O TESALONIKA MADODIHIRAKA 5:10 - MA JOU AI BUKU O ABARI MA OA

¹⁰ Unanga wohonenge mangale ngone hupaya maorahoka Unanga aha woböa – bote ngone kaho wango-wangohi, bote ngone hohonengoka – ngone yakunu howango dede Unanga.

O TESALONIKA MADODIHIRAKA 5:10 Iomraidhean Croise

O MATIUS 20:28

Hokä o Nyawa manga Ngohakoli; Unanga woböa wonahihuua iwï leleani, mä Unanga wäleleani, deʼ wohi döaka ai nyawa, la o nyawa manga ngöe wätuhuhu.”

O YOHANIS 10:11

Ngohi o gogöana maoa. Gogöana maoa wohidöaka Ai wowango mangale Ai duba-duba.

O YOHANIS 10:17

O Ama wohihininga Ngohi hababu Ngohi tomahilapahi Tongohi ahiwowango, mangale tatarimaokali.

O YOHANIS 15:13

O nyawa duru yahininga manga hoba-hobata gangala o nyawa ihidöaka manga wowango mangale önanga.

O ROMA 8:34

Boteka naga o nyawa yomau inahi howono ngone? O Kristus Yesus ahao wonahiböa ngone! Ge Unanga wohonengoka, ekola ge Unangala iwihiwangokali o honenge mahigoronaka deʼ Una naga ma Jou Madutuoka o ngï i kokuahaoka.

O KORINTUS MADODIHIRAKA 15:3

Okia ngohi tinihingahu o Roriadodotika nagala ngohiö tatarimaka. Duruhe mal̄okuoka, hokä itulihi Ma Jou Ai Demo ma Buku magoronaka, ngohi tinihingahu nginika o Kristus wohonenge karana tongone nanga baradoha;

O KORINTUS MAHINOTOKA 5:15

O Kristus wohonenge mangale o nyawa mata-mata, hupaya o nyawa yowango-wango, yowangokaua mangale manga diri mahirete, mä mangale o Kristus wohonengoka deʼ iwihiwangokali mangale toönanga manga paralu.

O KORINTUS MAHINOTOKA 5:21

O Kristus wobaradohaua, mä ma Jou Madutu widiai Unanga wihitagongo tongone nanga baradoha, la ngone homa teke oa-oa okali de ma Jou Madutu karana kamoi de o Kristus.

O EFESUS 5:2

Nia ngango kiani yodol̄a de o dora, hokä o Kristusö wonahininga ngone. Unanga womahi hubaka Ai diri mangale ngone hokä o huhuba moi mabounu ihëmo-hëmoro, deʼ yasanangi ma Jou Madutu ai hininga.

O TESALONIKA MADODIHIRAKA 4:13

Roriadodoto, ngomi mioigo hupaya ngini nihi öriki demadiai mangale hagala o nyawa yohone-honengoka; hupaya ngini nia hininga ihuhaua hokä o nyawa mahomoa manga ngonganono koiwa-iwa.

O TESALONIKA MADODIHIRAKA 4:15

Yakorona o hali gënanga, nënanga doka ma Jou ai dodötoko ngomi mimau minihi ngahu nginika: Ma Jou Yesus woböa maorahoka, ngone kaho wango-wangohi aha hohihiraua de o nyawa yohone-honengoka ihira.

O TESALONIKA MADODIHIRAKA 4:17

Iböto de gënanga, ngone kaho wango-wangohi o öraha gënanga aha kama moi inä göraka dede önanga o lobi-lobi ma goronaika la homakamäke de ma Jou o gitawaoka. Daha ngone aha hogogere de ma Jou kahi ado-adonika.

O TESALONIKA MADODIHIRAKA 5:6

Hababu gënanga ngone yakunua kahomä idu-idu dika hokä o nyawa mahomoa. Ngone kokiani homahi dodiai ho mä göana deʼ to ngone nanga dibanga ko kiani itararono.

O TIMOTIUS MADODIHIRAKA 2:6

Unanga o nyawa womatëngo wohi döakoka Ai diri mangale wahilapahi o nyawa mata-mata toönanga manga baradohaka. De gënanga ma Jou Madutu wohidumutu maöraha yakokokorona, Unanga woigo la o nyawa mata-mata wahihalamati.

O TIMOTIUS MAHINOTOKA 2:11

I goungu itiai o demo nënanga, ”Nako ngone hohonengoka homakinïki dede Unanga, ngone aha howango homakinïki dede Unanga.

O TITUS 2:14

Unanga wohi hubaka Ai diri mangale ngone la wonahilapahi ngone de hagala o dorou, deʼ wonahidadi ngoneo umati moi hololapahi de o baradoha deʼ hodadi madutu Unanga dika, inoli inamagawe o oa hodiai.

O PETRUS MADODIHIRAKA 2:24

O Kristus mahirete wa moku tongone nanga baradoha Ai dirioka o salib magotaka, hupaya ngone holapahi de o baradoha makuaha, deʼ howango imoteke ma Jou Madutu ai mau. O Kristus ai nabo-nabo ganga inahi togumu ngone.

O PETRUS MADODIHIRAKA 3:18

Hababu o Kristus mahirete wohonenge duga-duga kamamoi dika, mangale kahi ado-adonika karana o nyawa manga baradoha – o nyawa womatëngo wahowonua, wohonenge mangale o nyawa yahowo-howono. O Kristus wodiai hoko gënanga hupaya ünanga wakunu winïtuda ngini ma Jou Madutuika. Unanga iwi toma cara o röehe, mä wowangokali cara rohani.