Mattiu 1:1 - Tedim Bible

¹ Abraham’ suan David, David’ suan Jesuh Khrih’ khang ciaptehna hih bang ahi hi.

Tedim Bible Revision 2017

¹ Abrahamʼ suan David, Davidʼ suan Jesu Khrisʼ khang ciaptehna hih bang ahi hi.

Mattiu 1:1 Iomraidhean Croise

Piancilna 12:3

Nang thupha hong piate thupha ka pia ding a, nang hong samsiate ka samsia ding hi. Nang’ thupha ngah bangin thupha a ngah nadingun leitung midang khempeuh in hong ngen ding uh hi,” a ci hi.

Piancilna 2:4

Hihte pen, a kipiansak lai-a vantung le leitung tangthu ahi hi. Topa Pasian in leitung le vantungte a bawl hi.

Piancilna 22:18

na suanlekhakte thupha ka piak bangin, leitung minam khempeuh in thupha a ngah nadingun hong ngen ding uh hi. Bang hang hiam cih leh nang in ka thu na mang hi,” a ci hi.

Piancilna 5:1

Hih pen Adam’ suanlekhakte’ laibu ahi hi. Pasian in mi a piansakin, amah in Pasian tawh a kisunin a bawl hi.

Late 132:11

Topa in a pelh loh ding kiciamna taktak khat David tungah kiciam a, “Nang’ sung pana na tate khat na kumpi tokhom tungah ka koih ding hi.

Late 89:3

Nangmah in, “Ka teelpa tawh thuciamna ka bawlzo a, ka nasem David tungah thu ka ciamzo hi:

Late 89:36

Ama suanlekhakte kizom paisuak ding a, vana ni a taan laiteng a kumpi gam ka kipsak ding hi.

Isaiah 11:1

Jessi’ phung sung panin a sel khat hong khangkhia ding a, a zungte panin a no khat hong khang ding hi.

Isaiah 53:8

Nenniamna le thukhenna tawh amah kipaikhiatpih hi. A hingte’ gam panin amah kikhenkhia-in, ama mite’ khialhna hangin amah in gimna thuak hi, ci-in ama khang mite kua in thei ahi hiam?

Jeremiah 23:5

“En un, Topa in kong cihin-ah, keimah in David’ suan lak panin kumpi dingin a diktat mi khat ka khankhiatsak ni hong tung ding hi. Amah gam uk siam mahmah ding a, gam sungah thuman thutang tawh thu hong khen ding hi.

Jeremiah 33:26

Jakob le ka nasempa David’ suante ka nial ding a, Abraham, Isaac, le Jakob’ suante a uk dingin amaute’ lakah mi khat zong a teello ding mah ka hi hi. Ahi zongin tu-in tua bang hi loin amaute ka hausakkik ding a, ka hehpih ding hi,” a hong ci hi.

Amos 9:11

Tua ciangin inn tawh kibangin a siasa David ukna gam keimah in ka puahkik ding a, a vang teng hu-in, a sia teng ka puahkik ding a, a nidanga a ngeina lui mah uh ka bangsakkik ding hi.

Zekhariah 12:8

Tua ni ciangin Topa in Jerusalem-a a teng mite hu ding a, a ginalo pente nangawn David zahin thahat ding hi. David’ suanlekhakte in Topa’ vantungmi le Pasian mahmah bangin amaute a makai ding uh hi.

Mattiu 1:18

Jesuh Khrih a hong suahna zia hih bang ahi hi. Mary pen Josef a dingin zuthawl piaksa hi a, ahi zongin a kiten taktak ma-un Kha Siangtho in amah a gaisakna thu Mary in a thei hi.

Mattiu 1:2

Abraham ta Isaac, Isaac ta Jakob, Jakob ta Judah, le a sanggamte ahi uh hi.

Mattiu 15:22

Tua gamah a teng Kanaan nupi khat hong pai-in hong kiko a, “David’ suan, Topa aw, kei hong hehpih in. Ka tanu in dawi vei a, nasia mahmah hi,” ci-in a hong thum hi.

Mattiu 3:16

Jesuh a kituiphum khit phetin tui sung panin a paikhia pah hi. Tua laitakin vantung hong kihong a, vakhu bangin Pasian’ Kha Siangtho hong kumsukin ama tungah a khawl a mu hi.

Mattiu 9:27

Tua lai panin Jesuh a paikhiat ciangin mittaw mi nih in a nungah hong zui-in nakpitakin kiko uh a, “David’ suan Jesuh aw, kote hong hehpih in,” ci-in a thum uh hi.

Luka 1:33

Jakob suanlekhakte’ kumpi hi paisuak ding a, ama ukna bei hun cih om ngei lo ding hi,” a ci hi.

Johan 7:42

Khrih i cih pen David’ suan hi ding a, David’ suahna Bethlehem khua-ah suak ding hi, ci-in Lai Siangtho sungah kigelh hi lo ahi hiam?” a ci uh hi.

Sawltak 2:30

David pen kamsang hi a, ama tunga Pasian’ thuciam a thei hi. Ama suante khat, amah bang teek mahin kumpi-in a bawl nading Pasian in thu a ciam hi.

ROM (Romans) 1:3

Tua thu pen eite’ Topa Jesuh Khrih ahi ama Tapa’ thu ahi hi. Tua Tapa pen leitung silesa lam panin David’ suan hi a,

ROM (Romans) 4:13

Abraham le a suan a khakte in leitung luah ding hi, ci-in Pasian in thu a ciamna pen Abraham in Thukham a zuihna hang hi loin, a upna hangin Pasian in mihoihin a sanna hang ahi hi.

ROM (Romans) 9:5

le a thupi pupite’ suanlekhakte hi uh a, leitung silesa tawh kisai-in Khrih zong amau minam sung panin a piang ahi hi. Hih thute hangin mi khempeuh in na khempeuh a uk Pasian phat tawntung ta uh hen! Amen.

Galati 3:16

Tu-in Pasian in Abraham le ama suan pa tungah thuciamna nei hi. Lai Siangtho sungah a kigelhna-ah, mi tampi a cihnopna ahi, “Na suan le na khakte,” cih kammal na zanglo a, mi khat bek ahi Khrih a cihnopna-in, “Na suan pa,” ci-in na gen hi.

1 TIMOTI MASA 2:5

Bang hang hiam cih leh Pasian khat bek om a, Pasian le mite a hong kilemsakkik thei Khrih Jesuh khat bek om hi.

2 TIMOTI NIHNA 2:8

Lungdamna Thu ka hilhna sungah ka gen mah bangin David’ suan, sihna panin a kithosak Jesuh Khrih na na phawk in.

Mangmuhna 22:16

“Keimah Jesuh in pawlpite a dingin hih thute nang kiangah a hong gen dingin ka vantungmi ka hong sawl hi. Kei pen David’ zung le a suan ahi, zingsol ka hi hi,” a hong ci hi.