Mattiu 13:38 - Tedim Bible

³⁸ Lolai pen leitung hi a, taangci hoih i cih pen Pasian’ ukna sungah a om mite ahi uh hi. Tahumte pen Gilopa tawh a kipawl mite hi a,

Tedim Bible Revision 2017

³⁸ Lo lai pen leitung hi a, taang ci hoih i cih pen Pasianʼ ukna sungah a om mite ahi uh hi. Tahumte pen Gilopa tawh a kipawl mite hi a,

Mattiu 13:38 Iomraidhean Croise

Piancilna 3:15

Nang le numei kikal na suanlekhakte le ama suanlekhakte kikalah kilangneihna ka omsak ding hi. Amah in na lutang hong sunim ding a, nang in ama khetul na sunim ding hi,” a ci hi.

Late 22:30

A hong khangkik mite in ama na sem ding uh hi. Mite in a hong piang lai ding mite tungah Topa’ thu gen ding uh a,

Isaiah 53:10

Ahih hangin amah a kisatnim ding pen Topa’ deihna ahi hi. Amah in natna thuaksak hi. Mawhna hangin ama pumpi a kipiak ciangin amah in a suanlekhakte mu ding a, ama khan a sau ding hi. Topa’ deihna ama khut sungah pung ding hi.

Hosea 2:23

Leitungah ka mite kipsakin a cithei-in ka bawl ding a, hehpih loh, a kici mite ka hehpih ding a, ka mi hi lo, a kici mite, ka mi na hi uh hi, ka ci ding a, amaute in, “Nang pen kote’ Pasian na hi hi,” hong ci ding uh hi, Topa in a ci hi.

Mattiu 13:19

Mi pawlkhat in Pasian’ hong ukna tawh kisai a lungdamhuai thu za napi-in a thu theitel lo uh ahih manin Dawimangpa hong pai-in amau lungsim sunga a kivawh thu a lakkhiatsak hi. Hih bangte pen lolai lampi dung a tu khaicite tawh kibang hi.

Mattiu 24:14

Tua ciangin mi khempeuh tungah teci ahi dingin Pasian’ hong ukna hangin a lungdamhuai thu, leitung khempeuhah kihilh ding hi. Tua khit ciangin beina hong tung ding hi.

Mattiu 5:37

Na gen peuhmah ahi ahihleh, ‘Hi,’ ci inla, ahi lo ahihleh, ‘Hilo,’ cihna tawh kicingsak in. Tua bang hi loin kiciamna kam na zat ciangin Dawimangpa tawh kizomin thuman lo na hih lamtak hong kilang hi.

Mattiu 8:12

Ahi zongin vantung ki-ukna sungah a om dingin a kingaihsun Israel mite ahihleh pualam khuamialna-ah kilawnkhia ding a, tua lai-ah kapin a hagawi ding uh hi,” a ci hi.

Luka 24:47

Jerusalem khua a kipan minam khempeuh tungah a mawhna uh kisikin a kimaisak nading thu, ama min tawh kihilh ding hi, ci-in kigelh hi.

Johan 12:24

A mantakin ci lehang, mangbuhhum tang khat leilakah kituhin si masa kei leh tang khat bek mah hi ngitnget hi; ahi zongin si masa leh tang tampi tak hong nei thei hi.

Johan 8:44

Note pen na pa uh Dawimangpa’ tate na hi uh a, na pa uh deihna bangin a gamta nuam na hi uh hi. A kipat a kipanin na pa uh mi that hi a, thuman gen ngei lo ahih manin thuman tawh kipawl thei lo hi. Amah pen zuauna khempeuh a pianna a zuaugen pa ahih manin zuau a gen ciangin ama ngeina hi lel hi.

Sawltak 13:10

“Dawimangpa tawh a kibang mipa aw, thuhoih khempeuh nialin, gitlohna ngian tuamtuam na nei a, Topa’ thuman pen zuau suahsak ding na hanciam tawntung hi.

ROM (Romans) 10:18

Tua ahihleh amaute in thu za lo uh ahi hiam? Lai Siangtho sungah, “Amau’ awgingte leitung khempeuh ah kizel a, a thugente uh in mun khempeuh a ban hi,” ci-in a kigelh mah bangin amaute in thu za khinzo uh hi.

ROM (Romans) 16:26

Ahi zongin mi khempeuh in Pasian umin a zuihtheih nadingin tu-in kamsangte’ laigelhnate le a nungta tawntung Pasian’ thupiakna tawh tua thu ki-imcip pen a hong kipholak ta ahi hi.

ROM (Romans) 8:17

Eite pen ama ta ihih manin mite a dingin a koih thuphate i ngah banah Khrih a dingin a koihte zong i ngahkhawm lai ding hi. Bang hang hiam cih leh Khrih in a thuak mah bangin i thuak nakleh amah a minthan’ mah bangin ei zong i minthang ding hi.

Kolose 1:6

Note in Pasian hong hehpihna thu za-in, ahi bangbangin na theih hun uh a kipanin thupha na ngah uh bangin leitung midang khempeuh tungah zong lungdamna thu in thupha tunin, leitung khempeuhah a kizel ahi hi.

Jeim 1:18

Ama piansakte khempeuh lakah eite a masa pen i suahtheih nadingin thuman thutak zangin ama utthu tawh eite a hong piangsak tawm ahi hi.

Jeim 2:5

Sanggamte aw, hoihtakin na ngai un. Pasian a it mite tungah piak dingin a ciam vantung gam a ngah ding le upna thu-ah mihau a suak dingin Pasian in leitung mizawngte a teel hinapi-in,

1 PETER MASA 1:23

A sithei nu le pate sung pan hi loin a sithei lo nu le pate sung panin a nungta tawntung Pasian’ thu tawh naungek bangin a suakkik na hi uh hi.

1 JOHAN MASA 3:2

Ka lawm itte aw, eite’ pianzia ding taktak a telin hong kilat nai loh hangin tu-in Pasian’ tate ihi hi. Ahi zongin Khrih hong kilat ciangin ama pianzia ahi bang teekteekin mu ding ihih manin amah i bat nading thu teltakin i thei hi.

Mangmuhna 14:6

Tua ciangin leitungah a teng mi namkim, pau namkim a zang mite tungah a tawntungin Lungdam nading Thu gen ding a nei vantungmi khat vankim lai-ah a leeng ka mu hi.