Luca 24:44 - Tachi Ak'õre Pedea

⁴⁴ Mãɨya bak'ari ãchiá jarasima: —Mɨ wapida mãra ome baside jara bapachima mɨ k'orea naa bɨdada jõma mãɨyai bɨ. Mãɨ Moisepa bɨsima, Tachi Ak'õre pari pedeapataɨrãpa bɨsidama, mãɨnepa Salmo k'art'ade pida bɨ bɨma.

Luca 24:44 Iomraidhean Croise

Mateo 1:22

Jõma mãɨya basima Tachi Chiparipa naena jarada jĩra. Chi ichi pari pedeaparipa nãɨya jara basima:

Mateo 16:21

Mãɨ ewaridepa Jesupa ichi ome p'ɨrrɨapataɨrã́ jarapachima ichi Jerusalene minachia mĩai bɨ. Nãɨya jarasima: —P'uurudepema chaarearã juade, p'aarerã chi mãɨrã chaarearã juade mãɨnepa Moisepa bɨda jarateapataɨrã juade mɨ minachia mĩaipɨ. Mɨ peapidaipɨ maamina ewari ũpeaɨde chok'ae p'irabariipɨ.

Mateo 26:54

Maamina mãɨya oorupara ichi Pedeade mɨ k'orea bɨ bɨt'a ¿sãmaasã́ mãɨya baeima?

Mateo 26:56

Maamina ãarea nãɨ oo p'anɨma Tachi Ak'õre pari pedeapataɨrãpa bɨdada jĩra mãɨya baemẽrá. Mãɨya bɨde Jesú ome p'ɨrrɨapataɨrãpa ichi ameenak'ari, ãarea mĩruwãsidama.

Marco 9:31

chi ichi ome p'ɨrrɨapataɨrã́ jaratea bada pẽra. Mãɨne ãchiá jarasima: «Mɨ, chi Ẽpẽra Warra abaɨpa jitapik'ari, ẽpẽerã́ teaipɨ. Ãchia mɨ peadaipɨ, maamina ewari ũpeaɨde mɨ chok'ae p'irabariipɨ».

Luca 21:22

Mãɨ ewaride Tachi Ak'õrepa ichi p'uuru ɨtɨaipɨ. Ichi k'art'ade bɨdada jõma mãɨyaipɨ.

Luca 22:37

Mɨa jararuma: Tachi Ak'õre pari pedeaparipa mɨ k'orea bɨda piarã mãɨyai pia bɨma. Nãɨya bɨsima: “Ara ichi ẽpẽra k'achia bɨ jĩra k'ɨ̃risia p'anasidama”. Chi mɨ k'orea bɨdada piarã ãarea mãɨyaipɨ.

Luca 24:46

Nãɨya jarasima: —Tachi Ak'õre k'art'ade nãɨya bɨ bɨma: Tachi Ak'õrepa Tachi K'aripaparí teai jarada minachia mĩa bɨma. Piuk'ari ewari ũpeaɨde chok'ae p'irabariipɨ.

Luca 9:22

Mãɨ awara jarasima: —Mɨ, chi Ẽpẽra Warra minachia chupuria mĩa baipɨ. P'uurudepema minachia k'awa berãpa, p'aarerã chi mãɨrã chaarearãpa mãɨnepa Moisepa bɨda jarateapataɨrã pida mɨ itu bɨdak'ari peapidaipɨ. Maamina mɨ ewari ũpeaɨde chok'ae p'irabariipɨ.

Luca 9:44

—Mɨa mãrá jararut'a minachia pia ũrit'ɨ. Mɨ, chi Ẽpẽra Warra abaɨpa jitapik'ari, ẽpẽerã́ teaipɨ.

Juan 3:14

Moisepa ĩjũa pania newẽa bɨde taama bronce ooda ɨt'ɨ barijira bɨda jĩra, mɨ, chi Ẽpẽra Warra ara mãɨya ɨt'ɨ barijira bɨdaipɨ,

Juan 5:39

Mãrapa Tachi Ak'õre pedea pia unupatama, mãɨnepema Tachi Ak'õre ome ewaricha chok'ae p'ananait'a k'ɨ̃risia p'anɨ pẽra. ¡Mãɨ k'art'ade mɨ k'orea pedea bɨma!

Juan 5:46

Mãrapa Moisepa jarada piarã ĩjãa p'ananapara mɨne ĩjãanai pasima, Moisepa mɨ k'orea bɨda pẽra.

Hecho 13:40

Jĩrak'aua p'anat'ɨ Tachi Ak'õre pari pedeapataɨrãpa bɨdada mãra ome mãɨyapiemaapa. Nãɨya bɨsidama:

Hecho 2:27

Mɨa k'awa bɨma pɨa mɨ piudaadarã p'anapataɨmá ameeiwẽt'a. Chi pɨ pae pari mimiaparí chi jĩp'a bɨt'a itu beraapiiwẽma.

Hecho 3:18

Maamina mãɨneepuru Tachi Ak'õrepa naena jarada ãarea mãɨyapisima. Chi ichi pari pedeapataɨrãnepa jarasima ichia Tachi K'aripaparí teai jarada minachia mĩak'ari piuit'a.

Hecho 7:37

Ara mãɨ Moisepa israel ĩjũanepemarã́ jarasima: “Tachi Ak'õrepa mɨ peeda jĩra chi ichi pari pedeaparí aba mãramá peeipɨ. Mãɨ ẽpẽra ara mãra p'uurudepema paipɨ. Ichia jararut'a ãarea ĩjãat'ɨ”.

Hebreo 10:1

Chi Moisepa bɨdapa ãarea nepia Cristo k'orea cheidepema wawarrea unupi bɨma. Mãɨ nepia chi Moisepa bɨdapa teak'ama. Mãɨpuru ãyocha Tachi Ak'õrea ãnimara paateade wãpataɨrã, mãɨrã chi Moisepa bɨdapa p'ue jĩp'a bɨk'ama.

Hebreo 3:5

Moisé Tachi Ak'õre pae pari mimiaparí pẽra chi Tachi Ak'õre tedepemarã ome ãarea arí oosima. Ichia k'awapisima Tachi Ak'õrepa k'aadeapema ewaride k'ãre jarait'a.

Hebreo 7:1

Mãɨ Melkisedé Salén p'uurudepema chi poro jũra jɨ̃ bɨ pasima mãɨnepa Tachi Ak'õre chi atepe bɨ p'aare pasima. Mãɨ ewaride Abrahán waapẽarã p'uuru poro jũra jɨ̃ be ome k'ĩruuk'ari ãarea p'uek'ari, ya cheru pasima. Mãɨne ara mãɨ Melkisedepa ichi jɨrɨde wãk'ari ichiá pia pedeasima mãɨ Tachi Ak'õrepa k'aripamẽrá.

Hebreo 9:8

Mãɨnepa Tachi Ak'õre Jaorepa k'awapi basima p'aarerãpa wapida Tachi Ak'õre te nãɨ ĩjũane bɨde ne oodai p'anɨmisa ẽpẽrarã wapida Tachi Ak'õre te pajãne bɨde p'ue eda wãnaiwẽa p'anasit'a.

1 Pedro 1:11

Cristo Jaore ãchi sõne bɨpa pedeapipachima Cristo minachia mĩak'ari Tachi Ak'õrepa pia bɨi k'orea. Mãɨpa pedeak'ari k'awa k'ɨ̃ria p'anasidama k'ai k'orea Cristo Jaorepa ãchiá pedeapisit'a mãɨnepa sãapae jõma mãɨ mãɨyai.

Apocalipsi 19:10

Ara mãɨne mɨ chi Tachi Ak'õrepa ɨt'aripa peeda jĩru k'ait'a sĩraporode bedabari k'obeesima ichiá pia pedeai k'orea. Maamina ichia mɨá jarasima: «Jãɨya oorãse, mãɨpari Tachi Ak'õreapuru pia pedease. Mɨ Tachi Ak'õre pae pari mimiaparipɨ, pɨ jĩra mãɨnepa chi Jesupa jarateada ĩjãa berã jĩra». Jesupa jarateada Tachi Ak'õre Jaorepa chi ichi pari pedeapataɨrã́ pedeapiparima.