Ochéa 2:7 - Tupanaarü Ore

⁷ Rü tá nawe irüxũ i ngẽma yatügü i namaxã namaxü̃xü̃ rü tá naxca̱x idau, natürü taxũtáma nüxü̃ iyangau. Rü ngẽmaca̱x düxwa tá ngĩãẽwa ngĩgürügü: “Naxca̱x tá chataegu ya yimá nüxíraü̃cü ya chaute yerü gumámaxã nixĩ ga mexü̃ choxü̃ ngupetüxü̃ ñu̱xmaarü yexera”, ngĩgürügü.

Ochéa 2:7 Iomraidhean Croise

Norü taxre ga to ga popera ga ãẽ̱xgacügüchiga ümatüxü̃ 28:23

Rü yema nax Chíriaanearü churaragü rü ü̃pa Acháxü̃ rüporamaegüxü̃ ga yexguma namaxã nügü nadaixgu, rü yemaca̱x Acháx nagu narüxĩnü nax naporaxü̃ ga yema Damácuarü tupanagü. Rü yemaca̱x naxca̱x ãmaregü ínagu yerü nagu narüxĩnü nax nümagü rü tá nüxü̃ nangü̃xẽxẽxü̃ ega naxca̱x ãmare ínaguxgu. Natürü yema tupananetagügagu nixĩ ga guxchaxü̃ Acháxca̱x rü guxü̃ma ga Iraétanüxü̃ca̱x ínguxü̃.

Wiyaegü 116:7

Rü ñu̱xma rü wenaxarü chataãxẽ yerü nüma ga Cori ya Tupana rü chomaxã namecüma rü choxü̃ ínapoxü̃ nax tama chayuxü̃ca̱x rü tama axu ínguxü̃ca̱x rü tama chixexü̃gu changuxü̃ca̱x.

Yeremía 14:22

Pa Cori ya Tupana, nataxuma i tupananetachicüna̱xã i cuxrüxü̃ nüxü̃ cuáxü̃ nax napuxẽẽãxü̃. Rü taxucürüwa i dauxü̃guxü̃ i naane nüechamatama nanapuxẽxẽ. Rü cuma nixĩ i ícunanguxẽẽxü̃ ya pucü, rü cuma nixĩ i cunaxüxü̃ i guxü̃ma i ta̱xacü i ngẽxmaxü̃. Rü cuma nixĩ i aixcüma torü Tupana quixĩxü̃. Rü ngẽmaca̱x nixĩ i cuxü̃tawa ítayanguxẽẽxü̃ i curü ngü̃xẽxẽ —ñanagürü ga Yeremía.

Yeremía 2:2

—¡Ngéma naxũ rü namaxã idexa i ngẽma Yerucharéü̃cüã̱x i duü̃xü̃gü! ¡Rü nataga nax mea nüxü̃ naxĩnüexü̃ca̱x i ñaa chorü ore i ñaxü̃! “Choma ya Tupana rü nüxna chacua̱xãchi rü yexguma noxri choxü̃ pecua̱xgügu rü mea chauga pexĩnüe. Rü yexguma noxri chorü duü̃xü̃gü pexü̃ chixĩxẽẽgu, rü choxü̃ pengechaü̃gü ñoma wüxi i nge i ngexwaca ãtecü rü ngĩtexü̃ ngechaü̃cürüxü̃. Rü yema choxü̃ nax pengechaü̃xü̃gagu rü chowe perüxĩ ga ínachianexü̃wa ga taxuxü̃ma i nanetü írüxüxü̃wa.

Yeremía 2:28

Pa Yudátanüxü̃x, ¿ngexü̃gü nixĩ i ngẽma tupananetachicüna̱xãgü ga pematama pexügüxü̃? Pema rü perü ĩanegüe̱xpü̱x nixĩ i ngẽma perü tupananetachicüna̱xãgü. ¡Ẽcü nua naxĩ i ngẽma naxchicüna̱xãgü nax nüxü̃ pedauxü̃ca̱x rü tá aixcüma pexü̃ yanangü̃xẽẽgü i ngẽxguma guxchaxü̃ pexca̱x ínguxgu!

Yeremía 2:36

¿Rü ta̱xacüca̱x cuñu̱xãẽxü̃chi nax naxca̱x cudauxü̃ i to i nachixü̃anearü ngü̃xẽxẽ? Rü ngẽma Equítuane rü tá cumaxã ínayatü, yema Achíriaane cumaxã íyatüxü̃rüxü̃.

Yeremía 3:1

Cori ya Tupana rü ñanagürü: —Rü ngẽxguma wüxi i yatü rü naxma̱xü̃ ínata̱xgu, rü ngẽxguma marü nüxna tixũgachigu i tüma rü to i yatümaxã taxãtegu, rü nüma i ngẽma tüxü̃ ítáxü̃ rü marü taxũtáma wena tümamaxã naxãxma̱x. Rü ngẽma rü wüxi i taxü̃ i chixexü̃ tá nixĩ naxca̱x i ngẽma nachixü̃ane. Natürü i pemax, Pa Yudátanüxü̃x, rü mucü ga tupananetachicüna̱xãgüwe perüxĩ. ¿Rü ñuxãcü nagu perüxĩnüe nax cha̱u̱xca̱x pewoeguxü̃? Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Yeremía 31:18

Rü Cori ya Tupana rü ñanagürü: —Marü nüxü̃ chaxĩnü nax auxeãcü chomaxã yadexagüxü̃ i Efraíü̃tanüxü̃ rü ñanagürügü: “Toma rü ñoma wüxi i wocaxacü i tama íyapuxü̃rüxü̃ tixĩgü. Natürü i cuma rü marü toxü̃ ícuyapuexẽxẽ. ¡Rü cugüca̱x toxü̃ nawoeguxẽxẽ! Erü cuma nixĩ i torü Cori ya Tupana quixĩxü̃.

Yeremía 31:32

Ngẽma uneta rü taxũtáma yema nüxíraxü̃xü̃ ga uneta ga perü o̱xigümaxã chaxüxü̃rüxü̃ tá nixĩ, yerü yexguma Equítuanewa íchananguxü̃xẽẽgu rü nümagü rü tama aixcüma nayanguxẽẽgü ga yema chorü uneta woo norü yora nax chixĩxü̃ ga chomax. Rü chomatama ya Cori ya Tupana nixĩ i nüxü̃ chixuxü̃ i ngẽma.

Yeremía 44:17

Rü toma rü tá tanaxüama i ngẽma toma nagu tarüxĩnüexü̃ nax tanaxüxü̃. Rü torü tupana i “Dauxü̃guxü̃ i Naanearü Ãẽ̱xgacümaxã”, inaxugücü rü ngĩxca̱x tá tayagu i pumarate̱xe rü ngĩxna tá tanaxã ya bínu. Rü ngẽma ñu̱xma taxüxü̃ rü guxü̃gutáma tanaxü naxrüxü̃ ga yema torü o̱xigü, rü torü ãẽ̱xgacügü, rü Yudáanearü ĩanegüarü ãẽ̱xgacügü, rü yema Yerucharéü̃cüã̱xgü. Yerü ü̃pa rü toxü̃́ nayexma ga muxü̃ma ga õna, rü mea toxü̃ nangupetü rü taxuxü̃ma ga guxchaxü̃ toxca̱x ínangu.

Echequié 16:18

Rü yema cuxchirugü ga imematüxü̃gu cuyacu̱xgüxẽxẽ ga yema naxchicüna̱xãgü, rü nüxna cunaxãmare ga yema chorü chíxü̃ rü chorü pumarate̱xe.

Echequié 16:8

Rü wena cuxü̃tawa chaxüpetü rü cuxü̃ chadau ga marü nax cuyaxü̃ rü ãmücügu nax curüxĩnüxü̃. Rü ñu̱xũchi wüxi ga mámüxü̃ ga naxchirumaxã cuxü̃ chidüxü yerü cungexchiru. Rü ñu̱xũchi cumaxã chaxüga rü cumaxã nüxü̃ chixu nax choxrü quixĩxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma.

Echequié 20:32

Rü pema rü naxca̱x pedauxü̃taechaü̃ i nacüma i ngẽma togü i nachixü̃anegü i ñoma i naanewa ngẽxmagüxü̃. Nümagü rü namaxã natupanaã̱xgü rü nüxü̃ nicua̱xüü̃gü i naxchicüna̱xãgü i nainaxca̱x rü nutanaxca̱x, natürü i pema rü taxũtáma ngẽmaãcü penaxü.

Echequié 23:12

Rü ngĩma ga Aoribá rü yema ngĩeya̱xrüü̃tama yema Achíriaanecüã̱xgümaxã ixãarüã̱x. Rü nümaxü̃ rü ãẽ̱xgacügü nixĩgü rü togü rü churaragüerugü nixĩgü. Rü nümagü rü ningextü̱xü̱x rü nimechametü rü nimechiru. Rü churaragü i meama nüxü̃ icuáxü̃xü̃ i cowarugu ĩxü̃ nixĩgü.

Echequié 23:22

Natürü i choma nax curü Tupana chixĩxü̃, rü cumaxã nüxü̃ chixu rü ñachagürü: “Ngẽma nüxü̃ cungechaü̃güxü̃ ga noxri rü ñu̱xmax rü nawa cuxãũãx. Rü choma rü tá curü uanügüxü̃ chayaxĩgüxẽxẽ. Rü guxü̃ i nachixü̃anewa tá cuxca̱x ne naxĩ.

Echequié 23:4

Rü yema rüyamaecü rü Aorá nixĩ ga ngĩéga. Rü ngĩma rü ĩane ya Chamáriachiga nixĩ. Rü yéma rübumaecü rü Aoribá nixĩ ga ngĩéga. Rü ngĩma rü ĩane ya Yerucharéü̃chiga nixĩ. Rü choma rü ngĩmaxã chaxãma̱x ga yema taxre ga ngegü. Rü ngĩmagü rü choxü̃́ yaxaxãcü rü iyaxãne.

Danié 4:17

Rü yema nixĩ ga yema naimaxã naxuegugüxü̃ ga yema ixüünexü̃ ga dauxü̃cüã̱x ga dauruü̃gü ixĩgüxü̃. Yerü nanaxwa̱xegü nax guxü̃ma i duü̃xü̃gü nüxü̃ cua̱xgüxü̃ nax nüma ya Tupana ya Guxãétüwa Ngẽxmacü rü nüxü̃́ nangẽxmaxü̃ i pora nax namaxã inacuáxü̃ i ngẽma nachixü̃anegüarü ãẽ̱xgacügü i ñoma i naanewa ngẽxmagüxü̃. Rü nüma nixĩ i nüxü̃ naxunetaxü̃ i ngẽma nüma nanaxwa̱xexü̃ nax ãẽ̱xgacügü yixĩgüxü̃. Rü nüma rü nüxü̃́ nangẽxma i pora nax nachixü̃anearü ãẽ̱xgacüxü̃ yangucuchixẽẽãxü̃ i ngẽma duü̃xü̃ i noxri taxuxü̃ma ixĩxü̃’, ñanagürü ga yema dauxü̃cüã̱x.

Danié 4:25

Erü cumax, Pa Ãẽ̱xgacüx, rü taxũtáma duü̃xü̃gütanüwa cungexma, rü naxü̃nagütanüwa tá cumaxü̃ rü wocagürüxü̃ tá maxẽ cunangõ̱x, rü cherena rü tá cuxü̃ niwaixẽxẽ. Rü ngẽmaãcü tá cumaxü̃ i 7 ya taunecü ñu̱xmatáta naxca̱x íquicuáx nax texé yixĩxü̃ ya yimá namaxã icuácü i guxü̃ma i ãẽ̱xgacügü i ñoma i naanewa ngẽxmagüxü̃. Erü nüma nixĩ i tüxü̃ yamucuchixü̃ ya yíxema nüma natümawa̱xéxe nax ãẽ̱xgacü tixĩxü̃ca̱x.

Danié 4:32

Rü duü̃xü̃güna tá quixũgachi rü naxü̃natanüwa tá cumaxü̃, rü wocagürüxü̃ tá maxẽmaxã cuxãwemü i 7 ya taunecü. Rü ngẽmaãcü tá quixĩ ñu̱xmatáta nüxna cucua̱xãchi nax Tupana yixĩxü̃ ya yimá nüxü̃́ nangẽxmacü i pora nax namaxã inacuáxü̃ i guxü̃ma i nachixü̃anegü i ñoma i naanewa ngẽxmagüxü̃. Rü nüma nixĩ i tüxü̃ yangucuchixẽẽxü̃ nax ãẽ̱xgacü tixĩxü̃ ya yíxema nüma norü me ixĩxẽ —ñanagürü.

Danié 5:21

Rü duü̃xü̃güna nixũgachi rü yema norü ĩnü rü naxü̃nagüarü ĩnürüxü̃ nixĩ. Rü naixnecücüã̱x ga búrugütanüwa namaxü̃. Rü wocagürüxü̃ maxẽ nanangõ̱x rü cherenamaxã niwaixine. Rü yemaacü nüxü̃ nangupetü ñu̱xmata düxwa nüxna nacua̱xãchi nax yimá Tupana ya Guxãétüwa Ngẽxmacü nax nüxü̃́ ngẽxmaxü̃ i pora nax namaxã inacuáxü̃ i guxü̃ma i ãẽ̱xgacügü i ñoma i naanewa ngẽxmagüxü̃. Rü nüma ya Tupana rü ãẽ̱xgacüxü̃ tüxü̃ nixĩxẽxẽ ya yíxema nüma norü me ixĩxẽ nax ãẽ̱xgacü tixĩxü̃ca̱x.

Ochéa 1:2

Rü ñaa nixĩ ga yema nüxíraxü̃xü̃ ga ore ga Cori ya Tupana Ochéamaxã nüxü̃ ixuxü̃. Rü ñanagürü nüxü̃: —Ngẽma Iraéanecüã̱x rü ñoma wüxi i ngexü̃ i natena ngeãẽxü̃rüxü̃ choxna nixĩgachi. Rü cumax, Pa Ochéax, rü wüxi i cua̱xruxü̃ tá quixĩ naxca̱x i ngẽma duü̃xü̃gü. ¡Rü ngẽmaca̱x i ñu̱xma rü wüxi i nge i naxü̃nemaxã taxexü̃maxã naxãxma̱x rü ngĩwa naxãxacü! Rü ngẽmaãcü i ngẽma cuxacügü rü wüxi i nge i ngeãẽcüxacügü tá nixĩgü —ñanagürü.

Ochéa 13:6

Rü pexna chanaxã ga õna rü meama pechibüe, natürü pema rü pegü picua̱xüü̃gü rü choxü̃ perüngümae.

Ochéa 14:1

Pa Iraéanecüã̱xgüx, pema nax perü chixexü̃gagu guxchaxü̃gu peyixü̃x ¡rü naxca̱x pewoegu ya Cori ya perü Tupana!

Ochéa 2:16

Rü ngẽxguma rü tá: “Pa Cuxü̃ Tangechaxü̃cüx”, ñanagürügü choxü̃ rü tama “Pa Torü Yora i Baáx”, ñanagürügü. Rü choma i Cori ya Tupana nixĩ i nüxü̃ chixuxü̃ i ngẽma.

Ochéa 5:13

Rü ngẽxguma Efraíü̃tanüxü̃ rü Yudáanecüã̱xgü nüxü̃ daugügu nax taxü̃ i guxchawa nangẽxmagüxü̃, rü Efraíü̃tanüxü̃ rü tá Achíriaanearü ãẽ̱xgacüna ngü̃xẽẽca̱x nayacagü. Natürü nüma i Achíriaanearü ãẽ̱xgacü rü taxũtáma nüxü̃ narüngü̃xẽxẽ.

Ochéa 5:15

Rü ñu̱xũchi chopataca̱x tá chataegu, rü ngéma tá changexma ñu̱xmatáta nümatama nüxü̃ yacua̱xãchitanü nax chixexü̃ naxügüxü̃. Rü ngẽxguma ngúxü̃ yangegügu rü tá aixcüma cha̱u̱xca̱x nada̱u̱xgu —ñanagürü ga Tupana.