Filipi 4:17 - Kaili Ledo

¹⁷ Yaku ledo aga madota mantarima pedekeimiu. Tapi yaku madota ala belo ratambai ka komiu lako ri poviamiu nabelo haitu.

Filipi 4:17 Iomraidhean Croise

Yohanes 15:16

Ledo komiu nompelisi Yaku, tapi Yaku nompelisi komiu bo nombatudu komiu hau movua madea, haitumo vua anu ledo maupu-upu. Ane komiu movua ivesia, nuapa-nuapa raperapimiu lako nte TuamaKu sabana komiu topangoseaka Yaku, kana radekeiNa ka komiu.

Yohanes 15:8

Ane komiu movua madea, natantu komiu mpuu-mpuu anaguruKu. Bo poviamiu haitu mompopakita kaoge nTuamaKu ka tona.

Roma 15:28

Jadi yaku hau ri ngata Yerusalem ntani ruru manggeni doi petulungi anu nipasiromu ka topomparasaya hamai. Maupu kudekei doi haitu ka ira ri Yerusalem, pade mesai ri ngatamiu kupoliu hau ri tana Spanyol.

2 Korintus 11:16

Evamo niuliku pangane, nau yaku notesa mpo todoyo, dekeimo loga ka yaku mangoe karoku mboto sakide. Nee rapekirimiu yaku hii mpuu-mpuu todoyo, tapi nau maria sanu manguli yaku todoyo, dekeimo yaku muni mangoe karoku mboto.

2 Korintus 9:5

Jadi haitu sampe nipekiriku paraluu kutudu sampesuvu tatalu haitu mokolu tou nte komiu, ala ira mompasiayu pedekei anu nijanjimiu bara ipia. Nipoviaku ivesia ala masadiamo rakava kami. Bo malantomo petulungimiu haitu nidekei ante momi rara bo ledo aga nipasuu.

Filipi 1:11

Bo pokainggumiu mpuu-mpuu majadi mabelo bo manoa sabana pokarajaa i Yesus Kristus riara nggatuvumiu, sampe madea mpuu tona mombabila bo mompakaoge Alatala.

Filipi 4:11

Niuliku ivesia ledo sabana yaku napepa, apa naosamo raraku nau damo berimba katuvuku.

1 Tesalonika 2:5

Nisanimiu mbotomo, ledo sanggania kami nompatende komiu, bo ledo muni kami nombaakalani komiu ala mombatabuniaka patuju mompakauntu karo kami mboto. Nisani nu Alatalamo tesaku hitu nakana!

1 Timotius 3:3

Ia ledo tolangu, bo ledo toposibaga. Tapi ia kana nalusu rarana bo natuvu nosinggabelo. Ia ledo muni aga nadoko ka doi.

1 Timotius 6:10

sabana pompotove doi puna mpengaya-ngaya kadaa. Sanu tona nompasimbuku nangelo doi sampe nasalandalamo bo domo nioseakara pepatuduki nakana, bo aga mpengaya-ngaya kasusa nikavara anu nompakabuku rarara.

Titus 1:7

Pakeni ntopomparasaya haitu topompasiayu todea nu Alatala. Jadi ia ledo novia pokainggu rasalai ntona. Ia ledo tona nalanga pekirina bara nasalisa narau, ledo topanginu, ledo toposibaga, bo ledo muni tona nadoko doi.

Titus 3:14

Sampesuvuta sampomparasaya kana masaro movia anu nabelo, ala mamala mombatulungi tona napepa. Nee sampe katuvura ledo maria gunana.

Ibrani 6:10

Alatala ledo natenggo raraNa, Ia ledo malinga raraNa ante poviamiu bo pepotovemiu. Nipopakitamiu tovemiu ka Ia tempo komiu nombatulungi sampesuvumiu sampomparasaya, nompamula lako ri nggauluname sampe sii-sii.

1 Petrus 5:2

ala komiu mompiara todea nu Alatala anu niparasayaka komiu, nasimbayu mpo topoevu nompiara bimba-bimbana. Piaramo ira ante damba rara, nangoseaka dota nu Alatala, nemo mpo tona nipasuu. Bo nee aga mangelo untu ka karomiu mboto, tapi tuimo pokarajaa haitu sabana komiu mpuu-mpuu madota mantulungi todea topomparasaya.

2 Petrus 2:15

Nipalaisiramo dala nakana bo nasalandalamo ira. Nipasialara pokainggu i Bileam ana i Beor nggaulu. Ia aga naino ka doi rakavana lako ri poviana nadaa.

2 Petrus 2:3

Guru-guru mpodava haitu nadoko doi. Haitu sampe ira aga mangelo untu lako nte komiu ante tesa-tesa ledo nakana, anu nikarara mboto. Tapi pehuku ka ira nasaemo nipakatantu. Ira rahuku nu Alatala bo tempona ledo rasoro-soro.

Yudas 1:11

Mandasa mpuu ira! Nipasialara katuvu i Kain nggaulu anu nasiriati bo navuu matana nte tueina. Nipasialara ntoto sala i Bileam anu nasadia movia nuapa-nuapa asaa manggava doi. Bo pangevara Alatala nasimbayu mpo peeva i Korah nggaulu, sampe ira muni masipato rahuku nu Alatala.