Filipi 3:10 - Kaili Ledo

¹⁰ Naoge mpuu raraku mosisani ante i Kristus bo mombarasai kuasa anu nompakatuvu mpanjili Ia lako ri kamateNa. Bo yaku madota muni mombarasai susa bo pari nasimbayu mpo susa bo pari nirasaiNa, sampe bara yaku muni mamate masimbayu mpo Ia

Filipi 3:10 Iomraidhean Croise

Matius 20:23

Bo nanguli i Yesus ka ira, “Nakana mami komiu mombarasai pepandasa eva pepandasa Kurasai. Tapi ledo Yaku nakuasa mompakatantu isema masipato monturo ri sabingga ngganaKu bara ri sabingga njidiKu. Ponturo haitu aga bagia ntona anu nipakatantu nTuamaKu.”

Yohanes 10:18

Ledo ria saitoa tona mamala mompatesi Yaku ane ledo Kudekei. Tapi Yakumo anu mombadekei karoKu rapatesi nangoseaka dotaKu mboto. Yaku nakuasa mombadekei karoKu rapatesi bo Yaku nakuasa muni matuvu mpanjili, sabana haitumo niparenta nTuamaKu ka Yaku.”

Yohanes 17:3

Iveimo sampe manusia matuvu mabelo sampe ri kasae-saena: ira mosisani nte Komiu, Alatala aga saito-itoMiu nakana, bo ira mosisani muni ante Yaku, i Yesus Kristus, anu nituduMiu.

Roma 8:17

Bo ane kita mpuu-mpuu ana-ana nu Alatala, natantumo kita mantarima belo nipakasadia nu Alatala ka ana-anaNa. Kita muni mantarima pura-pura anu nipakasadia nu Alatala ka i Kristus, sabana ane kita nombarasai kasusa bo kapari mpo anu nirasaiNa, kita muni rapakaoge nasimbayu mpo Ia.

Roma 8:29

Apa lako ri lamba pamulana, kita nipelisiNa bo nipakatantuNa majadi nasimbayu mpo AnaNa i Yesus. PatujuNa ala i Yesus majadi Ana Lumbua bo kita todea majadi tueiNa.

Roma 8:36

Riara Buku Gasa nitulisi ivei: <> Mazmur 44:23

2 Korintus 1:10

Jadi sampesuvu-sampesuvu, Alatala nompakasalama kami lako ri pepandasa anu nompakaviora rara haitu, sampe kami ledo namate. Bo Iamo bate-batena mompakasalama kami. Iamo nisarumaka kami bate-batena mompakasalama kami nggani-nggani kami mombarasai kasusa bo kapari.

2 Korintus 1:5

Nadea kasusa bo kapari nirasai i Kristus, nambela munimo nte kami. Bo ivesia muni Alatala mpuu-mpuu nompakaroso rara kami sabana kami nosangu rara nte i Kristus.

2 Korintus 13:4

I Kristus nalente mami tempo Ia nipaku ri kayu salib sampe namate. Tapi Ia natuvu mpanjili sabana kuasa lako nte Alatala. Kami anu nosangu rara ante i Kristus, nalente muni nasimbayu mpo Ia bara ipia. Tapi kami natuvu ante kuasa nu Alatala, nasimbayu mpo i Kristus, bo ane mantingayo komiu ngena kami, rakitamiu kuasa nidekei nu Alatala ka kami.

Galatia 2:20

Jadi namala rauli ivei: nau yaku natuvu, domo aga yaku saitoku natuvu, tapi i Kristus natuvu riara nggatuvuku. Bo ri katuvuku ri dunia hitu, yaku natuvu mpuu-mpuu nomparasaya Ana nu Alatala anu nompotove yaku bo nombadekei karoNa rapatesi manjambei yaku.

Galatia 6:17

Jadi kaupuna, tumo mompakasusa yaku, sabana bela-bela ri karoku najadi tanda yaku mpuu-mpuu batua i Yesus Kristus.

Efesus 4:13

sampe kaupuna kita pura-pura mpuu-mpuu mosangu rara sabana kita nomparasaya Ana nu Alatala bo mpuu-mpuu nosisani nte Ia. Bo kita pura-pura mantambai manoto, bo pomparasayata mantambai maroso sampe domo makura nuapa-nuapa. Bo kita majadi nasimbayu mpo i Kristus mboto, nanoto bo naroso.

Filipi 3:8

Ledo aga haitu, tapi pura-pura nirekeku ledo ria gunana ane rapoposisala ante anu nelabi kabelona, haitumo nosisani ante Tupuku i Yesus Kristus. Jadi nikabasakakumo pura-pura bo nirekeku mpo rumpu ala yaku mamala mosisani ante i Yesus Kristus

Kolose 1:24

Sampesuvu-sampesuvu, sii-sii nadamba raraku nombarasai susa bo pari nikavaku sabana yaku nokarajaa nantulungi komiu. Apa yaku nombadupai ri karoku susa bo pari nipakatantu i Kristus kana kurasai. Bo susa bo pari nirasaiku nanggeni belo ka todea topomparasaya. Pura-pura kita topomparasaya nirapaka karo i Kristus.

Kolose 2:13

Bara ipia dopame komiu nomparasaya i Kristus, komiu nireke namate sabana komiu nadosa bo ledo nangoseaka atura-atura nu Alatala. Tapi sii-sii, Alatala nompakatuvu komiu nosanggani-nggani nte i Kristus, bo pura-pura dosamiu niampungiNamo.

Kolose 3:1

Namala raulita kita topomparasaya i Kristus nipakatuvu mpanjili nosanggani nte Ia, sabana Alatala nombadekei katuvu nabaru ka kita. Jadi, pasimbukumo manggava anu nipasadia nu Alatala ka kita ri suruga, apa hamai i Kristus nonturo ri panggana nu Alatala.

1 Petrus 1:3

Masipato kita mombatoiya Alatala, Tuama nTuputa Yesus Kristus! Nambaso mpuu asi mataNa ka kita, sampe nidekeiNa katuvu nabaru ka kita. Bo katuvu nabaru haitu nitarimata sabana i Yesus Kristus nipakatuvu mpanjili lako ri kamateNa. Haitumo sabana panjarumakata naroso.

2 Petrus 1:13

Nipekiriku ane yaku da natuvu, masipato kupakaroso raramiu ante pepatoraku hitu.

1 Yohanes 2:3

Ane raoseakata parenta-parenta nu Alatala, haitumo tandana kita nosisani belo ante Ia.

1 Yohanes 2:5

Tapi isema-sema nangoseaka parenta nu Alatala, tona haitumo mai mpuu-mpuu nompotove Alatala. Haitumo tandana kita mpuu-mpuu natuvu nosangu rara ante Alatala.

Pompakita 1:18

Yakumo hii anu Natuvu. Bara ipia Yaku namatemo. Tapi peintamo, sii-sii Yaku natuvu mpanjili sampe ri kasae-saena. Yakumo nakuasa nantipale gunji kamatea bo ponturo ntomate.