Yema Cuáü̃ nüxü̃ dauxü̃ i yixcüra tá ngupetüxü̃chiga 22:2 - Tupanaarü Ore

² Rü guma ĩanearü ngãxü̃gu idaxü̃ ga namaarü ngãxü̃gu nida ga yema natü. Rü nacutügüwa narüxü ga yima nai ga maxẽẽruxü̃. Rü yema nai rü wüxichigü ga tauemacügu naxo, rü yemaacü 12 e̱xpü̱xcüna naxo ga wüxichigü ga taunecügu. Rü naatügü ga yema nai, rü guxü̃ i nachixü̃anegüca̱x üxüxü̃ruxü̃ nixĩ.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:2 Iomraidhean Croise

Naanearü ügüchiga 2:9

Rü yemawa nanaxügüxẽxẽ ga naguxü̃raü̃xü̃ ga mexẽchixü̃ ga nanetügü ga chi̱xégaarü oṍxü̃. Rü yema naanearü ngãxü̃gu nanato ga yema nanetü ga maxü̃ nawa yexmaxü̃. Rü inanató ta ga yema nanetü ga nawa nüxü̃ icuáxü̃ i mexü̃ rü chixexü̃.

Wiyaegü 147:3

Rü nüma rü tüxü̃ nataãẽxẽxẽ ya yíxema poraãcü ngechaü̃ ingegüxe rü tüxü̃́ nayana̱i̱xgü i tümaarü o̱xrigü.

Ucu̱xẽgüchiga 3:18

Ngẽma cua̱x rü tüxna nanaxã i maxü̃ ya yíxema nayaxúxe, rü tataãxẽ ya yíxema nüxü̃ cuáxe nax nagu tixũxü̃ i ngẽma cua̱x.

Ichaía 6:10

Rü ngexrüma nax chorü oremaxã cuyaxucu̱xẽgüxü̃ i ñaa duü̃xü̃gü i norü ĩnügutama rüxĩnüexü̃, erü taxũtáma cuga naxĩnüe. Rü nüetama ega nügü yangauxchixexẽẽgu na̱xcha̱xwa i chorü ucu̱xẽgü nax tama nüxü̃ naxĩnüexü̃ca̱x. Rü nüetama ega nügü yangexetügu na̱xcha̱xwa i ngẽma mexü̃ i naxca̱x chaxüxü̃ nax tama nüxü̃ nadaugüxü̃ca̱x rü ngẽmaãcü tama cha̱u̱xca̱x nawoeguxü̃ca̱x nax choma naxca̱x chayataanexẽẽgüxü̃ca̱x” —ñanagürü choxü̃.

Yeremía 17:14

¡Pa Corix, cha̱u̱xca̱x yataanexẽxẽ! Rü ngẽxguma i choma rü tá cha̱u̱xca̱x nitaane. ¡Rü choxü̃ ínapoxü̃! Rü ngẽxguma rü taxũtáma choxü̃ nima̱xgü. Erü cuxü̃xicatama nixĩ i chicua̱xüxü̃xü̃.

Echequié 47:1

Rü yemawena ga gumá yatü rü wenaxarü Tupanapata ga taxü̃nearü ĩã̱xwa choxü̃ namu. Rü yexguma yema ĩã̱xwa changuxgu rü nüxü̃ chadau ga dexá ga yema ĩã̱xtüxü̃wa ibaibexü̃ ga éstewaama yáxü̃ ga Tupanapata ídaxü̃chixü̃waama. Rü yema dexá rü Tupanapataarü tügünecüwaguama nida ga ãmarearü guruü̃arü súrcüwawa.

Ochéa 14:4

Rü ñanagürü ya Cori ya Tupana: —Ngẽma duü̃xü̃gü i tama chauga ĩnüexü̃ rü tá chaugümaxã ichanangüxmüexẽxẽ. Rü tá nüxü̃ changechaü̃ama woo tamachire̱x ngẽma nixĩ i norü natanü. Erü marü choxü̃ nangupetü nax namaxã chanuxü̃.

Chacaría 14:8

Rü ngẽxguma rü Yerucharéü̃wa tá ne naya̱x i wüxi i dexá i mechiüxü̃ i woo mucü ínguxgu rü woo taunecü ínguxgu iyáxü̃. Rü ngãxü̃ i ngẽma dexá rü tá Már i Ngearü Maxü̃ã́xü̃wa naya̱x. Rü ngẽma to i norü ngãxü̃ i dexá rü tá Már i Mediteráneuwa naya̱x.

Maraquía 4:2

Natürü i pemax nax aixcüma choxü̃ pengechaü̃güxü̃ rü chaucüma tá meama pewa nango̱x ñoma üa̱xcü nangóanexẽẽxü̃rüxü̃ rü taãxẽ ixãxü̃rüxü̃. Rü pemax rü taãẽmaxã tá piyuxnagütanü ñoma wocaxacügü naxpüü̃wa iyayi̱xü̃rüxü̃.

Ore i mexü̃ ga Luca ümatüxü̃ 4:18

“Cori ya Tupanaãxẽ rü chowa nangẽxma. Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃. Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃. Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.

Nüxíraxü̃xü̃ ga popera ga Pedru ümatüxü̃ 2:24

Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:7

Rü yíxema ãchi̱xẽ́xẽ rü name nixĩ i naga taxĩnü i ngẽma Tupanaãxẽ ya Üünecü nüxü̃ ixuxü̃ namaxã i ngẽma yaxõgüxü̃tücumügü. Rü yíxema nüxü̃ rüporamaexẽ i chixexü̃ rü tá tüxü̃ chanangõ̱xẽxẽ i norü o i ngẽma ori̱x i tüxü̃ maxẽxẽxẽxü̃ i Tupanaarü ori̱xnecüwa ngẽxmaxü̃’ ”, ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:21

Rü yema 12 ga norü ĩã̱x ga guma ĩanearü poxeguxü̃ rü perlanaxca̱x nixĩ. Rü wüxichigü ga yema ĩã̱x rü wüxitama ga perla nixĩ. Rü yema norü nama ga guma ĩanearü ngãxü̃wa dapetüxü̃, rü úiruxüchinaxca̱x nixĩ. Rü ñoma bídriurüxü̃ niyauracüxü.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:24

Rü yima ĩanearü ngóonexü̃gu tá naxĩ i ngẽma nachixü̃anecüã̱x i yaxõgüxü̃. Rü ngéma tá nangugü i ngẽma nachixü̃anegüarü ãẽ̱xgacügü rü Tupanana tá nanana i norü ngẽmaxü̃gü.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:1

Rü ñu̱xũchi ga yema orearü ngeruxü̃ rü choxü̃ nüxü̃ nadauxẽxẽ ga wüxi ga natü ga ñoma bídriurüxü̃ ichipetüchiüxü̃ ga dexá ga maxẽẽruxü̃ nawa yexmaxü̃. Rü yema natü rü Tupanaarü tochicaxü̃wa rü yimá Carnéruxacüarü tochicaxü̃wa nixĩ ga ne nadaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:14

Rü tataãẽgü ya guxãma ya yíxema ya mexẽẽgüxe i tümaarü maxü̃ ñoma tügü tiyauxgüchiruxü̃rüxü̃ nax Tupanape̱xewa timexü̃ca̱x nax yima ĩanearü ĩã̱xwa tichocuxü̃ca̱x rü nüxü̃ tangõ̱xnetagüxü̃ca̱x i ngẽma norü o i ngẽma nai i maxẽẽruxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:19

Rü ngẽxguma chi texé ínaxíraãchigu i ngẽma ore i ñaa poperagu ümatüxü̃ nachiga i ta̱xacü tá ínguxü̃, rü Tupana rü taxũtáma tüxü̃ nüxü̃ nangõ̱xnetaxẽxẽ i ngẽma norü o i ngẽma nai i maxẽẽruxü̃, rü taxũtáma tüxü̃ nimucuchi nawa ya yima ĩane ya üünene i ñaa poperawa nachiga naxümatüne.