Ochéa 2:2 - Tupanaarü Ore

² Rü nüma ya Cori ya Tupana rü ñanagürü: —Pa Iraétanüxü̃x, ¡ípenaxuaxü̃ i ngẽma pechixü̃ane i ñoma peérüxü̃ ixĩxü̃! Erü norü duü̃xü̃gü rü marü choxna nixĩgachi, rü ngẽmaca̱x i pechixü̃ane rü marü tama choxrü nixĩ rü choma rü marü tama norü Tupana chixĩ. ¡Rü norü duü̃xü̃gümaxã nüxü̃ pixu nax naxoexü̃ nax ñoma wüxi i ngexü̃ i ngeãẽcürüxü̃ chixexü̃ naxügüxü̃! ¡Rü namaxã nüxü̃ pixu nax nüxna yaxĩgachixü̃ i ngẽma tupananetagü i nüxü̃ nangechaü̃güxü̃!

Ochéa 2:2 Iomraidhean Croise

Ichaía 11:12

Rü nüma ya Cori rü guxü̃ i nachixü̃anegüxü̃ tá nüxü̃ nadauxẽxẽ i wüxi i cua̱xruxü̃. Rü tá nanangutaque̱xexẽxẽ i ngẽma Iraétanüxü̃ i woonexü̃. Rü naanearü guxü̃wama tá ne nanagagü nax nanutaque̱xeãxü̃ i ngẽma duü̃xü̃gu i Yudáanecüã̱x ga woonemarexü̃.

Ichaía 50:1

Nüma ya Tupana rü ñanagürü nüxü̃: —Pa Iraétanüxü̃x, ¡Taxṹ i nagu perüxĩnüexü̃ nax íchanatáxü̃ i perü mama i Iraéane ñoma wüxi ya yatü naxma̱xü̃ ítáxü̃rüxü̃! ¡Rü taxṹ i nagu perüxĩnüexü̃ nax pemaxã chataxexü̃ nax togüarü mugüruxü̃ pixĩgüxü̃ca̱x rü yemaacü chanaxütanüxü̃ca̱x ga wüxi ga chorü ngetanü! Rü pemaxã chataxe nagagu ga yema perü pecadugü yerü tama chauga pexĩnüechaü̃. Rü perü mama i Iraéane rü íchanata̱x yerü pema rü tama chauga pexĩnüe.

Ichaía 58:1

Rü Tupana rü Ichaíaxü̃ ñanagürü: —¡Tagaãcü aita naxü rü taxṹ i cumuü̃xü̃! ¡Rü nataga ñoma wüxi ya cornétarüxü̃! ¡Rü yangagü i ngẽma Acóbuarü duü̃xü̃gü i Iraétanüxü̃ nagagu i norü chixexü̃gü rü norü pecadugü!

Yeremía 19:3

¡Rü ñacurügü tá: “Pa Yudáanearü Ãẽ̱xgacügüx rü Pa Yerucharéü̃cüã̱xgüx, ¡rü iperüxĩnüe ya yimá Iraétanüxü̃arü Tupana ya Guxãétüwa Ngẽxmacüarü ore i ñaxü̃! Rü ñaa naanewa tá chanamu i wüxi i taxü̃ i guxchaxü̃. Rü guxãtáma ya yíxema nüxü̃ ĩnüchigaxe rü tá taba̱i̱xãchie.

Yeremía 2:2

—¡Ngéma naxũ rü namaxã idexa i ngẽma Yerucharéü̃cüã̱x i duü̃xü̃gü! ¡Rü nataga nax mea nüxü̃ naxĩnüexü̃ca̱x i ñaa chorü ore i ñaxü̃! “Choma ya Tupana rü nüxna chacua̱xãchi rü yexguma noxri choxü̃ pecua̱xgügu rü mea chauga pexĩnüe. Rü yexguma noxri chorü duü̃xü̃gü pexü̃ chixĩxẽẽgu, rü choxü̃ pengechaü̃gü ñoma wüxi i nge i ngexwaca ãtecü rü ngĩtexü̃ ngechaü̃cürüxü̃. Rü yema choxü̃ nax pengechaü̃xü̃gagu rü chowe perüxĩ ga ínachianexü̃wa ga taxuxü̃ma i nanetü írüxüxü̃wa.

Yeremía 3:1

Cori ya Tupana rü ñanagürü: —Rü ngẽxguma wüxi i yatü rü naxma̱xü̃ ínata̱xgu, rü ngẽxguma marü nüxna tixũgachigu i tüma rü to i yatümaxã taxãtegu, rü nüma i ngẽma tüxü̃ ítáxü̃ rü marü taxũtáma wena tümamaxã naxãxma̱x. Rü ngẽma rü wüxi i taxü̃ i chixexü̃ tá nixĩ naxca̱x i ngẽma nachixü̃ane. Natürü i pemax, Pa Yudátanüxü̃x, rü mucü ga tupananetachicüna̱xãgüwe perüxĩ. ¿Rü ñuxãcü nagu perüxĩnüe nax cha̱u̱xca̱x pewoeguxü̃? Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

Yeremía 3:13

Pa Iraéanecüã̱xgüx, ¡nüxü̃ pixu i perü chixexü̃ i chope̱xewa pexüxü̃ nax chomaxã penuexü̃, rü guxü̃ma i nai i meetaxü̃tüü̃wa tupananetagüxü̃ picua̱xüü̃güxü̃ rü tama chauga pexĩnüexü̃! Rü choma ya Cori ya Tupana nixĩ i nüxü̃ chixuxü̃ i ngẽma chorü ore’ ” —ñanagürü.

Yeremía 3:18

Rü ngẽxguma tá nawa nanguxgu i ngẽma ngunexü̃, rü Yudáanecüã̱xgü rü Iraéanecüã̱xgü rü nügümaxã wüxiwa tá nangẽxmagügu. Rü wüxigu tá nüxna nawoegu i ngẽma nachixü̃ane i nórtewa ngẽxmaxü̃. Rü ngẽma naane ga nũxcümaü̃güxü̃ ga perü o̱xigüna chaxãxü̃wa tá naxĩ.

Echequié 16:20

Rü cunadai ga yema cunegü rü cuxacügü ga chomaxã cuxü̃́ yexmaxü̃, rü yema tupananetachicüna̱xãgüca̱x ícunagu nax namaxã naxãwemügüxü̃ca̱x. Rü tama cuxü̃́ ningu nax wüxi ga ngexü̃ ga naxü̃nemaxã taxexü̃wa nax cunguxü̃. Rü yemaca̱x naétü cunadai rü ícunagu ga chauxacügü naxca̱x ga yema tupananetachicüna̱xãgü.

Echequié 16:25

Rü guxü̃ma ga curü namagüarü gu̱xwa rü cunaxü ga nachicagü ga tupananetachicüna̱xãgüxü̃ nawa yacua̱xüü̃güxü̃. Rü yema nax cumexẽchixü̃gagu cunaxüecha ga curü ngúchaü̃ ga ãũãchixü̃, rü namaxã cumaxü̃ ga guxü̃ma ga duü̃xü̃gü ga yéma chopetüxü̃.

Echequié 20:4

Rü narümemae, Pa Yatüx, nax cumatama nüxna cucaxü̃ rü namaxã nüxü̃ quixuxü̃ ga yema chixexü̃gü ga ãũãchixü̃ ga nanatügü rü norü o̱xigü ügüxü̃.

Echequié 23:43

Rü yexguma ga choma rü ñaxü̃gu charüxĩnü: —Ngẽma yatügü rü tá ngĩmaxã namaxẽ i ngẽma nge i ngeãẽgücü. Natürü i ngĩmagü rü marü taxuwama ime erü ngĩgü ixãgümare.

Echequié 23:45

Natürü wüxi i ngunexü̃gu rü ngẽma yatügü i mea maxẽxü̃ rü tá ngĩxü̃ napoxcue namaxã i ngẽma poxcu i ngexü̃gü i natena ngeãẽgüxü̃ rü máetagüxü̃ namaxã napoxcuxü̃. Erü aixcüma ngĩtena ingẽãẽgü rü imáetagü —ñaxü̃gu charüxĩnü.

Ochéa 1:2

Rü ñaa nixĩ ga yema nüxíraxü̃xü̃ ga ore ga Cori ya Tupana Ochéamaxã nüxü̃ ixuxü̃. Rü ñanagürü nüxü̃: —Ngẽma Iraéanecüã̱x rü ñoma wüxi i ngexü̃ i natena ngeãẽxü̃rüxü̃ choxna nixĩgachi. Rü cumax, Pa Ochéax, rü wüxi i cua̱xruxü̃ tá quixĩ naxca̱x i ngẽma duü̃xü̃gü. ¡Rü ngẽmaca̱x i ñu̱xma rü wüxi i nge i naxü̃nemaxã taxexü̃maxã naxãxma̱x rü ngĩwa naxãxacü! Rü ngẽmaãcü i ngẽma cuxacügü rü wüxi i nge i ngeãẽcüxacügü tá nixĩgü —ñanagürü.

Ochéa 2:1

Rü ngẽma ngunexü̃ i nagu nawoeguxü̃ rü pema rü ngẽma peenexẽgüxü̃ tá ñaperügügü: —Marü ínangugü i taenexẽgü i Tupanaarü duü̃xü̃gü —ñaperügügü tá. Rü ngẽma peeya̱xgüxü̃ rü tá ñaperügügü: —Marü ínangugü i taeya̱xgü i ngechaü̃tümüxü̃güxü̃ —ñaperügügü tá.

Ochéa 2:5

Rü pechixü̃ane rü ñoma wüxi i nge i ngeãẽcürüxü̃ taxuwama name. Rü ngĩma rü ngĩgürügü: “Paxa tá naxca̱x chadau i ngẽma chomaxã maxẽxü̃, erü ngẽmagü nixĩ i choxna naxãgüxü̃ i paũ rü dexá rü chauxchiru i carnéruta̱xanaxca̱x rü línuchinaxca̱x rü chíxü̃ rü axexü̃”, ngĩgürügü.

Ochéa 4:5

Rü cuma rü ngunecü tátama nagu cungu i ngẽma guxchaxü̃. Rü nüma ya yima orearü uruü̃neta rü chütacü cuxrüxü̃tátama nagu nangu. Rü choma rü tá chanadai i curü duü̃xü̃gü.

Miquéa 2:13

Rü chomatama ya Cori ya Tupana ya Iraétanüxü̃arü Ãẽ̱xgacü rü nape̱xegu tá chixũ, rü tá naxca̱x chayaxümachigü nax nüxü̃́ natauxchaxü̃ca̱x nax norü uanügüarü ĩanearü ĩã̱xwa ínachoxü̃xü̃ —ñanagürü ya Cori ya Tupana.

2 Corintios 5:16

Rü ngẽmaca̱x i toma rü tama ñoma i naanecüã̱x i duü̃xü̃gü nagu rüxĩnüexü̃ãcü nixĩ i nagu tarüxĩnüexü̃. Rü woo ga ü̃pa rü duü̃xü̃gü nagu rüxĩnüexü̃ãcü chixri Cristumaxã nagu tarüxĩnüe, natürü i ñu̱xma rü tama ngẽmaãcü namaxã nagu tarüxĩnüe.