Ochéa 10:8 - Tupanaarü Ore

⁸ Rü tá nagu napogüe i napatagü i ngẽma tupananetagü ga Iraéanecüã̱xgü chixexü̃ nawa ügüxü̃. Rü ngẽma norü ãmarearü guruü̃güétüwa tá narüxügü i chuxchuxü̃gü rü toragü. Rü nüma i ngẽma duü̃xü̃gü rü tá ngẽma ngüchitaerugüxü̃ ñanagürügü: “¡Toétüwa pebuemügü!” ñanagürügü. Rü yima ma̱xpǘnegüxü̃ tá ñanagürügü: “¡Toétügu peyi!” ñanagürügü —ñanagürü ga Ochéa.

Ochéa 10:8 Iomraidhean Croise

Naanearü ügüchiga 3:8

Rü yáuanecü ga yexguma yabuuchigu ga buanecü, rü gumá yatü rü yema nge rü Tupanaxü̃ naxĩnüe nax yema naanegu yaxũgüchigüxü̃. Rü nibuxmü rü naxcha̱xwa nanetünecügu nicu̱xgü.

Nüxíraxü̃xü̃ ga popera ga ãẽ̱xgacügüchiga 13:2

Rü Cori ya Tupana namuxü̃ãcüma tagaãcü yema ãmaregüarü guruü̃chiga nidexa rü ñanagürü: —Pa Ãmaregüarü Guruxü̃x, Pa Ãmaregüarü Guruxü̃x, rü Cori ya Tupana rü ñanagürü: “Dabítanüxü̃wa tá nabu i wüxi i õxchana rü Yochía tá nixĩ i naéga. Rü nüma tá nixĩ i cuwa ínaguaxü̃ i ngẽma tupananetachicüna̱xãgüarü chacherdótegü i ñu̱xma cuwa pumarate̱xe ígugüxü̃. Rü ngẽmaãcü duü̃xü̃güchina̱xã tá cuétüwa ínagu” —ñanagürü.

Nüxíraxü̃xü̃ ga popera ga ãẽ̱xgacügüchiga 13:34

Rü yema Yeruboáü̃ üxü̃gagu nixĩ ga chixexü̃gu nayixü̃ ga nataagü rü yanaxoxü̃ ga guxü̃ma.

Nüxíraxü̃xü̃ ga popera ga ãẽ̱xgacügüchiga 14:16

Rü nüma ya Cori ya Tupana rü to i nachixü̃aneme̱xẽgu tá nananguxẽxẽ i Iraéane nagagu ga yema pecadugü ga Yeruboáü̃ üxü̃ rü yema pecadugü ga Iraétanüxü̃xü̃ naxüxẽẽxü̃ —ñanagürü.

Norü taxre ga popera ga ãẽ̱xgacügüchiga 23:15

Rü ñu̱xũchi Betéwa naxũ rü yexgumarüxü̃ ta nagu napogü ga yema tupananetaarü ãmarearü guruxü̃ rü guma ngutaque̱xepataxü̃ ga Nabáx nane ga Yeruboáü̃ üxü̃ne rü yemamaxã Iraéanecüã̱xgüxü̃ chixexü̃gu nayixẽẽxü̃. Rü nüma ga Yochía rü nagu napogü ñu̱xmata naxãte̱xemare rü ñu̱xũchi nayagu. Rü yexgumarüxü̃ ta nayagu ga yema Acheráchicüna̱xã ga yéma yexmaxü̃.

Norü taxre ga to ga popera ga ãẽ̱xgacügüchiga ümatüxü̃ 31:1

Rü yexguma marü nagu̱xgu ga guxü̃ma ga yema peta, rü guxü̃ma ga yema Iraétanüxü̃ ga yéma yexmagüxü̃, rü Yudáanearü ĩanegüwa naxĩ. Rü nagu nayapogüe ga gumá nutagü ga duü̃xü̃gü namaxã tupanaã̱xgücü, rü nagu napogüe ga yema Acheráchicüna̱xãgü, rü ñu̱xũchi nagu napogüe ta ga yema tupananetagüarü ãmarearü guruü̃gü ga ma̱xpǘnegüwa yexmagüxü̃. Rü yemaacü nanaxügü rü ñu̱xmata nagu̱xẽẽgüã ga guxü̃ma ga yema nüxü̃ yacua̱xüü̃güxü̃ ga Yudáanewa rü Bẽyamíü̃anewa yexmagüxü̃, rü ñu̱xũchi Efraíü̃anewa rü Manachéanewa yexmagüxü̃. Rü yemawena ga guxü̃ma ga yema Iraéanecüã̱xgü rü wüxichigü norü ĩanegüca̱x nawoegu.

Ichaía 2:19

Rü ngẽxguma Cori ya Tupana inaxügügu nax yaxĩã̱xcüüxẽẽãxü̃ i ñoma i naane, rü ngẽma duü̃xü̃gü i chixexü̃ ügüxü̃ rü norü muü̃maxã tá nutaarü ãxmaxü̃gu rü waixü̃müarü ãxmaxü̃gu nicu̱xgü na̱xcha̱xwa ya Cori ya Tupana ya üünecü rü poraãcü ãũcümacü.

Ichaía 2:21

Rü ngẽxguma Cori ya Tupana inaxügügu nax yaxĩã̱xcüüxẽẽãxü̃ i ñoma i naane, rü ngẽma duü̃xü̃gü i chixexü̃ ügüxü̃ rü norü muü̃maxã tá nutaarü ãxmaxü̃gu rü nutamachate̱xegu nicu̱xgü naxcha̱xwa ya Cori ya Tupana ya üünecü rü poraãcü ãũcümacü.

Ichaía 32:13

Rü chauchixü̃anearü naanegüwa rü tá narüxügü i tuxugü rü chixexü̃ i maxẽgü. Rü yima ĩane ga noxri taãxẽ nawa yexmanewa rü guxü̃nema ya ĩpatagü ga noxri taãxẽ nawa yexmanewa rü tuxugü rü maxẽgü i chixexü̃ tá nawa narüxügü.

Ichaía 34:13

Rü yima ãẽ̱xgacüpatagüwa rü chuchuxü̃gü tá nawa narüxügü. Rü yima churaragüpataü̃güwa rü chixexü̃ i natüanegü rü tuxugü tá nawa narüxügü. Rü wüxi i nachica i airugü i naixnecücüã̱x rü abetrú nawa maxẽxü̃ tá nixĩ.

Ochéa 10:2

Ngẽma Iraéanecüã̱xgü rü namuarü ĩnüã̱xgü, rü tama Tupanaguxica narüxĩnüe. Rü ngẽmaca̱x i ñu̱xma rü ngẽma norü chixexü̃gagu rü tá napoxcue. Rü nüma ya Cori ya Tupana rü tá inanaxoxẽxẽ i ngẽma ãmarearü guruü̃gü i norü tupananetagüca̱x naxügüxü̃. Rü tá nayapuexẽxẽ i ngẽma nutagü i nüxü̃ yacua̱xüü̃güxü̃.

Ochéa 10:5

Rü ñu̱xma i ngẽma Chamáriaanecüã̱x i duü̃xü̃gü rü nidu̱xrue, rü naxauxe naxca̱x i ngẽma wocaxacüchicüna̱xã i Bex-abéü̃wa rütaxuxü̃. Rü naxca̱x nangechaü̃gü i duü̃xü̃gü rü ngẽma chacherdótegü erü marü narütaxu ga yema namaxã nataãẽgüxü̃.

Ochéa 10:9

Rü Tupana rü ñanagürü: —Pa Iraétanüxü̃x, pema rü tama nüxü̃ perüxoe nax chixexü̃ pexügüxü̃. Rü yexguma Guibeáwa penaxügügumama nixĩ nax pecadu pexügüechaxü̃, rü ñu̱xma rü ta rü tama nüxü̃ perüxoeéga. Rü ngẽmagagu rü Guibeágu tá daigu nayue i ngẽma chixexü̃gu maxẽxü̃.

Ochéa 2:6

Rü ngẽmaca̱x i choma rü tá tuxugümaxã chanapota i ngĩrü nama rü tá ngĩxü̃ íchapoxexü̃ nax tama nüxü̃ yangauxü̃ca̱x i ngẽma nama i nagu yaxũxü̃.

Ochéa 4:13

Rü ma̱xpǘnegüwa rü ngẽma naigü i taxü̃arü gáuxchipetawa norü tupananetagüca̱x ínanagugü i pumarate̱xegü rü norü ãmaregü. Rü ngẽmaca̱x pexacügü rü peneã̱xgü rü ngeãẽgüxü̃ nixĩgü.

Ochéa 4:15

Pa Iraéanecüã̱xgüx, pema rü woo nüxü̃ picua̱xüü̃güamagu i ngẽma tupananetagü, natürü tama chanaxwa̱xe nax ngẽma Yudáanecüã̱xgü rü ta nagu naxĩxü̃ i ngẽma nacümagü i chixexü̃. ¡Rü taxṹ i nüxü̃ picua̱xüü̃güxü̃ i ngẽma naxchicüna̱xãgü i Guirigáwa rü Bex-abéü̃wa ngẽxmagüxü̃! ¡Rü taxṹ i chauégagu ipexunetaxü̃!

Ochéa 5:8

¡Rü Guibeáwa peyacue ya cornéta, rü Ramáwa rü ta peyacue nax nangutaque̱xegüxü̃ca̱x i duü̃xü̃gü! ¡Rü Bex-abéü̃wa rü tagaãcü duü̃xü̃gümaxã nüxü̃ pixu nax nügü namexẽẽgüxü̃ca̱x nax daiwa naxĩxü̃ca̱x! ¡Rü Bẽyamíü̃tanüxü̃maxã nüxü̃ pixu nax nügü namexẽxẽgüxü̃ca̱x!

Ochéa 8:5

Pa Chamáriacüã̱xgüx, ¡marütama nax pecadu pexüexü̃! Choma rü pemaxã chanu erü nüxü̃ picua̱xüü̃gü i ngẽma wocaxacüchicüna̱xã i Chamáriawa ngẽxmaxü̃. ¿Rü ñuxguratáta chope̱xewa pegü pimexẽẽgüxü̃?

Ochéa 9:6

Rü ngẽxguma naxcha̱xwa pibuxmügu i ngẽma poxcu rü ngẽma Equítuanecüã̱xgü rü tá pexü̃ ínayauxü̃, rü norü ĩane ya Ménfigu tá pexü̃ nata̱xgü. Rü ngẽma perü meruü̃gü i diẽrumünaxca̱x rü yima pepatachicawa rü naxcu rü chuchuxü̃ tá narüxügü.

Amúx 1:5

Rü tá chayaponaama i Damácuarü poxeguxü̃arü ĩã̱x. Rü tá chayama̱x i norü ãẽ̱xgacü i Bicax-abéü̃wa ãẽ̱xgacü ixĩxü̃. Rü ngẽxgumarüxü̃ tá ta chayama̱x i norü ãẽ̱xgacü i Bex-edéü̃wa ãẽ̱xgacü ixĩxü̃. Rü norü uanügü rü tá Quíruwa nanagagü i ngẽma Chíriacüã̱xgü —ñanagürü ya Cori ya Tupana.

Amúx 7:9

Rü ngẽma ãmarearü guruü̃gü i nawa Iraétanüxü̃ norü tupananetagüca̱x ãmaregü igugüxü̃ rü tá chayanaxoxẽxẽ. Rü yima Iraétanüxü̃arü tupananetagüpataxü̃gü rü nagu tá chipogügü. Rü taramaxã tá chanadai i ngẽma Yeruboáü̃tanüxü̃ —ñanagürü ga Cori ya Tupana.

Amúx 8:14

Rü ngẽma duü̃xü̃gü i Chamáriaarü tupananetagüaxü̃́ yaxõgüxü̃, rü tá inayayitanü rü tagutáma ínarüdagü. Rü ngẽxgumarüxü̃ tá ta namaxã nangupetü i ngẽma Dáü̃tanüxü̃ i norü tupananetagüaxü̃́ yaxõgüxü̃ rü ngẽma Bechébacüã̱xgü i norü tupananetagüaxü̃́ yaxõgüxü̃” —ñanagürü.

Miquéa 1:13

Pa Láquicüã̱xgüx, pema rü Iraétanüxü̃rüxü̃ tama Tupanaga pexĩnüexü̃. Rü pema nixĩ ga chixexü̃gu penayixẽẽxü̃ ga yema Chióü̃cüã̱xgü. ¡Ẽcü perü carugüwa penangacu i cowarugü nax paxa pibuxmüxü̃ca̱x!

Miquéa 1:5

¿Rü tü̱xcüü̃ pexü̃ nixugü? Rü pexü̃ nixugü erü nüma nüxü̃ nacua̱x i ngẽma chixexü̃ i pexüxü̃ rü tama naga nax pexĩnüexü̃ i pema i Acóbutaagü i Iraéanecüã̱x i Chamáriaarü ĩanewa ngẽxmagüxe. Rü ngẽxgumarüxü̃ ta nüxü̃ nacua̱x nax pema i Yudáanecüãx rü Yerucharéü̃wa tupananetachicüna̱xãgüxü̃ picua̱xüü̃güxü̃.

Naúü̃ 3:11

Rü cumax, Pa Nínibex, rü curü uanügü rü tá curü duü̃xü̃güxü̃ nanaxĩ̱xãchiãẽxẽẽgü rü ñoma duü̃xü̃gü i ngãxẽxü̃rüxü̃ tá nixĩgü. Rü tá naxca̱x nadau nax ngexta yacu̱xgüxü̃ na̱xcha̱xwa i norü uanügü.

Ore i mexü̃ ga Luca ümatüxü̃ 23:30

Rü ngẽxguma ínangugügu i ngẽma ngunexü̃gü rü duü̃xü̃gü rü tá ma̱xpǘnegüxü̃ naca̱a̱xü̃gü rü ñanagürügü tá: “¡Toétügu rübuemü!” ñanagürügü tá. Rü tá ngüchitaerugüxü̃xü̃ naca̱a̱xü̃gü, rü ñanagürügü tá: “¡Toxü̃ idüxétügü!” ñanagürügü tá.

Wenaxarü naxümatü ga Tupanaarü mugü 9:21

Rü yemawena rü chanayaxu ga yema wocaxacüchicüna̱xã ga pema pexüxü̃ rü namaxã chixexü̃ pexügüxü̃ rü üxüétüwa chayata̱xcuchi. Rü yemawena rü chanawaxi ñu̱xmata naxãte̱xemare rü ñu̱xũchi yema dexá ga ma̱xpǘnewa rüyaexü̃wa chayagüete̱xe.

Yema Cuáü̃ nüxü̃ dauxü̃ i yixcüra tá ngupetüxü̃chiga 6:16

Rü guxü̃ma ga nümagü, rü guma ma̱xpǘnexü̃ rü gumá nutagüxü̃ ñanagürügü: “¡Toétügu peyi nax toxü̃ ipicu̱xgüxü̃ca̱x naxcha̱xwa ya yimá tochicaxü̃wa rütocü, rü na̱xcha̱xwa ya yimá Carnéruxacü nax tama norü numaxã toxü̃ napoxcuexü̃ ya yimá Carnéruxacü!

Yema Cuáü̃ nüxü̃ dauxü̃ i yixcüra tá ngupetüxü̃chiga 9:6

Rü ngẽma ngunexü̃gügu rü duü̃xü̃gü tá naxca̱x nadaugü nax nayuexü̃, natürü taxũtáma nayue. Rü woo nanaxwa̱xegüxüchi nax nayuexü̃, natürü taxucürüwatama nayue.