O TESALONIKA MADODIHIRAKA 4:3 - MA JOU AI BUKU O ABARI MA OA

³ Nënanga doka ma Jou Madutu ai mau: Hupaya ngini niwango nimä dingakika mangale Una, nitebini, nimahi tingaka ikurutika de o manarama isösafarune.

O TESALONIKA MADODIHIRAKA 4:3 Iomraidhean Croise

O MAZMUR 143:10

Ngohi nohïdotoko tadiai Ani mau, hababu Ngona ahi Jou Madutu. Ngona ani hininga yaoa, de aha ngohi nohituda o ngekomo i rata-rataika.

O MAZMUR 40:8

De ngohi totemo, ”Nenanga ngohi, o buku yalü luluino magoronaka yatulihi mangale ngohi.

O IMAMAT 15:18

Ima ko röehe moi de iböto, kayaoa o nauru kayaoa o ngoheka ko kiani ima ohiki, ma önanga ka hirahi yo pëseke hi adono o wange itumunu.

O MATIUS 12:50

O nyawa yadodiai ahi Ama o horogaka Ai mau, geönanga Ahi riadödoto o nauru, de Ahi biranga, deʼ Ngohi ayo.”

O MATIUS 15:19

Hababu nanga hiningail̄e ipuda o dibanga madodorou, idadi o hababu o nyawa yotoma, yohowono, o nahihu madorou, yotohiki, o hakihi i elu-eluku deʼ o fitana.

O MATIUS 5:32

Mä orahanënanga Ngohi tinïtemo nginika: o nagona hönanga yäoluku manga hekata, enahioko o ngoheka gënanga mohowonua, idadi hababu o ngoheka gënanga mohowono, nako ngoi hekata gënanga mokawingoli o nyawa mahomoaika. Deʼ o nagona hönanga yokawingi de o ngoheka imi olu-olukika gënanga, onangö kayo howono.”

O MATIUS 7:21

”Mata-mataua o nyawa ihi ahoko Ngohi, ’Jou, Jou,’ aha yodadi ma Jou Madutu aiumati, mä duga-duga o nyawa yadodiai Ahi Ama o horogaka Ai mau.

O MARKUS 3:35

O nyawa yadodiai ma Jou Madutu aimau, ge önanga Ahi riadödoto o nauru deʼ Ahi biranga deʼ Ngohi ayo.”

O YOHANIS 4:34

Daha o Yesus wato, ”Ahi inomo Ngohi ganga tamoteke Ai mau Unanga wohihulo-huloko Ngohi, deʼ tohitotomo o manarama wohihilapahioka Ngohino.

O YOHANIS 7:17

O nyawa yoigo yamoteke ma Jou Madutu aimau aha ihiöriki okia ino Ahi dodötoko iböa ma Jou Madutuino ekola Ngohino mahirete.

O KISAH RASUL-RASUL 15:20

Mä ngone kiani hotulihi o hurata onangika deʼ hahitiari önanga hupaya önanga uha yaol̄omo o inomo ipese-peseke ihiniatoka o gomangika, ekola yaol̄omo o aiwani ma akeme ihonenge kayahirikiti, ekola o awunu yaol̄omo. Deʼ hokogënangoli hupaya önanga imahikurutika mangadiri de o manarama isosafarune.

O KISAH RASUL-RASUL 15:29

uha niaol̄omo o inomo ihiniatoka o gomangika; uha niaol̄omo o awunu, uha nia ol̄omo o aiwani ma akeme ihonenge kaya hirikiti, deʼ nimahikurutika de o manarama isosafarune. Nako ngini nimahikurutika niadiri o hali-hali gënanga, ngini niadiaioka maoa-oa. Gënanga dika, halamati!”

O KISAH RASUL-RASUL 20:32

Orahanënanga ngohi tinihilapahi ngini ma Jou Madutuika, hupaya Unanga winipaliara ngini deʼ hupaya ngini nimahijojö ma Jou Madutu aidora maabarika. Ma Jou Madutu To ünanga Ai kuaha mangale winihikuata ngini de winihidöaka nginika o barakati-o barakati wasadiaka mangale mata-mata Ai umati.

O KISAH RASUL-RASUL 26:18

mangale nahelenga önanga manga lako, hupaya önanga yohupu o huhutuino deʼ yowohama o dararono magoronaika; hupaya önanga yapidili o Ibilihi makuahaino, daha ma Jou Madutu wakuaha. De yongaku Ngohino, manga baradoha önanga aha iapongo deʼ onanga aha yodadi ma Jou Madutu aiumati wäiri-irikoka.’ ”

O ROMA 1:29

Manga hininga iömanga de o dorou mata-mata, itotiaiua; iömanga de o kal̄il̄u, o mela de o dohata mamamäo; i ömanga de o nahihu la yotoma, imakangamo, yotipu deʼ o hininga yägogono, önanga yöigo yahi ade-ade o nyawa mahomoa,

O ROMA 12:2

Uha niodomoteke o dunia nënanga matotukuna. Nihigumal̄a ma Jou Madutu wadiai niadiri imatëngo-tëngo idadi mahungi, hupaya ngini ningali hara moioli. De hokogënanga ngini niakunu nihiöriki ma Jou Madutu aimau – enagënanga okianaga maoa-oa deʼ yasosanangi Ai hininga deʼ i tötotomo.

O ROMA 6:22

Maöraha nanga o baradoha inïparetaokaua, deʼ nidadi ma Jou Madutu aigilaongo. Nia utumu ganga Riadodoto niwango nitebini mangale ma Jou Madutu deʼ o hali gënanga mahasili o ngango madutu deʼ ikakali.

O KORINTUS MADODIHIRAKA 1:30

Ma Jou Madutu mahirete wadiai hiädono Roriadodoto nirimoi de o Kristus Yesus. Itilakuru o Kristus, ngone inadiai hobarija. Deʼ imoteke Unanga dika ma Jou Madutu wonadiai ngone homateke oa-oakali de Ai diri, inahidadi ngone Ai umati woma dinga-dingakoka, deʼ wona hilapahioka ngone.

O KORINTUS MADODIHIRAKA 7:2

Mä hupaya inidäenua o cocoba mangale nidiai o hali-o hali ipatu-patutua, iholoi yaoa o nau-nauru moi-moi de manga hekata mahirete deʼ o ngongoheka moi-moi de manga rokata mahirete.

O KORINTUS MAHINOTOKA 12:21

Ngohi tomodongo damä nako maorahoka ngohi taika ma Jou Madutu aha wohihikauku ngohi tingini niahimangoka deʼ ngohi aha toari karana niangöe niahidogoronaka ngini ihira yobaradoha, yoluku imägali yoluku imatogumu yadiai toönanga manga manarama isosafarune, i peseke deʼ i patu-patutua.

O GALATIA 5:19

O nyawa nanga biaha manahihu inyata o manarama isösafarune magoronaka, ipese-peseke, deʼ ipatutua;

O EFESUS 5:17

Uha nibodo, mä niatailako okia ma Jou wöigo.

O EFESUS 6:6

Uha nidiai hoko gënanga duga-duga maöraha ngini ini göana, duga-duga mangale nia mäke o nyawa mahigiriri. Mä kokiani ngini niadiai hokä o Kristus ai gilaongo magogiria nia moteke ma Jou Madutu ai mau, de nia hininga itototomo.

O KOLOSE 1:9

Hababu gënanga ngomi hoko genangika mima niata mangale ngini, ngomi kademi ihene mangale ngini. Ngomi migahoko ma Jou Madutuika la ma Jou Madutu ai Womaha winihi döaka nginika o barija deʼ o mangarati, hiädono ngini nihi öriki de madiai okia ma Jou Madutu ai mau.

O KOLOSE 3:5

Hababu gënanga, nia hohonengoka o dunia manahihu ihihü huha nia diri, hokä o hudali, o hali-o hali i patu-patutua yamoteke manga hininga ma nahihu, o nahihu i to torou, deʼ o kal̄il̄u (karana o kal̄il̄u ganga kaima däene de yahuba o gomanga).

O KOLOSE 4:12

Ai tabea o Epafrasoka. Unangö nginino. Unanga o Kristus Yesus ai gilaongo, hoko genangika woma niati wagou-goungu mangale ngini. Unanga duru wogahoko ma Jou Madutuika la ngini nia ngongaku idadi ikuata deʼ ngini i gou-goungu nibaluhu, hupaya ngini de madiai nihi ngounu ma Jou Madutu ai mauika.

O TESALONIKA MADODIHIRAKA 4:2

Hababu ngini nihi orikoka o hidumutu-hidumutu ngomi mini hidöa-döakoka nginika de ma Jou Yesus ai kuaha.

O TESALONIKA MADODIHIRAKA 4:4

O nau-nauru nia hidogoronaka kokiani ihi öriki sarakia yowango yorimoi de manga hekata de madodagi yasanangi ma Jou Madutu ai hininga deʼ o nyawa manga hininga.

O TESALONIKA MADODIHIRAKA 5:18

Hagala okianaga idädadi magoronaka kokiani ngini nisukur, hababu gënanga doka ma Jou Madutu wö igo-igo nginino hokä o nyawa yowango yorimoi de o Kristus Yesus.

O TESALONIKA MADODIHIRAKA 5:23

Tanu ma Jou Madutu mahirete wonahi döa-döaka o lolä, winihi dadi ngini o nyawa yagou-goungu niwango nihi tingaka mangale ma Jou Madutu. Tanu ma Jou Madutu wögöana nia diri ingodumu, kayaoa nia womaha, nia jiwa kayaoa nia röehe, hi ädono koiwa naga itotomua maorahoka nanga Jou Yesus Kristus woböali.

O TESALONIKA MAHINOTOKA 2:13

Roriadodoto ma Jou winï dora-dora! Kokiani ngomi salalu mitemo tarima kasi ma Jou Madutuika mangale ngini, hababu kadema hirahi ma Jou Madutu winï irikoka ngini la ini hihalamati. O hali gënanga idadi de okia yamomanarama ma Jou Madutu ai Womaha nginika la winihidadi ngini ma Jou Madutu ai umati itebi-tebini deʼ ma karana ngini ningaku o abari madiaika ma Jou Madutuino.

O TITUS 2:14

Unanga wohi hubaka Ai diri mangale ngone la wonahilapahi ngone de hagala o dorou, deʼ wonahidadi ngoneo umati moi hololapahi de o baradoha deʼ hodadi madutu Unanga dika, inoli inamagawe o oa hodiai.

O IBRANI 10:36

Ngini iparalu nisabari, hupaya ngini yakunu niadiai ma Jou Madutu aimau deʼ dehokogënanga niatarima okia inihijöjäjajioka.

O IBRANI 12:16

Nio göana hupaya uha naga yowango isafarune ekola yölegaikaua o rohani mahali, hokä o Esau wadodiai. Unanga wahukunu aihaku hokä o ngohaka o riaka, duga-duga mangale o inomo o udo-udomo moi.

O IBRANI 13:21

Tanu ma Jou Madutu o lolämatiti gënanga wödogo okianaga ikura-kuranga nginioka de hagala maoa-oa ngini nipöparalu la niadiai Ai mau. Tanu hidomoteke de o Yesus Kristus, ma Jou Madutu womanarama ngoneoka, okia wöigo-igo. Kokiani o Kristus iwihigiriri kahi ado-adonika! Amin.

O IBRANI 13:4

O nyawa mata-mata kokiani ihimatoko manga jako de mahoromati o gogil̄akika, mahababu gënanga o hekata de o rokata kiani yosetia moi de moi. O nyawa manga wowango isösafarune deʼ o nyawa yohowo-howono aha ma Jou Madutu wahidero o adili.

O PETRUS MADODIHIRAKA 4:2

Hababu gënanga, kokiani ngini niwango nënanga de hikaika o duniaka nënanga, imoteke ma Jou Madutu ai mau, deʼ koimotekua o nyawa manahihu.

O YOHANIS MADODIHIRAKA 2:17

O dunia deʼ hagala moi-moi magoronaka yononahihu o nyawa, magogiria i hihanga. Mä o nyawa yamote-moteke ma Jou Madutu ai mau, tatapu yowango kahi ado-adonika.

O HIMATOKO 21:8

Mä o nyawa yokëo-këoko, yososetiaua, manga kalakuanga itotorou, yotoma-toma, manga manarama ipese-peseke, de o nyawa yapäke-päke o gumatere de o maihi, o gomanga yahuba-huba, deʼ mata-mata yoöelu-eluku aha yäumo o uku mangöto deʼ o walira itötoka-tokarika, enagënanga o honenge mahinotoka.”

O HIMATOKO 22:15

Mä o nyawa yadodiai hagala o hali duru itotorou, yogogumatere deʼ yomai-maihi, hagala o nyawa yododiai ipöpese-peseke, yotoma-toma, o gomanga yahuba-huba, deʼ hagala o nyawa yoelu-eluku, kayaoa de manga demo-demo kayaoa de manga manarama, o nyawa geönanga mata-mata manga ngï o kota gënanga toëna maporetoka.