Ochéa 8:1 - Tupanaarü Ore

¹ Rü ñanagürü ta: —¡Pa Dauxü̃taeruxü̃x, nagu icue i curü cornéta! Erü ñoma wüxi i ĩyü i nawemü tüxü̃ iyaxuxü̃rüxü̃ ñomama nixĩ i ngẽma uanügü i chorü duü̃xü̃güarü daiwa ĩxü̃. Rü ngẽma guxchaxü̃ tá naxca̱x ínangu i chorü duü̃xü̃gü erü tama nayanguxẽẽgü i ngẽma uneta ga namaxã chaxüxü̃ rü tama naga naxĩnüe i chorü mugü.

Ochéa 8:1 Iomraidhean Croise

Norü taxre ga popera ga ãẽ̱xgacügüchiga 18:27

Natürü ga yema Achíriaanearü churaragüeru rü nanangãxü̃ga rü ñanagürü: —Tama curü ãẽ̱xgacüca̱x rü bai i pexca̱x yixĩxü̃ nax yima Achíriaanearü ãẽ̱xgacü nua choxü̃ muxü̃ nax nüxü̃ chixuxü̃ca̱x i ñaa ore. Rü ngẽma duü̃xü̃gü i ĩanearü poxeguxü̃tápü̱xétüwa rüdaunüxü̃ca̱x nixĩ i chidexaxü̃, erü nümagü rü perüxü̃ tátama naü̃ nangõ̱xgüxü̃ rü naxü̱̃xü̃ yaxaxgüxü̃ —ñanagürü.

Ichaía 18:3

Rü guxãma i pemax, Pa Ñoma i Naanecüã̱xgü Ixĩgüxe, rü ma̱xpǘnechitaeruwa tá nüxü̃ pedau ya yima wonera ya ngéma wã̱ĩ̱xnagücü, rü tá nüxü̃ pexĩnüe i ngẽxguma naxãgagu ya yima cornéta.

Ichaía 24:5

Rü ngẽma duü̃xü̃gü i nawa maxẽxü̃ i ñoma i naane rü chixexü̃maxã nanapáxẽẽgü, erü tama nayanguxẽẽgü i Tupanaarü mugü, rü tama naga naxĩnüe i norü ucu̱xẽgü. Rü woo Tupanamaxã nüxü̃ nixugüe nax guxü̃gutáma yanguxẽẽgüãxü̃ ga yema uneta ga Tupanamaxã naxügüxü̃, natürü tama aixcüma nayanguxẽẽgü.

Ichaía 58:1

Rü Tupana rü Ichaíaxü̃ ñanagürü: —¡Tagaãcü aita naxü rü taxṹ i cumuü̃xü̃! ¡Rü nataga ñoma wüxi ya cornétarüxü̃! ¡Rü yangagü i ngẽma Acóbuarü duü̃xü̃gü i Iraétanüxü̃ nagagu i norü chixexü̃gü rü norü pecadugü!

Yeremía 31:32

Ngẽma uneta rü taxũtáma yema nüxíraxü̃xü̃ ga uneta ga perü o̱xigümaxã chaxüxü̃rüxü̃ tá nixĩ, yerü yexguma Equítuanewa íchananguxü̃xẽẽgu rü nümagü rü tama aixcüma nayanguxẽẽgü ga yema chorü uneta woo norü yora nax chixĩxü̃ ga chomax. Rü chomatama ya Cori ya Tupana nixĩ i nüxü̃ chixuxü̃ i ngẽma.

Yeremía 34:18

Rü ñanagürü ta: —Yema Yudáanearü ãẽ̱xgacügü rü Yerucharéü̃arü ãẽ̱xgacügü rü wüxigu namaxã ga yema ãẽ̱xgacüpatawa puracüexü̃, rü chacherdótegü rü guxü̃ma ga Iraétanüxü̃ rü marüchire̱x chope̱xewa penaxü ga wüxi ga uneta. Rü penadate ga wüxi ga wocaxacü rü naxmachate̱xewa pechopetü nax yemawa penawéxü̃ca̱x nax aixcüma tá peyanguexẽẽxü̃ ga yema uneta.

Yeremía 4:13

Dücax, ngẽma tórü uanügü rü ñoma caixanexü̃rüxü̃ ningaicamaetanü, rü ngẽma norü carugü i dairuxü̃ rü ñoma buanecü ya poracürüxü̃ nixĩgü. Rü ngẽma norü cowarugü rü ĩyüxü̃ narüporamaegü. Rü yíxema rü marü taxuacüma tibuxmü.

Yeremía 4:5

Rü Cori ya Tupana rü ñanagürü: —¡Yerucharéü̃arü ĩanewa rü Yudáanewa nüxü̃ pixugügü i ngẽma ãũcümaxü̃ i tá pexca̱x ínguxü̃! ¡Rü guxü̃ma i Yudáanewa cornétamaxã penaxunagü i ngẽma ãũcümaxü̃! ¡Rü tagaãcü ñapegügü: “Ngĩxã rü yima ĩanegü ya ípoxegugünegu tayangutaque̱xegü”, ñapegügü!

Yeremía 48:40

Rü nüma ya Cori ya Tupana rü ñanagürü: —Ngẽma Moáanearü uanügü rü naxca̱x ínayaxüãchi ñoma wüxi i ĩyü rü naeü̃ca̱x nagoxü̃rüxü̃.

Yeremía 49:22

Rü Edóü̃anearü uanügü rü ĩane ya Bochráca̱x tá ínayaxüãchi ñoma wüxi i ĩyü rü naeü̃ca̱x inagoxü̃rüxü̃. Rü Edóü̃arü churaragü rü tá norü muü̃maxã nidu̱xrue ñoma wüxi ya ngexe ya íxraxacüxerüxü̃ —ñanagürü.

Yeremía 51:27

¡Daiarü cua̱xruxü̃ ya wonera penawe̱x rü nachixü̃anegüwa peyacue i cornétagü nax Babiróniaanearü ĩaneca̱x ípeyaxüãchixü̃ca̱x i pema i togü i nachixü̃anegüarü ãẽ̱xgacügü i Araráanearü ãẽ̱xgacü, rü Miníanearü ãẽ̱xgacü, rü Aquenáanearü ãẽ̱xgacü! ¡Rü nüxü̃ pexuneta i wüxi i churaragüeru nax namaxã inacuáxü̃ca̱x i ngẽma churaragü i daiwa ĩxü̃! ¡Rü inaxĩãchi i ngẽma churaragü i cowaruétügu ĩxü̃ i ñoma munügü i guxü̃ i chixexẽẽxü̃rüxü̃ ixĩgüxü̃!

Yeremía 6:1

¡Pa Duü̃xü̃gü i Bẽyamíü̃anecüã̱gü, ẽcü paxa ípechoxü̃ nawa ya yima ĩane ya Yerucharéü̃ rü pibuxmü! ¡Rü pema i Tecóawa ngẽxmagüxe rü cornéta picuegü nax naxuãẽgüxü̃ca̱x i duü̃xü̃gü! ¡Rü Bex-aqueréü̃wa rü wüxi i ta̱xacüwa penangĩxichi nax wüxi i cua̱xruxü̃ i caixemaxü̃ pu̱xnagüxü̃ca̱x! Erü wüxi i taxü̃ i ãũcümaxü̃ rü nórtewaama ne naxũ.

Echequié 16:59

Rü choma ya Cori ya Tupana rü cuxü̃ ñachagürü: Cuxü̃ tá chapoxcu, erü tama cuyanguxẽxẽ ga yema chomaxã cuxueguxü̃, rü ñu̱xũchi tama cuyanguxẽxẽ ga yema uneta ga chomaxã cuxüxü̃.

Echequié 17:3

¡Rü Iraétanüxü̃maxã nüxü̃ ixu i ñaa chorü ore i ñaxü̃! “Wüxi ga ĩyü ga taxüchixü̃ rü Líbanunecüwa nangu. Rü guma naxpe̱xatügü rü nitaxüchi rü nanaguxü̃raü̃ ga namatüpe̱xatü. Rü inayacawe ga wüxi ga ocayiwaarü doxchacaxü̃. Rü ñu̱xũchi wüxi ga nachixü̃ane ga taxetanüxü̃ nagu ãpatagüxü̃gu nayato, nagu ga wüxi ga ĩane ga taxetanüxü̃ nawa muxü̃.

Echequié 7:14

Rü nayacuegü tá ya cornéta nax daiwa naxĩxü̃ca̱x, rü guxü̃táma nügü nimexẽẽgü, natürü taxuxü̃táma daiwa naxũ. Rü chorü numaxã tá chapoxcue i guxü̃ma i ngẽma Iraétanüxü̃.

Ochéa 4:6

Rü chorü duü̃xü̃gü rü chixexü̃gu nayi rü nayue erü tama chorü mugüxü̃ nacua̱xgü. Rü ngẽma rü cugagu nixĩ, Pa Chacherdótex, erü cuma rü ta nüxü̃ cuxo i chorü mugü. Rü ngẽmaca̱x i choma rü ta cuxü̃ chaxo nax chorü chacherdóte quixĩxü̃. Erü cumax rü nüxü̃ icurüngüma i chorü ucu̱xẽgü rü ngẽmaca̱x i choma rü tá ta nüxü̃ icharüngüma i ngẽma cutaagü.

Ochéa 5:8

¡Rü Guibeáwa peyacue ya cornéta, rü Ramáwa rü ta peyacue nax nangutaque̱xegüxü̃ca̱x i duü̃xü̃gü! ¡Rü Bex-abéü̃wa rü tagaãcü duü̃xü̃gümaxã nüxü̃ pixu nax nügü namexẽẽgüxü̃ca̱x nax daiwa naxĩxü̃ca̱x! ¡Rü Bẽyamíü̃tanüxü̃maxã nüxü̃ pixu nax nügü namexẽxẽgüxü̃ca̱x!

Ochéa 6:7

Natürü i pemax i chorü duü̃xü̃gü nax pixĩgüxü̃ rü Adáü̃rüü̃tama pixĩgü. Rü tama chauga pexĩnüe rü tama peyanguxẽxẽ i ngẽma uneta i chomaxã pexüxü̃.

Ochéa 9:15

Tupana rü ñanagürü: —Pemax, Pa Iraéanecüã̱xgüx, rü Guirigáwa nixĩ ga penaxüxü̃ ga naguxü̃raü̃xü̃ ga chixexü̃. Rü yéma nixĩ ga ichaxügüxü̃ nax pexchi chaxaixü̃. Rü ngẽma perü chixexü̃gagu rü tá pexü̃ íchawoxü̃ i chorü naanewa. Rü marü taxũtáma pexü̃ changechaü̃ erü guxü̃ma i perü ãẽ̱xgacügü rü tama chauga naxĩnüe.

Joel 2:1

¡Rü yima ma̱xpǘne ya Chióü̃wa peyacue ya cornéta! ¡Rü yima ma̱xpǘne ya Tupanapata nawa ngẽxmanewa rü tagaãcü peyacue ya cornéta ya ãũcümaxü̃xü̃ ixüxü̃ne! ¡Rü muü̃maxã pidu̱xrue i guxãma i pema i Yudáanewa pemaxẽxü̃! Erü Cori ya Tupanaarü ngunexü̃ rü marü ningaica. Rü ngẽma ngunexü̃ rü taxü̃ i waanexü̃ tá nixĩ. Rü tá narüxcaixane rü caixanexü̃ i pamüemaxü̃ tá nangẽxma. Rü muxũchixü̃ i munügü tá ínangugü. Rü ñoma wüxitücumü i churaragü i poraexü̃ rü muxũchixü̃rüxü̃ tá nixĩgü. Rü ñoma ngexwaca yangunegu rü guxü̃wama ma̱xpǘneétüwa nangu nax yangóonexü̃ rü ngẽxgumarüxü̃ tá nixĩgü nax guxü̃wama nangugüxü̃ i ngẽma munügü. Rü nũxcüma rü taguma ngẽxgumarüxü̃ ixĩxü̃xü̃ tadau, rü tagutáma wena nüxü̃ tadau i ta̱xacü i nangexgumaraxü̃xü̃.

Joel 2:15

Rü pemax, Pa Chacherdótegüx ¡yima ma̱xpǘne ya Chióü̃ ya Tupanapata nawa ngẽxmanewa peyacue ya trompetagü nax ngẽmaãcü naxca̱x pecaxü̃ca̱x i duü̃xü̃gü! ¡Rü penaxunagü nax aureãcüma nayumüxẽgüxü̃ca̱x!

Amúx 3:6

Rü ngẽxguma ĩanewa yacuegüãgu ya cornéta rü ngẽmawa duü̃xü̃gü nüxü̃ nacua̱x nax nangẽxmaxü̃ i ãũcümaxü̃. Rü ngẽxguma ta̱xacürü guxchaxü̃ ngupetügu i ĩanewa rü nüxü̃ tacua̱x nax Cori ya Tupana yixĩxü̃ i ngéma namuxü̃ i ngẽma guxchaxü̃.

Amúx 8:3

Rü ñanagürü ta: —Ngẽma ngunexü̃gu rü ngẽma ãẽ̱xgacüpatawa taãẽãcü nax nawiyaegüxü̃ rü tá ngechaü̃xü̃ nananguxuchi. Erü ngẽma ngunexü̃gü rü muxü̃tama i duü̃xü̃gü nayue. Rü bexma tá düxétüguama ínanawoxü̃ i ngẽma yuexü̃ —ñanagürü ya Cori ya Tupana.

Amúx 9:1

Nüxü̃ chadau ga Cori ya Tupana. Rü nüma rü ngẽma tupananetagüarü ãmarearü guruü̃xü̃tagu nachi, rü ñanagürü choxü̃: —¡Daa tupananetapataarü caxtagüerugu napogü nax duü̃xü̃güétü nangutaü̃xü̃ca̱x rü ngẽxma nayuexü̃ca̱x! Rü ngẽma maxẽxü̃ rü woo nabuxmügu rü norü uanügü tá taramaxã nanadai. Rü ngẽmaãcü taxuxü̃táma niña.

Abacú 1:8

Rü norü cowarugü rü aixü̃ narüporamaegü, rü naixnecücüã̱x i airugüarü yexera nidürae. Rü norü churaragü i cowarugu ĩxü̃ rü muxü̃ inaxĩ. Rü nümagü rü ñoma ĩyü i naeü̃ca̱x yáxü̃wa ne ñaxü̃rüxü̃ nixĩgü.

Chofonía 1:16

Rü ngẽma ngunexü̃gu rü norü uanügü rü tá yima ĩanegü ya ípoxegugüneca̱x ínayaxüãchi. Rü daica̱x tá nayacue i norü cornétagü rü aixta tá naxüe. Rü nagu tá napogüe ya yima ĩanegüarü poxeguxü̃ rü norü dauxü̃taechicagü i máchanexü̃.

Chacaría 11:1

Pa Líbanux, ¡yawãxna i curü ĩã̱x nax ngẽma üxüema ínaguxü̃ca̱x i curü ocayiwagü!

Chacaría 9:14

Rü nüma ya Cori ya Tupana rü tá norü duü̃xü̃gütanüwa nügü nawe̱x. Rü ngẽxguma nama̱xgüãgu i norü chuxchigü rü ñoma ãẽmacürüxü̃ tá nixĩgü. Rü nüma ya Cori ya Tupana rü tá nagu nicue i norü trompéta. Rü ñoma buanecü ya tacü ya súrwaama ne ũcügurüxü̃ tá nixũ.

Ore i mexü̃ ga Matéu ümatüxü̃ 24:28

Rü duü̃xü̃gü rü tá cha̱u̱xca̱x nangutaque̱xegü ñoma ẽxchagü nawemüca̱x ngutaque̱xexü̃rüxü̃.

1 Corintios 15:52

Rü ngürüãchimare wüxi i peãxetügu tá nixĩ i ngẽma nax naxüchicüüxü̃ i taxü̃ne i ngẽxguma naanearü guxgux naxãgagu ya cornéta. Rü tá naxãga ya yimá cornéta, rü ngẽxguma i ngẽma duü̃xü̃gü i yuexü̃ rü tá ínarüdagü nax tagutáma wena nayuexü̃ca̱x. Rü yixema nax imaxẽxü̃ rü tá naxüchicüü i taxü̃negü.

Wenaxarü naxümatü ga Tupanaarü mugü 28:49

Rü Cori ya Tupana rü wüxi i nachixü̃ane i yáxü̃wama ngẽxmaxü̃ i tama nagaxü̃ cucuáxü̃ tá cuxca̱x ínayachoõchixẽxẽ, ñoma wüxi i ĩyü i goexü̃ i poraxüchixü̃rüxü̃.