Johan 13:31 - Tedim Bible

³¹ Judas a paikhiat khit ciangin Jesuh in, “Tu-in Mihing Tapa in Pasian’ pianzia a neihna hong kilang ding hita hi; ama hangin Pasian in minthanna a ngah ding ahi hi.

Tedim Bible Revision 2017

³¹ Judas a paikhiat khit ciangin Jesu in, “Tu-in Mihing Tapa in Pasianʼ pianzia a neihna hong kilang ding hi ta hi; ama hangin Pasian in minthanna a ngah ding ahi hi.

Johan 13:31 Iomraidhean Croise

Mattiu 8:20

Jesuh in, “Ngiate in lup nading kua nei uh a, vasate in zong giah nading bu nei uh hi. Ahi zongin Mihing Tapa in a luptheih nading mun koimahah nei lo hi,” ci-in a dawng hi.

Luka 12:50

Gimna sungah ka kiphum nading khat om a, tua thu a kikhit matengin ka lungsim a nuam thei kei hi.

Johan 11:4

Ahi zongin Jesuh in tua thu a zak ciangin, “Hih natna pen sihna ding natna hi lo a, Pasian’ Tapa in Pasian’ pianzia a neihna mite in a theih nading, le Pasian a phattheih nadingin a na ahi hi,” a ci hi.

Johan 12:23

Tua ciangin Jesuh in, “Mihing Tapa in Pasian’ pianzia a ngah ding hun hong tungta hi.

Johan 12:28

Pa aw, nangma min thangsak ta in,” a ci hi. Tua ciangin vantung panin aw khat hong ging a, “Ka thangsakzo a, khatvei ka thangsakkik ding hi,” a ci hi.

Johan 14:13

Tapa’ hangin Pasian’ pianzia a kilat theih nadingin keima min paulamin na hong nget khempeuh uh ka hong pia ding hi.

Johan 16:14

Amah in keima gen ding thute note tungah hong gen ding ahih manin Pasian’ pianzia ka neihna hong kilangsak ding hi.

Johan 7:39

Jesuh in hih bang a gen ciangin amah a umte in a ngah ding Kha Siangtho thu a genna hi a, tua hun laitakin Pasian’ pianzia nei-in sihna panin Jesuh kithokiksak nai lo ahih manin Kha Siangtho kipiakhia nai lo hi.

Sawltak 2:36

“Tua ahih ciangin singlamteh tungah na thah uh hih Jesuh pen Pasian in Topa le Khrih in a bawl khitna thu, Israel mi khempeuh in teltakin thei ta un,” a ci hi.

Sawltak 3:13

I pupite Abraham, Isaac, le Jakob Pasian in a nasem Jesuh tungah ama vangliatna a pia hi. Note in aana neite khut sungah tua Jesuh na pia uh a, Pilat mangpa in amah khah dingin a ngaihsut khit ciang nangawnin Pilat’ maitang mahah amah na nial teitei uh hi.

2 KORIN NIHNA 3:18

Tua ahih manin eite khempeuh i maitang hong kiliah nawn loin Topa’ minthanna vangtaang i kilangsak hi. Topa kiang panin a hong pai Kha Siangtho ahi tua minthanna vang in amah tawh a kibang dingin eite hong bawlpha a, minthanna khat panin minthanna sangzaw-ah hong omsak hi.

Efesa 1:12

Tua ahih manin Khrih a muang masa eite in Pasian phatin a minthanna vang kilangsak ni.

Efesa 2:7

Khrih Jesuh tungtawnin a hong lah ama hehpihna le a hong itna bangzah takin lianin lamdang ahi hiam, ci-in a hong tung ding hunah a hong lah tawntung theih nadingin hih bangin a hong thokhawmsak ahi hi.

Filippi 2:11

Jesuh Khrih in Topa ahi hi, ci-in taangko-in Pa Pasian a min thangsak ding uh hi.

1 PETER MASA 1:21

Sihna panin amah hingkiksakin minthanna a pia Pasian, ama hangin muang thei na hih uh manin, na up na muan na lamet uh Pasian ahi hi.

1 PETER MASA 2:12

Gentail mite in note mi hoih lo hi, ci-in hong gensia nuamin mawhna hong zon ciangin, note’ hoihna bekbek mu-in, Pasian a hong pai Ni ciangin a phattheih nadingun amaute lakah na gamtatna uh hoihsak tawntung un.

1 PETER MASA 4:11

Minthanna le vangliatna a nei tawntung Pasian in Jesuh Khrih hangin thu khempeuhah phatna a ngah theih nadingin thuhilhte in Pasian’ thu na hilh unla, na a semte in Pasian’ piak thahatna tawh na sem un. Amen.