Juan 16:22 - Tachi Ak'õre Pedea

²² Ara mãɨ jĩra mãra ara nãɨena k'ĩra piawẽa p'anɨma, maamina mɨ mãicha mãra ak'ɨde cheipɨ. Maapae mãra arapá p'ananaipɨ. Abaɨ pida mãɨ arapá p'ue wẽpapiiwẽma.

Juan 16:22 Iomraidhean Croise

Mateo 28:8

Ara mãɨne wẽrarã Jesú k'ak'ua t'ɨbaridaadamãɨpa p'ira wãsidama. Wap'ea p'ananak'ari maamina sõ arapá wãsidama. Jesú ome p'ɨrrɨa p'ananarã́ jarade wãutade Jesú chek'ari ãchiá pia pedeasima. Maapae wẽrarã ichimá chedak'ari ichi jĩru oredak'ari, ichi minachia k'ɨ̃riasidama.

Luca 10:42

Maamina ¿Tachi Ak'õre pedea ũrii pia bɨwẽk'ãra? Mãɨ Mariapa oo bɨma. Abaɨ pida ichiá mãɨ oowẽa bɨade adaiwẽma.

Luca 16:25

Maamina Abrahanpa p'anoosima: “P'ue peeiwẽma. Warra, k'ɨ̃risiase pɨ pia bapachima chok'ae basieda; mãɨpari Lázaro chupuria bapachima. Idi Lázaro ne k'ɨ̃risiawẽa bɨma, mãɨne pɨ minachia mĩa bɨma.

Luca 19:26

Chi minachia k'awa bɨpa jarasima: “Mɨa jararuma: Abaɨpa Tachi Ak'õre k'orea piarã k'awaipɨra, Tachi Ak'õrepa mãɨ atepe k'awapiipɨ. Maamina chi atua bɨpa ne k'awa bɨ k'ɨ̃risiaipɨra, ichia k'ɨ̃risia bɨ sida Tachi Ak'õrepa mãɨ ẽemariipɨ”.

Luca 24:41

Maamina arapaapa ãchia wapida p'ue ĩjãanaé pasima. Ãchia k'awa k'ɨ̃risiadaé pasima. Mãɨ k'orea Jesupa ãchiá nãɨya idisima: —¿Nãma chik'o uru p'anɨk'ãra?

Juan 14:1

»K'ĩra piawẽa p'anarãt'ɨ. Tachi Ak'õrepa oorude mãɨnepa chi mɨa oorude ĩjãat'ɨ.

Juan 14:19

Tãaraawẽa bɨde nãɨ ĩjũanepemarãpa mɨ waa ununaiwẽma maamina mãrapa mɨ ununaipɨ. Mɨ chok'ae bɨẽra, mãra sida chok'ae p'ananaipɨ.

Juan 14:27

»Mɨa mãra ne k'ɨ̃risiadawẽa p'anapi k'ɨ̃ria bɨma. Mɨa mãɨya ooiwẽma, chi nãɨ ĩjũanepemarãpa mãɨya oopatama. Mãɨpuru minachia k'ĩra piawẽa p'anarãt'ɨ. Ne wap'earãt'ɨ.

Juan 16:16

»Tãaraawẽa bɨde mãrapa mɨ ununaiwẽma, maamina mãɨya nak'ari mãicha tãaraawẽa bɨde mɨ ununaipɨ.

Juan 16:20

Mɨa piarã jararuma: nãɨ ĩjũanepemarã arapá p'anɨmisa, mãra sõp'uapa jẽanaipɨ. Mãra sõk'achia p'ananaipɨ, maamina mãɨ jõk'ari arapaadaipɨ.

Juan 16:6

Mãɨpari mãra k'ĩra piawẽa p'anɨma mɨ wãi bɨade ada pẽra.

Juan 21:7

Mãma basima Jesú ome p'ɨrrɨaparí chi “Jesupa minachia k'ɨ̃ria bɨ” apataɨ. Mãɨpa Pedroa jarasima: —¡Jãɨ Tachi Chiparipɨ! Simón Pedropa “Tachi Chipariade” a jarada ũriside ichi neet'á ɨ̃rɨpema jɨ̃sima, mãɨ neet'áwẽapachi pẽra mãɨ to bat'ai k'orea. Jɨ̃k'ari maapae toedá t'ĩu wãsima.

Juan 4:14

Maamina chi mɨa tea bɨ pania torut'a waa opisia baiwẽma. Chi mɨa tea bɨ pania ichide ewaricha wea baipɨ mãɨnepa Tachi Ak'õre ome ewaricha ichi chok'ae baipɨ.

Hecho 13:52

Maamina chi Jesude ĩjãapataɨrã mãɨ Antioquiade p'anɨ minachia arapá p'anasidama mãɨnepa Tachi Ak'õre Jaoredepa p'anasidama.

Hecho 16:25

Teamasi estarik'a parude Pablopa mãɨnepa Silapa Tachi Ak'õrea ɨt'aa chiidi p'anasidama mãɨnepa ichiá k'ari p'anasidama. Mãɨ waapẽarã jɨ̃a nɨbɨdarãpa ũri p'anasidama.

Hecho 2:46

Ewaricha Tachi Ak'õre te eda ará p'anapachidama mãɨnepa ũpẽarã techa sõpiadepa arapá nek'opachidama.

Hecho 5:41

Ara mãɨne Jesupa peedaɨrã chi judiorã chõarã ará p'anɨmãɨpa arapá wãsidama. K'awasidama Tachi Ak'õrepa ãchi pia unusit'a, Jesú t'ɨ̃ k'orea mĩasida pẽra.

2 Corintio 6:10

Tai sõp'uapatamina ewaricha arapá p'anɨma. Tai nenea k'edema. Maamina taipa chok'ará ẽpẽrarã́ Tachi Ak'õre k'orea k'awapipatama ãchi erreara uru be jĩra p'ananamẽrá. Tai nenea p'anɨmina Tachi Ak'õrenepa nejõma uru p'anɨma.

2 Tesalonicense 2:16

Tachi Ak'õrepa tachi k'ɨ̃riasima. Ichi sõpiadepa sõpiapisima ewaricha mãɨya p'ananamẽrá. Mãɨnepa k'awapisima piarã ichidepa nepia atadait'a. Taipa k'ɨ̃ria p'anɨma Tachi Chipari Jesucristopa mãɨnepa Tachi Pajãnepema Ak'õrepa mãra sõpiapidait'a mãɨnepa chaarea bɨdait'a. Mãɨya mãrapa pedea p'anɨ mãɨnepa oo p'anɨ ãarea pia baipɨ.

Hebreo 10:34

Chi Cristo k'orea eda serrasidaɨde mãrapa k'ĩra chupuriasidama. Mãɨnepa mãrapa ne uru beada arapá chi ĩjãanak'apɨɨrã́ itu ẽemaripisidama, k'awa p'anɨ pẽra mãɨ k'aepẽra nepia jõk'apɨ́ pajãne uru p'anɨt'a.

Hebreo 6:18

Tachi Ak'õrepa sea jarak'a pẽra ichia teai jarada piarã teaipɨ mãɨnepa ichi t'ɨ̃nepa jarada k'ĩra awara ooiwẽma. Mãɨ ne ume p'anɨnepa, taipa Tachi Ak'õre jɨrɨpatama tai k'aripamẽrá mãɨnepa k'ɨ̃riamẽrá. Ichia jarada piarã ooit'a k'awa p'anɨẽra tachia p'ue p'erawẽa ĩjãa p'ananaipɨ. Mãɨpa chi Jesudepa jitadai k'orea nɨ p'anɨt'a itu bɨdaiwẽma.

1 Pedro 1:8

Mãrapa ununak'amina Jesucristo k'ɨ̃ria p'anɨma. Nãɨena ununawẽa p'anɨmina ichide ĩjãa p'anɨma. Ichi k'orea minachia arapá p'anɨma. Jãɨya arapá p'anɨ pẽra mãɨ arapá sãmaasã́ bɨ k'orea p'ue k'awa jaradawẽma.