Joel 2:11 - Tedim Bible

¹¹ Ama mihonpite tam mahmah uh ahih manin amaute thu pia-in a mai uhah Topa awng a, ama thupiakna bangin a semte hat mahmah uh hi. Topa’ ni ding kihtakhuai mahmah ahih manin a thuakzo ding kua om ding ahi hiam?

Tedim Bible Revision 2017

¹¹ Ama mihonpite tam mahmah uh ahih manin amaute thu pia-in a mai uh ah Topa awng a, ama thupiakna bangin a semte hat mahmah uh hi. Topaʼ ni ding kihtakhuai mahmah ahih manin a thuak zo ding kua om ding ahi hiam?

Joel 2:11 Iomraidhean Croise

Late 18:14

Amah in a thaltangte lawn a, a galte kithehthangsak hi. Khuaphialep phiasak a, a galte a susia hi.

Late 46:6

Minamte lungkham uh a, kumpi gamte kiling hi. Ama aw gingkhiasak a, leitung kicimgawp hi.

Late 68:18

Topa nangmah Pasian tua munah na om theih nadingin a sangna-ah kahto-in salte na paipih a, mihonte le mi lehdote’ tung nangawn panin piakkhong nate na ngah hi.

Isaiah 13:4

Ngai un, mihonpi lungdam bangin mualtungte ah gamlumna! Ngai un, minamte’ kumpi gamte kikhawmin a gamlumna! Vanglian Topa in galdo dingin mihon khat kaikhawm hi.

Isaiah 42:13

Mi thahatpa bangin Topa kuankhia a, gal a do mipa bangin ama hehna sosak hi. Amah kiko-in nakpitakin awngkhia a, ama hatna a galte tungah a lak hi.

Isaiah 7:18

“Tua ni ciangin Egypt luite’ nakah a om Egypt mite, thopi hon bangin hong pai nading le Assiria mite, a gam panun khuaipi hon bangin hong pai nadingun Topa in sam ding hi.

Jeremiah 25:30

“Tua ahih ciangin nangmah in amaute thu na va hilh ding a, hih bangin na va gen ding hi: ‘A sang vantung panin Topa hong hawk ding a, a tenna a siangtho panin hong paukhia ding hi. Ama mite’ langkhatah nasia takin hong hawkgawp ding a, leenggah cil mite bangin leitung mi khempeuhte a langpangin hong kiko ding hi.

Jeremiah 30:7

Nu e! Tua ni lianpi hong tung ding a, nidang tawh tehtheih ding hi lo hi. Jakob suante’ gimhun hi ding a, ahih hangin amaute suakta veve ding uh hi.

Jeremiah 50:34

Ahih hangin amaute a honkhia pa hat mahmah a, Vanglian Topa kici hi. Amah in leitungah kilemna a omna ding le Babylon mite in gimna a ngah nadingin, amaute a dingin a sem ding hi.

Ezekiel 22:14

Tua bangin kong hih ciangin hang nawn dingin ki-um a, na khuttum likngam lai dingin ki-um na hi hiam? Topa ahi keimah in thu ka gen khin a, ka gen bangin ka gamta ding hi.

Joel 1:15

Kalai! A hun hong naita! Topa’ ni hong naita a, Vanglianpa’ suksiatna hun hong naita hi.

Joel 1:6

Kauphe honpi in i gam hong sim a, amaute tam mahmah uh a, hat mahmah uh hi. A ha uh humpinelkai ha bangin hiam a, humpinelkaipi ha bangin gupha mahmah hi.

Joel 2:1

Zion mualtungah peengkul tum unla, Pasian’ mual siangtho tungah pataukohna tum un. Topa ni hong naita ahih manin gam sung mi khempeuh lau ta uh hen.

Joel 2:2

Tua ni pen a mial, a lungzinhuai, meii kai-in khuazin’ ni ahi ding hi. Mualtung a meiipi kai bangin simzawh lohin kauphe honpi hong leeng muaimuai hi. Cikmahin hih bang thu omngei nai lo a, cikmah ciangin zong omkik nawn lo ding hi.

Joel 2:25

Note a hong sim dingin ka hong sawl kauphe honpi, a tuan kauphe, a susia kauphe, a pettan kauphe, hih ka galkap honte in a hong neksak kum sungin a piang ding teng tang kong piakik ding hi.

Joel 2:31

Topa’ ni, tua a lauhuai hun a hong tun ma-in ni hong mialin, kha, sisan hong bang ding hi.

Joel 3:14

Thukhenna Kuam-ah a tul a thenin om uh hi. Bang hang hiam cih leh tua lai munah Topa’ ni hong tung baih ding hi.

Joel 3:16

Zion Mual panin Topa hong hawksuk a, Jerusalem panin hong awngkek a, vanpi le leipi a ling damdam hi. Ahi zongin Topa pen ama mite’ belh pa hi a, Israel mite a hu ding hi.

Amos 1:2

Amos in, “Zion Mual panin Topa hong hawksuk a, Jerusalem khua panin hong awngkek hi. Tua ahih manin lonona gamteng keugawp a, Karmel mualdawn dum dide teng kausan ta hi,” a ci hi.

Amos 5:18

Topa’ ni hong tun ding a ngaklah note a dingin bangzah takin lauhuai ding ahi hiam? Note a dingin tua ni a hoihna hong om ding ahi hiam? Tua ni pen lungzin’ ni hi a, lungtaii ni hi lo hi.

Amos 5:20

Topa’ ni pen khuavak ni hi loin khuamial ni hi a, maitaina a om lo lungzin’ ni ahi hi.

Obadiah 1:15

Bang hang hiam cih leh minam kimte tungah ka thukhenna ding ni a naizo hi. Nang bawl bangin nangma tungah hong kibawl ding hi. Na hih bangin na lu bukah hong tukik ding hi.

Nahum 1:6

Ama hehna kua in nangzo ding a, ama lunghamna kua in thuakzo ding ahi hiam? A hehna, meikuang bangin hong khahkhia a, ama mai-ah suangtumpite kitamzan hi.

Malakhi 3:2

Ahi zongin ama hong pai ni ciangin kua in thuakzo ding a, amah hong kilaak ciangin kua nungtazo ding ahi hiam? Amah pen, sikte a siangthosak mei, le puante a siangthosak satpiang tawh kibang hi.

Gamlak-vakna 24:23

Amah in a thugen ding a omlai teng genin, “Ala! Pasian in hihte a hih ciangin kua nungtazo ding ahi hiam?

1 THESALONIKA MASA 4:16

Pasian’ thupiakna awging lianpi, vantungmi mangpa’ thugenna, le Pasian’ peengkul hong ging ding a, vantung panin Topa mahmah hong paisuk ding hi.

Mangmuhna 18:8

gimna in ni khatthu-in ban ding a, pulnatna, kahna, le kialpi in vatgawp ding hi. Ama tungah thu a khen Topa Pasian vanglian ahih manin mei tawh kihaltum ding hi,” a ci hi.

Mangmuhna 6:17

Amaute’ hehna hangin gimna hun hong tungta ahih manin kua in thuakzo ding ahi hiam?” a ci uh hi.