Filipi 4:8 - Kaili Ledo

⁸ Kaupuna, sampesuvu-sampesuvu, tanondoakamo anu nakana, anu nanoa, bo anu masipato rapakaoge. Pekirikamo anu nagasa, anu nagaya, bo anu nabelo raepe ntona. Tanondoakamo anu mpuu-mpuu nabelo, bo anu masipato ratoiya.

Filipi 4:8 Iomraidhean Croise

Matius 22:16

Nitudura bara sako-ndua ana-anagurura bo bara sako-ndua tona nosabingga nte Magau Herodes hau nte i Yesus bo manguli ivei: “Guru, nisani kamimo Komiu tona nanoa. Komiu nompatuduki pakalanto dota nu Alatala ka manusia. Komiu ledo naeka ante isema-sema sabana Komiu ledo nompelenje.

Markus 6:20

sabana Magau Herodes naeka rarana nte i Yohanes. Nisanina i Yohanes tona nanoa bo nagasa rarana. Jadi nisalikuna i Yohanes bo ledo nidekeina rapatesi. Ane niepena tesa i Yohanes, domo nasilonga pekirina, tapi nasana muni rarana nangepe tesana.

Lukas 16:15

Tapi i Yesus nanguli ka ira, “Ri ngayo ntona ntanina, komiu nikita nabelo, tapi nisani nu Alatalamo pura-pura isi rara ntaimiu. Anu nabelo ntoto ri panggita manusia, haitumo nipovuu mata nu Alatala.

Lukas 2:25

Tempo haitu ri ngata Yerusalem naria langgai nosanga i Simeon. Ia tona nanoa, anu natundu nte parenta nu Alatala bo nantongoraka tempona Alatala mompakasalama todea toIsrael. Nosa Gasa nu Alatala naria nte ia.

Lukas 23:50

Naria langgai nosanga i Yusuf, lako ri ngata Arimatea ri bagia Yudea. Ia tona nabelo bo pokaingguna nanoa. Ia nantongoraka tempona Alatala moparenta mpo Magau. Ia saito lako ri Polibu Mbaso Agama Yahudi tapi ledo nasituju ia ante potangara bo poviara nompatesi i Yesus.

Yohanes 7:18

Isema-sema nompatuduki lako ri pangisanina mboto, ia mbeki ratoiya ntona. Tapi isema-sema ledo nompekirika karona mboto tapi nompasimbuku ala topantudu ia haitu ratoiya, iamo nanoa, ledo ria tenggona.

Suro-Suro 10:22

Niulira, “Kami hii nitudu Kapten Kornelius tumai. Nau ia ledo toYahudi, ia tona nanoa bo ia natundu nte Alatala bo pura-pura toYahudi nombabila ia. Naria malaeka nu Alatala nantudu ia mompokio komiu hau ri banuana ala raepena anu raulimiu ka ia.”

Suro-Suro 22:12

Ri Damsyik naria tona nosanga i Ananias. Ia tona nanoa bo natutu nangoseaka Atura-atura agama anu nipapola Nabi Musa. Pura-pura toYahudi nonturo ri ngata Damsyik mpuu-mpuu nombabila ia.

Suro-Suro 6:3

Jadi aginapa rapelisimiu papitu tona lako nte komiu mboto radekeika bago haitu. Pelisimo tona nabelo sangana, nanoto, bo nikuasai Nosa Gasa nu Alatala, bo pura-pura bago haitu radekei kami ka ira.

Roma 13:13

Kita kana matuvu ante pokainggu masipato ka tona natuvu riara karemena. Nee masiromu mangande mompebasa bo manginu sampe malangu. Nee mosipogau ante tona ledo bereimiu mboto bo nee mangoseaka dota raramiu nadaa. Nee mosinggarau atau masiriati.

Roma 13:3

Apa tona nokainggu nabelo ledo paraluu maeka ka pomarenta. Aga tona nokainggu nadaa masipato maeka ka pomarenta. Jadi ane ledo madota kita matuvu maeka nte pomarenta, kita kana movia anu nabelo, bo kita ratoiya ntopeparenta.

Roma 14:18

Ane ivesia pangoseakata i Kristus, kita mompakadamba rara nu Alatala, bo roata muni mombabila kita.

Roma 2:29

Tapi toYahudi anu mpuu-mpuu todea nu Alatala, haitumo tona mpuu-mpuu rarana nangoseaka Alatala. Bo tona mpuu-mpuu nisuna, nisuna riara ntaira. Batuana, ira najadi todea nu Alatala sabana pokarajaa Nosa Gasa nu Alatala riara ntaira, ledo sabana pangoseakara atura-atura nitulisi. Tona ivehaitu ratoiya nu Alatala, nau ledo nitoiya nu manusia.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

2 Korintus 13:7

Kami nosambaya nerapi nte Alatala ala komiu nee movia dosa. Patuju kami nosambaya ivesia, ledo mompopakita kami hitu mpuu-mpuu suro i Kristus. Tapi patuju kami ala komiu batena movia anu nabelo. Jadi nau sanu tona ri situ da nombareke kami ledo suro i Kristus, ledo makuya, asaa komiu movia anu nabelo!

2 Korintus 6:8

Sanu tona nombabila kami, tapi sanu nanjalai kami. Sanu tona nantoiya kami tapi sanu nantunturaka kami. Nau kami nanoa, niuli ntona topebagiu.

2 Korintus 8:18

Bo nitudu kami muni saito sampesuvuta ntanina momporoa i Titus riara polipana tou nte komiu. Sampesuvuta haitu mpuu-mpuu nibila ntopomparasaya sabana pokarajaana nompatolele Kareba Belo.

2 Korintus 8:21

Apa kami madota movia anu nanoa ri panggita nu Alatala, bo muni ri panggita nu manusia.

Galatia 5:22

Tapi ane tona nikeniaka Nosa Gasa nu Alatala, iveimo inggura: ira nosimpotove, ira nadamba bo natinonto rarara. Ira nosabara, nalusu bo nabelo rarara nte tona ntanina. Ira namala raparasaya,

Efesus 4:25

Sampesuvu pura-pura, kita nipatuduki mokainggu manoa bo magasa, jadi tumo modava! Kita kana motesa makana ka sampesuvuta sampomparasaya apa kita pura-pura sipa nu karo i Kristus.

Efesus 5:9

Apa inggu ntona anu natuvu ri karemena nabelo bo nanoa bo ia namala raparasaya.

Efesus 6:14

Jadi, komiu kana masadia mombatidamaka peeva balimiu! Komiu kana matutu mangoseaka pepatuduki nakana. Haitumo sulepemiu. Komiu kana mokainggu manoa. Haitumo baju asemiu anu nombalenduti karomiu.

Filipi 3:1

Sampesuvu-sampesuvu, kapolana, komiu kana madamba sabana komiu nosangu rara ante i Pue Yesus. Ledo nalenge yaku nombasili anu nitulisiku ka komiu bara ipia, sabana yaku madota mompainga komiu ala komiu ledo rabagiu ntona anu nanggeni pepatuduki nasala.

Kolose 4:5

Komiu kana mokainggu manoto ante tona dopa nomparasaya i Kristus. Pakemo pura-pura loga naria mompopaisani i Kristus ka ira.

1 Tesalonika 4:12

Ane komiu matuvu ivesia, komiu rabila ntona anu ledo nomparasaya i Kristus, bo komiu ledo motimbaloe nte tona ntanina.

1 Timotius 2:2

Posambayaka muni magau-magau bo pura-pura tona anu nidekeika kuasa momparenta, ala kita mamala matuvu masiayu bo matinonto, bo ala kita maloga metupu nte Alatala bo mokainggu mabelo, anu masipato rabila ntona.

1 Timotius 3:11

Ivesia muni bereina kana mombine nabelo pokaingguna, ledo topetunturaka. Bo ia muni kana matau mantaamaka dota rarana mboto bo mokainggu nanoa sampe namala raparasaya riara mpengaya-ngaya.

1 Timotius 3:4

Ia kana matau mompasiayu tona ri banuana mboto ante mabelo bo mompatuduki anana mboto matundu nte ia bo mombabila ia.

1 Timotius 4:12

Nee mupalamba tona mompandaente iko sabana iko da namuda. Tapi iko kana majadi jonjo ka topomparasaya riara tesamu, pokainggumu, pepotovemu ka roa, pomparasayamu nte i Pue, bo kagasa katuvumu.

1 Timotius 5:10

Bo nisani ntonamo pokaingguna nabelo. Jonjona: nipakambasona pakabelo anana, nadamba rarana nantarima torata riara banuana, nijampangina topomparasaya, nitulungina tona nasusa, bo ia nabiasamo novia mpengaya-ngaya anu nabelo.

1 Timotius 5:2

Popatoramo mombine natuakapa pade iko nasimbayu mpo tinamu mboto. Popatoramo mombine namuda nasimbayu mpo pompatudukimu ka tueimu mboto, bo pakabelo ala pokainggumu bo pekirimu masipato.

Titus 1:8

Tona raanggataka majadi pakeni ntopomparasaya kana majoi rarana mantarima torata riara banuana, bo nompokono anu nabelo. Ia kana nanoto, nanoa, bo nagasa katuvuna, bo kana rapakulena mombatidamaka dota nu rarana mboto.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Titus 2:2

Ulimo ka totua-totua langgai ira kana mombakuasai karora mboto. Ira kana manoto bo matuvu nte pokainggu masipato ratoiya. Ira kana matutu mangoseaka pepatuduki nakana, ira kana mpuu-mpuu mompotove tona ntanina, bo mombatidamaka riara kasusa.

Titus 3:14

Sampesuvuta sampomparasaya kana masaro movia anu nabelo, ala mamala mombatulungi tona napepa. Nee sampe katuvura ledo maria gunana.

Ibrani 11:2

Lako ri pomparasaya ntona nggaulu, ira nipodamba nu Alatala.

Ibrani 13:18

Sampesuvu-sampesuvu, posambayakamo kami. Nisani kami, rara ntai kami nagasa apa kami batena madota mokainggu nabelo riara mpengaya-ngaya.

Yakobus 1:27

Tapi poagama nakana, anu ledo rasalai nTuamata Alatala, haitumo nantulungi ngana-ngana pailu bo timbala-timbala nasusa, bo nombajagai karo mboto ala ledo mangoseaka pokainggu nadaa nipovia ntona anu ledo nosisani nte Alatala.

Yakobus 3:17

Tona naria noto pompekirina anu nopuna lako nte Alatala, iamo tona nagasa rarana, ledo ria pokaingguna nadaa. Ia natuvu nosinggabelo ante tona ntanina bo nalusu rarana. Ia ledo nasombo tapi nasadia nantarima tesa lako nte tona ntanina. Naasi mpuu matana nanggita roana napakasi, bo nadea poviana nabelo. Ia ledo nompelenje, bo nanoa rarana.

1 Petrus 1:22

Sampesuvu-sampesuvu, katuvumiu nipakagasamiu sabana komiu nangoseaka pepatuduki nakana. Haitumo sampe komiu namala nompotove sampesuvumiu sampomparasaya ante rara naliangu. Sabana haitu, posipotovemo ante rara mpuu-mpuu.

1 Petrus 2:12

Komiu kana matuvu ante pokainggu nabelo mpuu ri tatanga ntona ledo nosisani nte Alatala. Ane mabelo pokainggumiu, nau rasalaira komiu bo raulira komiu novia anu nadaa, tapi kaupuna kana rapangakura nabelo pokainggumiu, bo ratoiyara Alatala tempo Ia makava.

1 Petrus 4:8

Tapi anu nelabi nopoko, komiu kana mpuu-mpuu mosimpotove. Apa ane kita mompotove roata, kita masadia muni mombaampungi tona ntanina.

2 Petrus 3:1

Sampesuvu-sampesuvu nipotoveku, hitumo suraku karanduana ka komiu. Riara suraku karanduana hitu muni yaku nompasimbuku mompopatora ka komiu pepatuduki nakana ala pekirimiu batena magasa.

1 Yohanes 3:18

Sampesuvu-sampesuvu nipotoveku, nee aga mompotove sampesuvuta sampomparasaya ri sumba. Kita kana mompotove mpuu bo kita kana mompopakita tove haitu ante pokainggu nabelo.

1 Yohanes 3:3

Isema-sema manjarumaka majadi masimbayu mpo i Kristus, ia kana mombajagai pokaingguna ala katuvuna mpuu-mpuu magasa masimbayu mpo katuvu i Kristus.

1 Yohanes 4:1

Sampesuvu-sampesuvu nipotoveku, nee kaliu-liu raparasayamiu pura-pura tona nanguli naria Nosa Gasa nu Alatala nte ira. Tapi peintaka ruru, ala rasanimiu bara Nosa Gasa mpuu naria nte ira, bara ledo. Niuliku ivesia apa nadeamo nabi mpodava ri umba-umba ri dunia sii-sii.