Filipi 4:7 - Kaili Ledo

⁷ Bo ane radekeimiu kakini raramiu ka Alatala, radekeiNa katinonto ka komiu anu ledo rapakule nu manusia mompahana. Ia mompakatinonto raramiu bo pekirimiu sabana komiu nosangu rara ante i Yesus Kristus.

Filipi 4:7 Iomraidhean Croise

Lukas 2:14

“Ratoiyamo Alatala ri suruga! Bo ri dunia, tona nipokonoa nu Alatala manggava katuvua nabelo!”

Yohanes 14:27

Katinonto rara Kudekei ka komiu, haitumo katinonto nu raraKu mboto. Bo anu Kudekei ka komiu haitu ledo nasimbayu nte anu nidekei nu dunia nadaa ka komiu. Jadi nee masusa raramiu, nee maeka.

Yohanes 16:33

Pura-pura tesaKu pangane nitesaKu ka komiu ala matinonto raramiu sabana komiu mosangu rara nte Yaku. Ri dunia hitu komiu rapandasa. Tapi pakaroso raramiu! Apa kuasa nadaa ri dunia hitu nidagiKumo!”

Roma 1:7

Jadi siamo sampe nitulisiku sura hitu ka komiu pura-pura ri ngata Roma, komiu anu nipotove nu Alatala bo nipokioNa majadi todeaNa. Kuperapi Tuamata Alatala bo i Pue Yesus Kristus mombadekei belo ka komiu bo mompakatinonto raramiu.

Roma 14:17

Apa anu nopoko riara Poparenta nu Alatala, ledo anu nikandeta atau niinuta. Anu nopoko, kita manoa rarata, bo matuvu mosinggabelo ante roata, bo madamba rarata sabana Nosa Gasa nu Alatala naria riara ntaita.

Roma 15:13

Alatala mpuu-mpuu puna panjarumakata! Kuperapi Ia mompakadamba mpuu raramiu bo mombadekei ka komiu katuvua mabelo sabana komiu nomparasaya Ia. Kuperapi panjarumakamiu nte Ia mantambai maroso ante kuasa lako ri Nosa GasaNa.

Roma 5:1

Kita najadi nanoa ri panggita nu Alatala sabana kita nomparasaya i Yesus. Jadi sii-sii kita natuvu nosinggabelo ante Alatala sabana anu nipovia nTuputa Yesus Kristus ka kita.

Roma 8:6

Ane pekirira nikuasai dota rara nadaa, ira mamate bo rapopogaa lako nte Alatala. Tapi ane pekirira nikuasai nu Nosa Gasa nu Alatala, ira matuvu mabelo bo mosinggabelo ante Alatala.

2 Korintus 10:5

Ante kuasa nu Alatala kami nompakule nombadagi pekiri ntopangeva pepatuduki nakana, pekiri ntona nasombo, bo pekiri ntona anu nombalava tona ntanina mosisani nte Alatala. Ante kuasa lako nte Alatala kami nanggeni ira nombabali pekirira sampe ira natundu nte i Kristus.

2 Korintus 13:11

Jadi sampesuvu-sampesuvuku, pakadambamo raramiu. Pasimbukumo mompakabelo pokainggumiu mpanjili. Tarimamo pepatudukiku hitu! Komiu kana matuvu mosangu pekiri bo mosangu rara, bo mosinggabelo. Bo Alatala, puna pepotove bo katinonto, mosanggani-nggani ante komiu.

Galatia 5:22

Tapi ane tona nikeniaka Nosa Gasa nu Alatala, iveimo inggura: ira nosimpotove, ira nadamba bo natinonto rarara. Ira nosabara, nalusu bo nabelo rarara nte tona ntanina. Ira namala raparasaya,

Filipi 1:1

Sampesuvu-sampesuvu sampomparasaya anu nonturo ri ngata Filipi: Sura hitu lako nte yaku i Paulus, bo i Timotius, batua-batua i Yesus Kristus. Kami notulisi ka komiu pura-pura anu nosangu rara ante i Yesus Kristus, bo muni ka pakeni ntodea topomparasaya bo topotulungi pakeni ntopomparasaya.

Filipi 1:2

Kami nerapi Tuamata Alatala bo Tuputa Yesus Kristus mombadekei belo ka komiu bo mompakatinonto raramiu.

Filipi 4:19

Alatala nisombaku mompakagana ka komiu pura-pura anu niparaluumiu lako ri kakalumanaNa anu naoge mpuu, sabana anu nipovia i Yesus Kristus.

Filipi 4:21

Pakavote tabeku ka pura-pura topomparasaya i Yesus Kristus ri situ. Bo tarima tabe lako nte sampesuvuta sampomparasaya anu naria nosanggani-nggani ante yaku ri sii.

Filipi 4:9

Anu nipegurumiu bo nitarimamiu lako nte yaku, nau tesaku, nau jonjo nikitamiu riara nggatuvuku, haitumo kana rapoviamiu. Bo ane haitu rapoviamiu, Alatala momporoa komiu bo mompakatinonto raramiu.

Kolose 3:15

I Kristus nompoposinggabelo kita. Jadi nee rapoviata anu mombagerosi posinggabelo haitu, sabana kita nipokio nu Alatala ala kita pura-pura matuvu mosinggabelo mpo sipa-sipa nu karo sangu. Bo nee menonto motarima kasi nte Alatala.

2 Tesalonika 3:16

Kuperapi i Pue Yesus bate-batena mompakatinonto raramiu riara mpengaya-ngaya, sabana Iamo puna katinonto. Kuperapi Ia momporoa komiu pura-pura.

Ibrani 13:20

Alatala nompakatuvu mpanjili Tuputa Yesus lako ri kamateNa. Jadi Ia najadi Topoevu nakuasa anu nompoevu kita bimba-bimbaNa. RaaNa nipatiti nompakaasa pojanji nu Alatala ante kita, bo pojanji haitu rapake sampe ri kasae-saena. Kuperapi Alatala, puna katuvua nabelo, mompakagana pura-pura anu nabelo niparaluumiu, ala rapakulemiu movia dotaNa. Kuperapi Ia manggeni komiu movia anu nipokonoNa ante petulungi i Yesus Kristus. Iamo masipato ratoiyata bo rabilata sampe ri kasae-saena. Amin!

Yudas 1:1

Sampesuvu-sampesuvu anu nipokio nTuamata Alatala majadi todeaNa: Komiu mpuu-mpuu nipotove nu Alatala, bo nijagaiNa sampe i Yesus Kristus makava mpanjili. Sura hitu lako nte yaku, i Yudas, batua i Yesus Kristus bo sampesuvu i Yakobus.

Pompakita 1:4

Sampesuvu-sampesuvu sampomparasaya anu nonturo ri pitu ngata ri propinsi Asia. Yaku i Yohanes, merapi komiu mantarima katinonto bo belo lako nte Alatala anu nariamo lako ri lamba pamulana, bo naria sii-sii, bo maria sampe ri kasae-saena. Bo kuperapi ratarimamiu belo bo katinonto lako nte papitu Nosa nu Alatala anu naria ri ngayo Gadera Kamagaua nu Alatala,

Pompakita 2:17

Isema-sema naria talingana epemo pakabelo-belo anu niuli Nosa Gasa nu Alatala ka todea topomparasaya ri umba-umba ngata. Isema-sema padagi, Kudekei ka ia roti Manna anu nitabuniaka. Bo Kudekei muni vatu nabula simbo sangu ka ira. Ri vatu nabula haitu nitulisi sanga nabaru anu ledo ntoto nisani ntona ntanina, aga tona mantarima vatu nabula haitu mangisanina.”