O MIKHA 5:4 - MA JOU AI BUKU O ABARI MA OA

^4-5 deʼ Unanga aha wahi döaka o dame. Nako o Asyur manga tentara yaparangi tongone nanga berera de yo ngohama tongone nanga bebeno o mehele, ngone aha hatoomu tongone nanga tutuda-tutuda yokua-kuata mangale yaparangi önanga. To ngone nanga tutuda-tutuda gënanga aha yahihanga o Asyur deʼ o däe makuata, deʼ inahihalamati ngone toönanga manga giamino.

O MIKHA 5:4 Iomraidhean Croise

O MIKHA 7:14

Ya Jou, nä goana Ani umati, Ani ngongikiri ma umati. Onanga yo gogere yo kurutika deʼ mahomoa o hongana mahai-haitoka, o tonaka iboburere mahidogoronaka. Mal̄aika önanga ima make o inomo o Basyan deʼ o Gilgaloka mamomo matonaka malua-luasoka hokä maöraha mahira.

O LUKAS 1:32

Unanga aha wodadi womulia deʼ aha iwihetongo ma Jou Madutu wokö Kurutil̄e ai Ngohaka. Ma Jou Madutu aha wihidadi Unanga o koano hokä ma Koano Daud, aiete de aitohora.

O HIMATOKO 11:15

Daha o malaekat matumidoka aitrompet wawuwu, o horogaka toihene o ilingi-o ilingi duru kohakuatil̄e itemo, ”O kuaha mangale wapareta o dunia örahanënanga naga tongone nanga Jou aigiama mahoatoka deʼ o Koano Wohihohalamati wihijäjajioka. Unanga aha wopareta mangale kahiado-adonika!”

O PETRUS MADODIHIRAKA 1:5

Mata-mata gënanga mangale ngini, karana ngini ningaku ma Jou Madutuika. Ho ngini inï göana de ma Jou Madutu ai kuaha hupaya ngini nia tarima o halamati yasosadia damä ihi nyata o öraha mabobahaka.

O YUDAS 1:1

O Roriadodoto ma Jou Madutu o Ama winï ahokoka deʼ duru winï dora-dora de inoli inï göana mangale o Yesus Kristus. Hokä o Yesus Kristus ai gilaongo, ngohi – o Yudas – o Yakobus ai dodoto,

O EFESUS 1:3

O higiriri ma Jou Madutu, tongone nanga Jou Yesus Kristus ai Ama! Unanga wonahi barakati ngone de hagala o barakati o rohani mabarakati o horoga magoronaka, karana ngone horimoi de o Kristus.

O YOHANIS 20:17

”Uha nohi sö Ngohi,” o Yesus womitemo munangika, ”hababu Ngohi todoauahi o Amail̄e. Mä noiki Ahi roriadodotika, deʼ nahi ngahu onangika örahanënanga Ngohi todoa Ahi Amail̄e deʼ Ani Amail̄e, Ahi Jou Madutuil̄e deʼ ani Jou Madutu il̄e.”

O YOHANIS 10:38

Mä karana Ngohi tadiai ënanga, niangaku aha okia Ngohi tadiai gënanga, ngaro ngini nioluku nihingaku Ngohino. De hokogënanga ngini nihiöriki deʼ nimangarati o Ama tatapu kamoi de Ngohi, deʼ Ngohi i tatapu kamoi de o Ama.”

O MATIUS 25:31

”Oraha okia o Nyawa manga Ngohaka woböa hokä o koano iwitomoteke mata-mata Ai malaekat, Unanga aha wogogeruku Ai kuruhi imomulia mal̄okuoka.

O MATIUS 16:18

Hababu gënanga la nohiöriki, ngona ganga o Petrus, o nuha ikua-kuata. Deʼ o nuha nënanga mal̄okuoka Ngohi aha tohigoko Ahi gereja, yahihanga yakunua; ngarokö ohonenge makuaha.

O MATIUS 2:6

’Ngona Betlehem, o Yehuda mabereraka, o Yehuda makota yairi-irikika mahi dogoronaka, hakali-kali ngona duru no etekua. Karana ngonaino aha woböa womatëngo o tutuda, aha wätuda ahi umati o Israeloka.’ ”

O ZAKHARIA 9:10

Ma Jou wotemo, ”Hagala o kereta ihi poparangi o Efraimino aha Ta umo, mata-mata o kuda o Yerusalemoka aha Ta hohihanga deʼ hagala o toimi aha Ta wede-wederuku. Nia koano aha wohi ngahu o dame o hoana deʼ o berera ma ago-agomo manga hidogoronaka. O ngötoka deʼ o ngötika Unanga aha wakuaha, o Efrat ma Ngairoka deʼ yaino hiädono o dunia mabahaika.”

O YESAYA 52:13

Ma Jou wotemo, ”Igou-goungu, Ahigilaongo ahawohasili; Unanga ahaiwi higiriri deʼ iwihikurutil̄e.

O YESAYA 49:5

Toma kil̄auuahi, ngohi wohiahoko ma Jou todadi Aigilaongo, mangale tätoomu o Israeloka maumati, hupaya önanga imaidulu Unangika. Ma Jou wohihidadi ngohi duru dema horomati, ma Jou Madutu ganga ahikuata.

O MAZMUR 145:12

hupaya mata-mata o nyawa yanako Ani manarama ilago-agomo, inoli Ani popareta imomulia deʼ ihailoa.

O MAZMUR 98:3

Unanga wöhininga Ai dora deʼ Ai satia o Israelika, Ai umati. Mata-mata o hoana deo berera o dunia yamode-modekika yamakeoka ai utumu, tongone nanga Jou Madutu.

O MAZMUR 93:1

Ma Jou ganga o Koano; Unanga woma hipakeanga o mulia deʼ o kuata. O dunia ibitumu ima okoil̄e yakunua igiwi.

O MAZMUR 72:19

Ihigiriri Ai romanga imomulia kahiado-adonika; tanu o dunia yamode-modekika iomanga deʼ Ai mulia! Idadi hoko gënanga, Amin!

O MAZMUR 72:8

Ai popareta aha idogo iwoata deʼ ikurutu o ngötoka de o ngötika, ima hohe o wange mahiwaroko hiädono o wange madumuniha.

O MAZMUR 22:27

O mihikini manyawa aha yol̄omo hiädono yapunuhu; o nyawa yoböa-böa ma Jouika aha iwi higiriri Unanga. Tanu ngini nisosanangi kahiado-adonika!

O KELUARAN 23:21

Niatailako nihidodiai deʼ nihingounu ënanga. Uha nimalawani enangika karana ënanga Ahi huhuloko, deʼ ënanga aha inihiapongua niatö totilakuru.

O YESAYA 52:10

Ma Jou wohidumutu Aikuaha hagala o hoana mangalako mahimangoka. Done odunia ingodumu ahayahakihi ohalamati tongone nanga Jou Madutuino.

O YESAYA 45:22

Hei, dunia manyawa ningodumu, nimaidulu Ngohino hupaya ngini inïhihalamati, hababu duga-duga Ngohi ma Jou Madutu, koiwa mahomoa!

O ZAKHARIA 13:7

Ma Jou Duru woko Kuaha wotemo, ”Nomomiki, hei oworo, deʼ niparangi o gogoana woko karajänga mangale Ngohino! Nitoma ünanga, done hagala o duba aha ima kokitingakoka. Ngohi aha taparangi Ahi umati,

O MALEAKHI 1:5

O Israeloka manyawa aha yamake mahirete, deʼ yotemo, ”Igoungu ma Jou wolamoko; Ai kuaha hiadono o Israel matonaka ma poretoka!”

O YESAYA 8:7

Hababu gënanga Ngohi, ma Jou, aha tihiboaino ma koano Asyur deʼ aitentara yongodumu mangale yaparangi o Yehuda. Onanga aha yangika hokä o Efrat ma Ngairi ihebu-hebulu deʼ yo nguihi magoko-gokoko.