Yema Cuáü̃ nüxü̃ dauxü̃ i yixcüra tá ngupetüxü̃chiga 2:14 - Tupanaarü Ore

¹⁴ Natürü nangẽxma i ta̱xacü icuxüxü̃ i tama chorü me ixĩxü̃. Rü ngẽma nixĩ nax cugüxü̃tawa cunangexmagüxẽẽxü̃ i ñuxre i curü duü̃xü̃gü i tama nüxü̃ rüxoexü̃ ga gumá nũxcümaü̃cü ga Balaáü̃arü ngu̱xẽẽtae. Rü nüma ga Balaáü̃ rü Baláxü̃ naxuxcu̱xẽ nax pecadugu nayixẽẽãxü̃ca̱x ga Iraétanüxü̃gü. Rü nüma ga Baláx rü yema Iraétanüxü̃güaxü̃́ nanangúchaü̃xẽxẽ nax nangõ̱xgüãxü̃ca̱x ga õna ga namaxã tupananetachicüna̱xãgüxü̃ yacua̱xüü̃güxü̃. Rü yexgumarüxü̃ ta nüxü̃́ nanangúchaü̃xẽxẽ nax ngexü̃gü i naxü̃nemaxã taxexü̃gümaxã namaxẽxü̃ca̱x ga Yudíugü.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:14 Iomraidhean Croise

Ichaía 57:14

Tupana rü ñanagürü: —¡Penamexẽxẽ i wüxi i nama i meama iwéxü̃ rü ípenawogü i guxü̃ma i toxyepe̱xeruü̃gü nax ngẽmagu naxĩxü̃ca̱x i chorü duü̃xü̃gü!

Yeremía 6:21

Rü ngẽmaca̱x ya Cori ya Tupana rü ñanagürü: —Ngẽma duü̃xü̃gü rü guxchaxü̃ tá naxca̱x íchanguxẽxẽ. Rü ngẽma nanatügü, rü nanegü, rü ngẽma norü ngaixcamagu ãchiü̃güxü̃, rü namücügü, rü guxü̃táma wüxigu nayue —ñanagürü.

Echequié 3:20

Rü ngẽxguma chi wüxi i duü̃xü̃ i noxri mea maxü̃xü̃ rü nüxü̃ naxoxgu nax mea namaxü̃xü̃ rü poxcu namaxã chaxueguxgu rü ngẽxguma cuma rü tama cunaxucu̱xẽgu rü nüma rü norü chixexü̃gu tá nayu. Rü yema mexü̃ ga noxri naxüxü̃ rü taxũtáma chope̱xewa ínanapoxü̃. Rü nüma rü norü chixexü̃gagu tá nayuama, natürü i choma rü tá cuxna naxca̱x chaca i ngẽma duü̃xü̃ erü tama cunaxucu̱xẽ.

Echequié 44:12

Rü nümagü nixĩ ga yema Iraétanüxü̃maxã inacua̱xüü̃gü ga yexguma tupananetachicüna̱xãgüxü̃ yacua̱xüü̃gügu. Rü yemaacü yema Iraétanüxü̃xü̃ pecadugu nayixẽxẽ. Rü ngẽmaca̱x i ngẽma Lebítanüxü̃ rü tá nanaxütanügü ga yema chixexü̃ ga naxügüxü̃. Rü ngẽma nixĩ i choma ya Cori ya Tupana namaxã chaxueguxü̃.

Iraétanüxü̃arü muxchiga 24:14

Rü name nax chauchixü̃aneca̱x chataeguxü̃, natürü naxü̃pa nax íchixũxü̃ rü tá cumaxã nüxü̃ chixu i ngẽma guxchaxü̃gü i tá curü duü̃xü̃güca̱x ínanguxẽẽgüxü̃ i ngẽma Iraétanüxü̃ —ñanagürü.

Iraétanüxü̃arü muxchiga 31:16

Erü nümagü nixĩ i Balaáü̃arü ucu̱xẽmaxã nawomüxẽẽgüãxü̃ ga Iraétanüxü̃ nax Tupanamaxã nanuexü̃ca̱x rü Baá-peúxü̃ yacua̱xüü̃güxü̃ca̱x. Rü yema chixexü̃gagu nixĩ ga Tupana nada̱i̱xü̃ ga tatanüxü̃.

Iraétanüxü̃arü muxchiga 31:8

Rü nanadai ga yema 5 ga Madiáü̃tanüxü̃arü ãẽ̱xgacügü ga Éwi, rü Requéü̃, rü Chú, rü Úru, rü Réba. Rü yexgumarüxü̃ ta nayama̱xgü ga Balaáü̃ ga Beúx nane.

Ore i mexü̃ ga Matéu ümatüxü̃ 18:7

Wüxi i taxü̃ i ngechaü̃ nixĩ nax ñoma i naanewa nangẽxmaxü̃ i muxü̃ma i chixexü̃gü i duü̃xü̃güxü̃ chixexẽẽxü̃. Rü guxü̃gutáma nangẽxma i ngẽma chixexü̃gü, natürü wüxi i ngechaü̃xü̃chi nixĩ naxca̱x i ngẽma yatü i toguegüxü̃ pecadugu yixẽẽxü̃.

Ngechuchuarü ngúexü̃gü ga yamugüxü̃arü puracüchiga 21:25

Rü ñu̱xũchi ngẽma yaxõgüxü̃ i tama Yudíugü ixĩgüxü̃, rü marü naxca̱x tanaxümatü ga torü ore nax tama nangõ̱xgüãxü̃ca̱x i namachi i togü norü tupanachicüna̱xãca̱x daixü̃, rü tama nax nangõ̱xgüãxü̃ca̱x ya nagü, rü tama nangõ̱xgüãxü̃ca̱x i naeü̃gü rü ẽ̱xna naxü̃nagü i wẽxnaxãxü̃, rü tama nai i ngexü̃maxã rü ẽ̱xna nai ya yatümaxã inapexü̃ca̱x —ñanagürügü.

Romanos 11:9

Rü Dabí rü ta rü ñanagürü: “Ngẽma duü̃xü̃gü rü norü õnagü i taxü̃gagu rü guxchaxü̃gügu tá nayi, rü ngẽmaca̱x tá napoxcue.

Romanos 14:13

Rü ngẽmaca̱x, Pa Chauenexẽgüx, rü tama name nax tamücügüxü̃ ixuechaxü̃. Rü narümemae nixĩ i nüxü̃ perüxoe i guxü̃ma i chixexü̃ i peenexẽgüxü̃ pecadugu yixẽẽxü̃ rü ẽ̱xna norü õxü̃ chixexẽẽxü̃.

Romanos 14:21

Rü ngẽmaca̱x tama name i cunangõ̱x i namachi, rüe̱xna cuyaxaxü ya bínu, rüe̱xna cunaxü i ta̱xacü i to, ega ngẽmagagu chixexü̃gu cunangu̱xẽẽ̱xgu i cuenexẽ i yaxõxü̃.

Romanos 9:32

¿Rü ta̱xacüca̱x tama aixcüma Tupanape̱xewa nayamexẽxẽ ga norü maxü̃? Yerü nümagü rü yema mugüguama naxĩ nax Tupanape̱xewa yamexü̃ca̱x, rü tama Tupanaaxü̃́ nayaxõgüchaü̃. Rü yemaacü nagu nayarüpucütü ga gumá nuta ya caixpetüruxü̃.

1 Corintios 1:23

Natürü ngẽma ore i toma nüxü̃ tixuxü̃, rü Cristu ga curuchawa ipotacüchiga nixĩ. Rü ngẽma ore rü naãxẽwa nangu̱x i ngẽma Yudíugü. Rü ngẽma duü̃xü̃gü i tama Yudíugü ixĩgüxü̃ca̱x rü wüxi i natüca̱xmamare nixĩ.

1 Corintios 7:2

Natürü ngẽma nax naxü̃nearü ngúchaü̃ naxügümarexü̃ i duü̃xü̃gü, rü narümemae nixĩ i wüxichigü ya yatü rü naxãmaxü̃, rü wüxichigü i nge rü naxãtexü̃.

Popera ga Yudíugü ga yaxõgüxü̃ca̱x ümatüxü̃ 13:4

Rü ngẽma yatügü i ãmaxü̃ rü name i aixcüma naxma̱xü̃ nangechaü̃gü. Rü ngẽxgumarüxü̃ ta i ngexü̃gü, rü name i aixcüma mea natexü̃ nangechaxü̃gü. Rü name i naxma̱xmaxãxicatama rü natemaxãxicatama nanaxü i norü ngúchaü̃. Erü Tupana rü tá nüxna naca rü tá nanapoxcue i ngẽma duü̃xü̃gü i nai i ngexü̃maxã rü ẽ̱xna nai ya yatümaxã maxẽxü̃. Rü aixcüma tá tüxü̃ napoxcue ya guxãma ya yíxema naxma̱xna to i ngexü̃maxã maxü̃́xẽ rü ngẽma natena to i yatümaxã maxü̃́xẽ.

Yochué 24:9

Rü nüma ga Baláx ga Chipóx nane ga gumá Moáanearü ãẽ̱xgacü rü pemaxã nügü nadai. Rü naxca̱x nangema ga Balaáü̃ ga Beúx nane nax chixexü̃ pemaxã naxueguxü̃ca̱x.

Nüxíraxü̃xü̃ ga popera ga Pedru ümatüxü̃ 2:8

Rü Tupanaarü ore rü ñanagürü ta: “Ngẽma tama yaxõgüxü̃ rü yimá nutagu tá nayarüpucutügü”, ñanagürü. Rü ngẽmaãcü i ngẽma tama yaxõgüxü̃ rü tá napoxcue, erü tama nanayauxgü i ngẽma ore ya Ngechuchu ya Cristuchiga ixĩxü̃.

Norü taxre ga popera ga Pedru ümatüxü̃ 2:15

Rü ngẽma ngu̱xẽẽruü̃netagü rü tama nagu naxĩ i ngẽma Tupana nüxü̃́ naxwa̱xexü̃, rü ngẽmaca̱x inayarütauxe. Rü nagu naxĩ ga yema chixexü̃ ga nagu yaxũxü̃ ga nũxcümaü̃xü̃ ga Balaáü̃ ga Bochú nane ga chixexü̃gu diẽru ngĩxü̃ yauxchaü̃xü̃.

Popera ga Yúda ümatüxü̃ 1:11

Rü wüxi i ngechaü̃xü̃chi nixĩ naxca̱x i ngẽma duü̃xü̃gü erü Caíü̃ ga naenexẽxü̃ imáxü̃rüxü̃ nixĩgü. Rü ãẽ̱xgacü ga Balaáü̃rüxü̃ diẽruca̱x chixexü̃ naxügü. Rü Corérüxü̃ tama Tupanaga naxĩnüechaü̃, rü ngẽmaca̱x tá nayue.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:20

Natürü nangẽxma i wüxi i cuxüxü̃ i tama chorü me ixĩxü̃. Rü ngẽma nixĩ nax ngéma cunangexmaxẽẽechaü̃ i ngẽma ngexü̃ i Yechabé i nügü ixuxü̃ nax Tupanaarü orearü uruxü̃ nax yixĩxü̃. Natürü norü ngu̱xẽẽtaemaxã chorü duü̃xü̃güxü̃ nawomüxẽxẽ, rü nüxü̃́ nangũchaü̃xẽxẽ nax ngexü̃gü i naxü̃nemaxã taxexü̃maxã namaxẽxü̃ca̱x, rü nangõ̱xgüãxü̃ca̱x i ngẽma õnagü i tupananetachicüna̱xãgüca̱x daixü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:4

Natürü nangẽxma i wüxi i cucüma i tama chorü me ixĩxü̃. Rü ngẽma nixĩ nax tama noxrirüxü̃ choxü̃ cungechaü̃xü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:8

Natürü ngẽma muü̃exü̃ rü ngẽma tama yaxõgüxü̃, rü nawa tá nawoü̃ ya yima naxtaxa ya üxümaxã iya̱u̱xrachiüne ya achúfremaxã ixaxü̃ne. Rü ngẽxgumarüxü̃ ta i ngẽma aixwa̱xegüxü̃, rü ngẽma máetagüxü̃, rü ngẽma naxü̃nearü ngúchaü̃gu maxẽxü̃, rü ngẽma iyuüxü̃, rü ngẽma tupananetachicüna̱xãxü̃ icua̱xüü̃güxü̃, rü ngẽma idorata̱a̱xgüxü̃, rü nawa tá nawoü̃ ya yima naxtaxa ya üxümaxã iya̱u̱xrachiüne ya achúfremaxã ixaxü̃ne. Rü ngẽma nixĩ i poxcu i taguma iyacuáxü̃”, ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 22:15

Natürü taxũtáma yima ĩanewa nichocu i ngẽma chixexü̃gü maxẽxü̃, rü ngẽma iyuüxü̃, rü ngẽma naxü̃nearü ngúchaü̃gu maxẽxü̃, rü ngẽma máetagüxü̃, rü ngẽma tupananetachicüna̱xãgüxü̃ icua̱xüü̃güxü̃, rü ngẽma womüxẽẽwa̱xegüxü̃ rü taxũtáma nawa nichocu ya yima ĩane.