanga kami ri dunia hitu. Bo nikita kami kuasaNa bo kaogeNa, haitumo kuasa bo kaoge nitarimaNa lako nte TuamaNa apa Ia AnaNa saito-itoNa. Iamo sampe nisanita mpuu Alatala bo toveNa ka kita.

Yohanes 1:29

Eo kamailena i Yohanes nanggita i Yesus nakava tumai nanggaparai ia, bo niulina ka tona hamai, “Peintamo! Tumaimo Ana Bimba nipakasadia nu Alatala anu mompakalali dosa manusia!

Yohanes 1:4

Iamo puna katuvua nabelo, bo katuvua nabelo nompakareme pekiri nu manusia.

Suro-Suro 2:33

Ia nianggataka nu Alatala bo nipoponturo ri ponturo nibila ri sabingga nggana nu Alatala ri suruga. Bo nitarimaNa Nosa Gasa nijanji nTuamaNa, Alatala. Jadi sampesuvu-sampesuvu, pangane nikitamiu bo niepemiu kami notesa nte mpengaya basa. Haitu najadi sabana kuasa Nosa Gasa anu nipopanau i Yesus ka kami.

Suro-Suro 7:56

Nanguli i Stefanus, “Peintamo! Nikitaku langi natebuka bo i Yesus, Ana nu Manusia neangga ri sabingga nggana nu Alatala ri suruga!”

Roma 1:16

Ledo naeya mataku nompatolele Kareba Belo. Apa Kareba Belo haitu pareva nu Alatala mompakasalama pura-pura tona anu nomparasaya i Yesus, pamula-mulana toYahudi, bo muni tona ledo toYahudi.

Roma 8:34

Isema mabia mompakasala kita? Ledo ntoto ria, sabana i Kristus namate mantolosi dosata. Bo ledo aga haitu, Ia nipakatuvu mpanjili bo nonturo ri panggana nu Alatala ri suruga, bo Iamo nanjaliku kita ri ngayo nu Alatala.

2 Korintus 4:4

Ira ledo nomparasaya sabana Magau nu Seta anu nombakuasai dunia hitu nompakaburo pekirira ala ledo rakitara reme nu Kareba Belo. Kareba Belo haitu nompakalanto kaoge i Kristus anu nasimbayu ntoto ante Alatala.

Kolose 3:1

Namala raulita kita topomparasaya i Kristus nipakatuvu mpanjili nosanggani nte Ia, sabana Alatala nombadekei katuvu nabaru ka kita. Jadi, pasimbukumo manggava anu nipasadia nu Alatala ka kita ri suruga, apa hamai i Kristus nonturo ri panggana nu Alatala.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Ibrani 1:13

Bo ledo ria sanggania Alatala nanguli ka malaekaNa mpo niuliNa ka AnaNa ivei: “Ponturomo ri sabingga ngganaKu sampe Kupopekou pura-pura baliMu nte Iko.” Mazmur 110:1

Ibrani 10:12

Tapi aga sangu pesomba nikeni i Kristus, haitumo karoNa mboto nidekeiNa rapatesi majadi pesomba posompo dosa. Bo pesombaNa haitu nompakule mompakalali dosa sampe ri kasae-saena. Naupu nanggeni pesomba haitu, Ia nonturo ri panggana nu Alatala.

Ibrani 12:2

Kita kana mangova mompetoto i Yesus, sabana Iamo nanggeni kita nomparasaya bo Iamo nompopompakule kita bate-batena momparasaya sampe ri kaupuna. I Yesus nombatidamaka kasusa bo kapari tempo nipaku ri kayu salib. Ri mata ntodea, namate ri kayu salib nepakaeya. Tapi ledo nipekirikaNa eyaNa, sabana nitoraNa kadamba nipakasadia ka Ia. Bo sii-sii Ia nonturo ri gadera magau ri panggana nu Alatala.

Ibrani 4:14

Jadi nariamo Pakeni nTopanggeni Pesomba anu naoge mpuu, Iamo i Yesus, Ana nu Alatala. Ia noliu ri langi bo nesua ri suruga ri ngayo nu Alatala ala mantulungi kita. Jadi kita kana maroo momparasaya bo nee menonto mangaku i Yesusmo Tuputa.

Ibrani 7:27

Ia ledo nasimbayu ante Pakeni nTopanggeni Pesomba ntanina. Eo-eo nikenira ntani ruru pesomba posompo ka dosara mboto, pade namala nikenira pesomba posompo ka dosa ntodea. Tapi i Yesus nanggeni pesomba aga sanggani tempo nidekeiNa karoNa mboto rapatesi mantolo dosa manusia. Pesomba haitu ledo paraluu rasili sampe ri kasae-saena.

Ibrani 8:1

Patuju ntesaku pangane ivei: Naria mamimo Pakeni nTopanggeni Pesomba ivehaitu nte kita. Ia nonturo ri suruga ri panggana nu Alatala anu Neliu KaogeNa.

Ibrani 9:16

Ane maria sura pojanji pobagi kakalumana, natantumo kakalumana dopa namala rabagi ane topovia sura dopa namate.

Ibrani 9:26

Apa ane rapana mpenggani-nggani Ia mesua, batuana mpenggani-nggani muni Ia kana mombarasai kasusa bo kapari nompamula lako ri lamba pamulana. Tapi kakanana, ri tempo sii-sii anu napara kaupu dunia Ia nakava aga sanggani nompakalali dosata ante nombadekei karoNa mboto nipatesi.

1 Petrus 1:21

Iamo sampe komiu nomparasaya Alatala. Alatala nompakatuvu mpanjili Ia lako ri kamateNa bo nombadekei kuasa bo kaoge nipokumaaka ka Ia. Jadi haitumo sampe komiu nomparasaya bo nanjarumaka Alatala.

1 Petrus 3:22

Bo i Yesus neore hau ri suruga bo sii-sii nonturo ri ponturo nibila ri panggana nu Alatala bo nomparenta nosanggani-nggani nte Ia. Bo pura-pura malaeka bo topoparenta bo tonakuasa ri laerava natundu nte Ia.

2 Petrus 1:16

Kami nompatuduki ka komiu kuasa nTuputa Yesus Kristus bo kakavaNa mpanjili ri dunia hitu. Pepatuduki kami haitu ledo nangoseaka patesa-patesa nipovia nu manusia. Tapi kami mboto nanggita kaogeNa anu nipokumaaka.

2 Petrus 1:17

Apa kami mboto naria nosanggani-nggani nte Ia ri bavo nu bulu bara ipia tempo Ia nibila bo nipakareme nTuamata Alatala. Bo suara nu Alatala anu Neliu KaogeNa nanguli ivei: “Hitumo AnaKu nipotoveKu, Iamo nompakadamba raraKu.”

1 Yohanes 1:7

Tapi ane kita natuvu riara reme nasimbayu mpo Alatala naria riara nu reme, kita natuvu nosangu rara nte roa, bo Alatala mombalelaka pura-pura dosata sabana raa nu AnaNa i Yesus anu namate ala dosata mamala raampungi.

1 Yohanes 3:5

Nisanimiumo patuju i Yesus nakava ri dunia ala Ia mompakalali pura-pura dosa manusia. Bo nisanimiu muni Ia mboto ledo ntoto nadosa.

Yudas 1:25

Aga Ia saito-itoNa Alatala. Iamo nompakasalama kita sabana anu nipovia nTuputa Yesus Kristus. Jadi ratoiyatamo Ia, apa Iamo Alatala anu nelabi kaogeNa, Magau nipokumaaka. Iamo nabaraka bo nakuasa lako ri lamba pamulana, sampe sii-sii, bo sampe ri kasae-saena! Amin! Tabe lako nte yaku, Yudas

Pompakita 3:21

Isema-sema padagi, ia Kupaloga monturo moparenta mosanggani nte Yaku ri Gadera KamagauaKu, nasimbayu mpo Yaku muni najadi padagi bo sii-sii nonturo bo noparenta nosanggani-nggani nte TuamaKu ri GaderaNa.

Pompakita 4:11

“O, Alatala, Tupu kami, aga Komiu masipato ratoiya bo rabila kami. Aga Komiumo nakuasa, Komiumo nompajadi pura-pura anu naria. Bo lako ri dotaMiu mboto sampe pura-pura haitu nipajadi bo naria.”