Filipi 1:8 - Kaili Ledo

⁸ Nalentora mpuu raraku nte komiu, apa pompotoveku komiu nasimbayu mpo pepotove i Yesus Kristus mboto. Nisani nu Alatala tesaku hitu nakana.

Filipi 1:8 Iomraidhean Croise

Lukas 1:78

Alatala mpuu-mpuu nompoasi kita. Eva mata nu eo nebonda mpadondona mompakareme dunia, ivesia muni peongaNa mompakasalama kita. Apa Ia makava mompakareme pekiri ntona natuvu ri kalandana bo naeka mamate. Ia makava mompakasalama kita bo manggeni kita hau ri dala kabelona.”

Roma 1:9

Nisani nu Alatala yaku nasaro nosambaya ka komiu. Yaku batena ante rara mpuu-mpuu nombatui pokarajaa nidekei nu Alatala ka yaku, haitumo nompatolele Kareba nu AnaNa.

Roma 9:1

Yaku nosangu rara ante i Kristus, jadi yaku ledo nodava. Pekiri rara ntaiku nikeniaka Nosa Gasa, bo pekiri rara ntaiku muni nanguli yaku ledo nodava. Anu kuuli hitu mpuu-mpuu nakana, ledo aga davaku:

2 Korintus 13:9

Nadamba mpuu rara kami ane kami nalente, asaa komiu maroso momparasaya. Jadi kami bate-batena mosambaya ala pokainggumiu majadi mabelo pura.

2 Korintus 6:12

Pepotove kami ledo nakura, tapi nikitaku pepotovemiu ka kami nakuramo.

2 Korintus 7:15

Tove i Titus ka komiu nantambai kambasona tempo nitorana komiu mpuu-mpuu nangoseaka anu niulina. Nitarimamiumo ia bo nibilamiu ia bo nekou nte ia.

Galatia 1:20

Tesa nitulisiku hitu nakana! Nisani nu Alatala mboto yaku ledo nodava!

Galatia 3:26

Jadi, komiu pura-pura nosangu rara nte i Yesus Kristus, komiu najadi ana-ana nu Alatala sabana komiu nomparasaya i Kristus.

Galatia 4:19

Yaku mpuu-mpuu nompotove komiu! Komiu mpo anaku mboto! Yaku nandasa nompekirika komiu, nasimbayu mpo mombine nandasa mpuu tempo noana. Bo yaku batena masusa ivesia sampe inggu-inggu i Kristus mpuu-mpuu malanto rakita riara nggatuvumiu.

Filipi 2:1

Jadi sampesuvu-sampesuvu, nisaniku narosomo pomparasayamiu sabana komiu nosangu rara ante i Kristus. Raramiu nipakavoe sabana komiu nipotoveNa. Komiu nasintuvu ante Nosa Gasa nu Alatala bo komiu muni nosimpotove bo nosipoasi mata.

Filipi 2:26

Nalentoramo rarana nte komiu pura-pura, bo nasusa rarana sabana niepemiu ia nadua.

Filipi 4:1

Jadi, sampesuvu-sampesuvu nipotoveku bo nipolentoraku. Komiu mpuu-mpuu nompakadamba raraku, bo nasana mpuu raraku sabana pomparasayamiu asele pokarajaaku nompatolele Kareba Belo. Nantora anu niuliku pangane, nee molengga-lengga momparasaya bo mangoseaka i Pue Yesus.

Kolose 2:1

Jadi, kana rasanimiu yaku nompasimbuku mpuu nantulungi komiu bo tona ri ngata Laodikia, bo pura-pura tona anu dopa nosisani ante yaku.

Kolose 3:12

Sampesuvu-sampesuvu, kita nipotove nu Alatala bo nipelisiNa majadi todeaNa nagasa. Haitu sampe kita kana maasi matata manggita roa. Kita kana mabelo rara, maede rara, malusu rara, bo mosabara nte roa.

1 Tesalonika 2:5

Nisanimiu mbotomo, ledo sanggania kami nompatende komiu, bo ledo muni kami nombaakalani komiu ala mombatabuniaka patuju mompakauntu karo kami mboto. Nisani nu Alatalamo tesaku hitu nakana!

1 Tesalonika 2:8

Nambaso mpuu tove kami nte komiu, sampe kami nadamba nompatolele Kareba Belo ka komiu. Bo kami muni nasadia mantulungi komiu nau kami mamate, sabana kami mpuu-mpuu nompotove komiu!

2 Timotius 1:4

Nitoraku kasusa raramu tempo kita nogaa bara ipia, bo nalentora mpuu raraku manggita iko ala yaku mpuu-mpuu madamba.

Filemon 1:12

Yaku mpuu-mpuu nompotove i Onesimus, bo sii-sii nituduku ia manjili tou nte iko.

Filemon 1:20

Sampesuvuku, kita nomparasaya i Kristus, jadi kuperapi ala iko movia anu noguna ka yaku, haitumo, tarima mpanjilimo i Onesimus ala madamba raraku sabana posampesuvuta sampomparasaya.

1 Yohanes 3:17

Isema-sema nagana katuvuna bo nikitana sampesuvuna napepa, tapi ledo nadota ia mantulungi sampesuvuna haitu, natantumo ledo ntoto nipotovena Alatala.