Neemía 9:1 - Tupanaarü Ore

^1-2 Rü gumatama tauemacüarü 24 ga ngunexü̃gu rü nüma ga Iraétanüxü̃ rü nangutaque̱xegü nax aureãcüma nayumüxẽgüxü̃ca̱x. Rü nüxna nixĩgachi ga yema duü̃xü̃gü ga tama Iraétanüxü̃ ixĩgüxü̃. Rü témüxü̃ ga naxchirugu nicu̱xgü rü waixü̃müte̱xe nügüeru nagünagügü. Rü yexma nachigüãcüma Tupanamaxã nüxü̃ nixugüe ga noxrütama chixexü̃gü rü nüxna nacua̱xãchie ga norü o̱xigüarü chixexü̃gü rü ta.

Neemía 9:1 Iomraidhean Croise

2 Chamué 1:2

Natürü norü tomaepü̱x ga ngunexü̃gu, rü yéma Dabíxü̃tawa nangu ga wüxi ga yatü ga Chaú rü norü churaragümaxã íyexmaxü̃wa ne ũxü̃. Rü norü ngechaü̃maxã nügüchirugu nagáugü rü waixü̃mümaxã nügü nabuxeru, rü yemaacü ínangu. Rü yexguma Dabípe̱xewa nanguxgu rü ñaxtüanegu nanangücuchi.

Norü taxre ga to ga popera ga ãẽ̱xgacügüchiga ümatüxü̃ 20:3

Rü yexguma nüma ga Yochapáx rü poraãcü namuü̃, rü yemaca̱x Tupanaarü ngü̃xẽẽca̱x ínaca. Rü nanaxunagü nax nayumüxẽgüxü̃ca̱x rü tama nachibüexü̃ca̱x ga duü̃xü̃gü ga guxü̃ma ga Yudáarü naanewa.

Norü taxre ga to ga popera ga ãẽ̱xgacügüchiga ümatüxü̃ 7:10

Rü gumá taunecüarü 7 ga tauemacüarü 23 gu nixĩ ga ãẽ̱xgacü ga duü̃xü̃güxü̃ namoxẽxü̃ nax napataca̱x nawoeguxü̃ca̱x. Rü yemaacü taãẽãcü nawoegu. Rü Tupanaxü̃ nicua̱xüü̃gü naxca̱x ga yema mexü̃gü ga Dabíca̱x, rü Charomóü̃ca̱x rü yema norü duü̃xü̃gü ga Iraétanüxü̃ca̱x naxüxü̃.

Édra 8:21

Rü yemawena rü chanaxunagü nax aureãcü tayumüxẽgüxü̃ natü ga Aabácutüwa nax Tupanamaxã nüxü̃ tixugüxü̃ca̱x ga torü chixexü̃gü, rü Tupanana naxca̱x taca̱xaxü̃ca̱x nax mea toxü̃ naxüpetüxü̃ca̱x i namawa, rü toxna rü toxocügüna nadauxü̃ca̱x wüxigu namaxã i guxü̃ma i torü ngẽmaxü̃gü i namaxã itaxĩxü̃.

Édra 8:23

Rü yemaca̱x aureãcüma tayumüxẽgü rü Tupanana tacagüe nax toxna nadauxü̃ca̱x. Rü nüma rü aixcüma toxü̃ nangãxü̃.

Neemía 8:2

Rü nüma ga chacherdóte ga Édra rü yéma nanange ga yema Tupanaarü mugüpane nape̱xewa ga yema duü̃xü̃gü ga yexma ngutaque̱xegüxü̃ ga yatüxü̃ rü ngexü̃ rü ngextü̱xücügü rü pacügü.

Ester 4:16

—¡Ẽcü ngéma naxũ rü nangutaque̱xexẽxẽ i guxü̃ma i Yudíugü i Chúchawa ngẽxmagüxü̃ nax cha̱u̱xca̱x aureãcü nayumüxẽgüxü̃ca̱x! ¡Rü tomaepü̱x i ngunexü̃ rü tomaepü̱x i chütaxü̃ rü taxuxü̃táma ta̱xacü nangõ̱xgü rüe̱xna ta̱xacü nixaxgü! Rü chomax, rü namaxã i chauxü̃taxü̃gü rü ngẽmaãcü tátama tanaxügü. Rü ngẽmawena rü tá ãẽ̱xgacüxü̃tawa íchayadau woo nachu̱xu nax texé ngéma ũmarexü̃ tama tümaca̱x nangemayane. Natürü tá ngéma chaxũama rü nüetama ega woo chayu̱xgu —ngĩgürügü.

Ester 4:3

Rü yexgumarüxü̃ ta ga wüxichigü ga ĩanewachigü ga ngextá íyanguchigüxü̃wa ga yema mu ga ãẽ̱xgacü üxü̃, rü ga Yudíugü rü poraãcü nanaxĩ̱xãchiãẽtanü. Rü poraãcü nangechaü̃gü rü tama nachibüe rü naxauxe. Rü muxü̃ma ga nümagü rü tanimacate̱xegu napegü rü naxchiru ga témüxü̃gu nicu̱xgü.

Yox 2:12

Rü yexguma yáxü̃gutama naxĩxgu rü Yoxü̃ nadaugü, rü yema poraãcü nax yada̱xawexü̃ rü tama aixcüma nüxü̃ nacua̱xgü. Rü yemaca̱x inanaxügüe ga aita nax naxüexü̃ rü naxauxexü̃. Rü yema taxü̃ ga ngechaü̃ nax yangegüxü̃gagu rü nügü narügáutechirugü rü mairaxü̃te̱xe nügüerugu nagünagügü.

Ichaía 22:12

Rü ngẽma ngunexü̃gu rü nüma ya Cori ya Tupana ya Guxãétüwa Ngẽxmacü rü pemaxã nüxü̃ nixu nax pexauxexü̃ rü témüxü̃ i naxchirugu picu̱xgüxü̃ rü pegü pidüerugüxü̃ nax ngẽmaãcü penawéxü̃ca̱x nax aixcüma tá naga pexĩnüexü̃.

Joel 2:12

Natürü nüma ya Cori ya Tupana rü ñanagürü: —Ñu̱xma rü chanaxwa̱xe nax guxü̃ma i perü ngúchaü̃maxã cha̱u̱xca̱x pewoeguxü̃. ¡Rü cha̱u̱xca̱x pexaureegü rü pegümaxã pengechaxü̃gü rü pexauxe! —ñanagürü.

Lebítanüxü̃arü puracüchiga 23:34

—¡Namaxã nüxü̃ ixu i ngẽma Iraétanüxü̃ i ñaa ore!: “Rü yimá norü 7 ya tauemacüarü 15 i ngunexü̃gu tá nixĩ i penaxüchigaxü̃ nax chauégagu penaxüxü̃ ya perü düxenügü ya naixatünaxca̱x. Rü ngẽma peta i cha̱u̱xca̱x pexüxü̃ rü 7 i ngunexü̃ tá natai.

Lebítanüxü̃arü puracüchiga 23:39

Rü yimá 7 ya tauemacüarü 15 i ngunexü̃gu ngẽxguma peyabuxgügu i penetügüarü o, rü 7 i ngunexü̃ tá nixĩ i Cori ya Tupanaca̱x pepetaegüxü̃. Rü ngẽma ngunexü̃ i nagu inaxügüxü̃ i ngẽma peta rü tá iperüngügü. Rü ngẽxgumarüxü̃ ta i norü 8 i ngunexü̃gu rü tá iperüngügü.

Yochué 7:6

Rü nüma ga Yochué rü yema Iraétanüxü̃arü ãẽ̱xgacügü rü norü ngechaü̃maxã nügüchirugu nagáugüe rü waixü̃müte̱xemaxã nügü nigügüeru. Rü ñu̱xmachi yema baú ga Tupanaarü mugüchixü̃pe̱xegu nanangücuchitanü ñu̱xmata nayáuane.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:3

Rü choma rü tá chanamu i taxre i chorü orearü uruü̃gü i témüxü̃maxã ixãxchiruxü̃ nax 1,260 i ngunexü̃ duü̃xü̃gümaxã nüxü̃ yaxugüxü̃ca̱x i chorü ore”, ñanagürü choxü̃.

Ãẽ̱xgacügü ga guxchaxü̃güarü mexẽxẽruü̃gü 20:26

Rü yemaca̱x ga Iraétanüxü̃ rü wenaxarü Betéca̱x nawoegu rü yéma nayaxauxe nape̱xewa ga Tupana. Rü yema ngunexü̃ rü tama nachibüeãcü yéma nayumüxẽgü ñu̱xmata nachüta. Rü yéma Tupanaca̱x ínanagugü ga naeü̃gü rü ãmaregü Tupanaarü ngüxmüxẽẽruxü̃.

1 Chamué 4:12

Natürü wüxi ga churara ga Bẽyamíü̃tanüxü̃ rü niña ga yema nügü ínadaixü̃wa, rü yematama ngunexü̃gu Chilówa nangu. Rü norü ngechaü̃maxã nügü nayarügáutechiru, rü nügü nabuxeru, rü yemaacü ínangu.

1 Chamué 7:6

Rü nüma ga Iraéanecüã̱xgü rü Mispágu nangutaque̱xegü. Rü yéma puchuwa dexá ta nayauxü̃gü, rü Cori ya Tupanape̱xegu nanabagü norü ãmareruxü̃. Rü yema ga ngunexü̃gu rü naxauree rü tama nachibüe. Rü guxü̃ma ga duü̃xü̃gü rü nüxü̃ nixugüe nax chixexü̃ naxügüxü̃ ga Tupanape̱xewa. Rü yéma Mispáwa nixĩ ga Chamué ga inaxügüãxü̃ ga Iraéanecüã̱xgümaxã inacuáxü̃.