Zefaniah 1:3 - Tedim Bible

³ Mihing le ganhing, vana leeng vasa le tui sunga ngasa, a vekpi-in ka susia ding hi. Migilote ka susia ding a, leitung a om mihing khempeuh ka susia ding hi. Topa ahi keimah in hih thu ka gen khin hi.

Tedim Bible Revision 2017

³ Mihing le ganhing, van a leeng vasa le tui sunga ngasa, a vekpi-in ka susia ding hi. Migilote ka susia dinga, leitung a om mihing khempeuh ka susia ding hi. Topa ahi keimah in hih thu ka gen khin hi.

Zefaniah 1:3 Iomraidhean Croise

Piancilna 6:7

Tua ahih ciangin Topa in, “Ka piansaksa mihing, ganhing, a bokvak ganhingte le huih lak vasate, leitung panin ka phiatkhia ding hi. Bang hang hiam cih le amaute ka bawl ka khial hi,” a ci hi.

Isaiah 27:9

Israel in suang tawh a kibawl biakna tau khempeuh suangkang satvui a batsak ciangin Asherah milimte le paknamtui taute a dinglai om nawn lo hi. Hih thu hangin Jakob’ mawhna kimaisakin a mawhna kilakkhiatsak hi.

Isaiah 6:11

Tua ciangin keimah in, “Topa aw, bang tanvei sawt ding ahi hiam?” ka ci hi. Amah in, “Khuapi-ah a teng kuamah om loin hawm suakin, innte-ah kuamah om loin, leitang pen gamkhing suak kiuhkeuhin,

Isaiah 6:12

Topa in gamlapi-ah mite khinkhia-in, leitungah a kinusia mun tampi a om dong, hi ding hi.

Jeremiah 12:4

Ka gam sung bang tanvei keucip ding ahi hiam? Mun khempeuhah lopate bang tanvei vulcip ding ahi hiam? A teng mite’ gitlohna hangin gamsate le vasate a mangthang khin uh hi. Bang hang hiam cih leh amaute in, “I gamtatnate Pasian in hong mu kei ngawn,” a ci uh hi.

Jeremiah 50:3

“Bang hang hiam cih leh leilu lam panin Babylon gam a sim ding le gamlak a suaksak dingin gam khat hong pai ding hi. Gam sungah kuamah teng lo ding a, a mihing a ganhingin a taimang ding uh hi.

Jeremiah 7:20

Tua ahih manin Topa in kong cihin-ah: En in, ka hehna le ka thangpaihna hih munah ka bua ding a, mihingte’ tung le ganhingte’ tung, lo lai-a singkungte le leilak a singgahte tungah ka sung ding hi. Ka hehna mei bangin kuang ding a, kisumit lo ding hi.

Jeremiah 9:10

“Mualte a dingin kapin tau unla, gamlak lonona munte a dingin thumin tau un. Bang hang hiam cih leh tuate keu gawp a, kuamah pai nawn lo hi. Bawng ham zong kiza nawn lo a, vana leeng vasate le gamsate a taimangta uh hi.

Ezekiel 44:12

Ahi zongin amaute in milim biakna lamah Israel mite makai-in mawhna sungah Israel mite tunpih uh ahih ciangin, amaute gim ka piak ding, Topa Pasian keimah nakpitakin ka kiciam hi.

Ezekiel 7:19

Topa’ hehna amau’ tungah a tun ni ciangin, a ngun a khamte un amaute suahtak thei lo ahih manin, a ngun a khamte uh nin bangin kongzing lakah paai ding uh hi. A gilkial uh ciangin zong an bangin tuate ne thei lo uh hi. Ngun le khamte in mawhna sungah amaute tumpihzaw hi.

Hosea 14:3

Assiria mite in hong honkhiazo ngei lo ding a, sakol galkapte in zong hong huzo ngei lo ding uh hi. Kote’ bawlsa milimte pen Pasian hi, ka ci nawn kei ding uh hi. A cimawh mite in nangma tung panin hehpihna a ngah lamtak uh ka thei uh hi,” ci-in thu ngen un.

Hosea 14:8

Israel mite in milim biakha nawn lo ding uh hi. Amaute’ thungetna pia-in amaute ka kem ding hi. Amaute, a hing tawntung singkung kep bangin ka kem ding hi; amaute’ thupha ngah khempeuh keima kiang pan ahi hi,” a ci hi.

Hosea 4:3

Tua ahih ciangin leitang keugaw-in a tunga teng khempeuh si ding a, leitung a om gamsa khempeuh le huihlaka leeng vasa khempeuh tawh si mang ding uh a, tuipi sunga om ngasate nangawn si mang ding hi.

Zekhariah 13:2

Tua ni ciangin gam sung panin milim khempeuh ka phiatsiang ding a, kuamah in a milim min nangawn uh phawkkha nawn lo ding uh hi. Kamsang zuautheite zong phiatin, milim biaknopna lungsim ka beisak ding hi.

Mattiu 13:41

Mihing Tapa in a vantung mite hong sawl ding a, ama ukna sungah a om migilote le mi a mawh nadingin a bawl mi khempeuh kaikhawmin

Mattiu 23:39

Nang kiangah kong genin-ah: ‘Topa’ min tawh a hong pai mipa in thupha ngah ta hen,’ na cih hun hong tun matengin kei nong mu nawn kei ding hi,” a ci hi.

Mangmuhna 2:14

Ahi zongin note ka hong mawhsak nading thu tawmkhat a om hi. Milim biakna ante nesakin, nulepa paktatna piangsak a, Israel mite mawhna a gamtasak Balak tungah thu a hilh Balaam’ thuhilhnate a um mi pawlkhat note lakah a om hi.