1 Juan 4:1 - Tachi Ak'õre Pedea

¹ Ũpẽarã, Tachi Ak'õre Jaoredepa pedea p'anɨane apataɨrã jõma ĩjãarãt'ɨ, mãɨpari jĩrak'aua ak'ɨt'ɨ ãchia piarã Tachi Ak'õre Jaoredepa wa waapẽarãnepa pedea p'anɨ k'awadai k'orea. Mãɨya oot'ɨ chi seapataɨrã nãɨ ĩjũane minachia p'anɨ pẽra.

1 Juan 4:1 Iomraidhean Croise

Marco 13:21

»Mãɨ ewaride abaɨpa mãrá jaraipɨra, “Ak'ɨt'ɨ, Tachi Ak'õrepa Tachi K'aripaparí teai jarada nãma bɨma”, mãɨ ĩjãarãt'ɨ. Waapẽarãpa “Ak'ɨt'ɨ, chawa bɨade” aipɨra, mãɨ sida ĩjãarãt'ɨ.

Luca 12:57

»Mãrapa ¿k'ãre k'orea p'ue k'awadak'ama k'ãre jĩp'a bɨt'a?

Luca 21:8

Jesupa p'anoosima: —Jĩrak'aua nipat'ɨ abaɨa pida mãra seapiemaapa. Chok'araɨrãpa jaradaipɨ “mɨ Tachi Ak'õrepa Tachi K'aripaparí teai jara bada”. Mãɨ awara chi ewari arí payade adaipɨ. Maamina ãchi ome wãrãt'ɨ.

Hecho 17:11

Berea p'uurudepema judiorã Tesalónica p'uurudepemarã jĩra p'ananaé pasima. Mãɨpari Jesú k'orea ũri k'ɨ̃ria p'anasidama. Ewaricha Tachi Ak'õre pedea minachia jĩrak'aua ak'ɨpachidama ãchia jara p'anɨt'a piarã k'awadai k'orea.

Hecho 20:29

Mɨa k'awa bɨma mɨ wãk'ari ẽpẽra k'achiarã usa k'achia jĩra mãra t'ãena chedaipɨ chi ũpẽarã ãyá wãpidai k'orea.

1 Corintio 12:10

Mãɨnepa Tachi Ak'õre Jaorepa chi eda tachidiidepemarã́ tea bɨma ẽpẽerãpa ne p'ue oodak'apɨ́ p'ue oodamẽrá. Chi eda tachidiidepemarã́ tea bɨma ãchi p'ue Tachi Ak'õre pari pedeadamẽrá. Chi eda tachidiidepemarã́ tea bɨma p'ue k'awadamẽrá abaɨpa Tachi Ak'õre Jaoredepa pedea bɨ wa jaore mietaadepa pedea bɨ. Mãɨnepa chi eda tachidiidepemarã́ tea bɨma wawaria tachia ũrinak'apɨ́ pedeade pedeadamẽrá. Mãɨnepa chi eda tachidiidepemarã́ tea bɨma tachia ũrinak'apɨ́ pedeade jaradat'a k'awa jaradamẽrá.

1 Corintio 14:29

Ara mãɨ jĩra Tachi Ak'õre pari pedeapataɨ ume wa ũpea pedeadai p'anɨma. Mãɨne jõmãɨrãpa ãchia pedea p'anɨ jĩrak'aua ũrinai p'anɨma piarã k'awadai k'orea.

1 Tesalonicense 5:20

Tachi Ak'õre pari pedeaparipa jara bɨ itu bɨrãt'ɨ.

1 Tesalonicense 5:21

Jõma mãɨ jĩrak'aua ũrit'ɨ, maapae aba chi piadepuru ĩjãat'ɨ.

1 Timoteo 4:1

Tachi Ak'õre Jaorepa arí jara bɨma nãɨ k'aadeapema ewaride waapẽarãpa Cristode ĩjãa p'anana itu bɨdak'ari jaore mietá seapataɨrã, mãɨnepa ãchia jarateapataɨ ĩjãanaipɨ.

2 Timoteo 3:13

Mãɨnepa ẽpẽra k'achiarãpa mãɨnepa awara seapataɨrãpa atepe nemietá oo p'ananaipɨ. Waapẽarã sea p'ananaipɨ mãɨnepa waapẽarãpa ãchi seadaipɨ.

2 Pedro 2:1

Israel ĩjũanepemarã t'ãena Tachi Ak'õre pari pedeapataɨrã sea jarateapataɨrã pasima. Mãra t'ãena pida sea jarateapataɨrã pará p'ananaipɨ. Seadepa ãchia tachi o ãyá wãpiparii k'ɨ̃risiat'a, Tachi Ak'õre pedea jĩra jarateadaipɨ. Tachi Chipari Jesupa ãchi k'aripa bada waa k'aripawẽa beesiade adaipɨ. Mãɨ k'orea Tachi Ak'õrepa isapea ɨtɨaipɨ.

1 Juan 2:18

Mɨ warrarã, nãɨ ewari jõpodoruma. Mãrapa ũrisidama Cristo nek'ĩramá cheit'a. Mãɨnepa minachia Cristo nek'ĩramaarã nɨbɨma. Mãɨpuru tachia k'awa p'anɨma nãɨ ewari jõpodorut'a.

1 Juan 2:7

Ũpẽarã, mɨa mãra pae bɨwẽa bɨma, chi Tachi Ak'õrepa oopi bɨ pedea chiwidit'a, mãɨpari bɨ bɨma ichia naena jara bɨeda. Mãɨ jara bɨeda mãrapa Cristode ĩjãasidaedapema k'awa p'anɨma. Mãɨ naena jara bɨeda chi mãrapa ichi k'orea ũrinaanapɨ.

2 Juan 1:7

Chi seapataɨrã nãɨ ĩjũane minachia p'anɨma. Ãchia ĩjãanak'ama Jesucristo nãɨ k'ak'uade tachi jĩra chesit'a. Chi mãɨya bɨpa waapẽarã seaparima mãɨnepa Cristo nek'ĩramaapɨ.

3 Juan 1:11

Ũpẽa Gayo, nemietá oopataɨrã jĩra barãse mãɨpari pia oopataɨrã jĩra base. Chi pia ooparí Tachi Ak'õrenepɨ, maamina chi nemietá ooparipa Tachi Ak'õre atua bɨma.

Apocalipsi 2:2

»Mãrapa oo p'anɨt'a mɨa k'awa bɨma. Mɨ pae minachia mimia p'anɨt'a mãɨnepa minachia mĩa p'anɨne ãarea choa p'anɨt'a k'awa bɨma. Mãrapa chi nemietá oopataɨrã́ itu oopidak'at'a k'awa bɨma. Eda waapẽarã mãramá wãnak'ari Jesucristopa peesiade apachidama. Maamina mãrapa jĩrak'aua ak'ɨ p'anɨnepa k'awasidama ãchi chi sea bet'a.