Ore i mexü̃ ga Luca ümatüxü̃ 3:13 - Tupanaarü Ore

¹³ Rü Cuáü̃ rü ñanagürü nüxü̃: —Tama name i ãẽ̱xgacü pemaxã nüxü̃ ixuxü̃arü yexera penayauxgü i diẽru i duü̃xü̃güxü̃tawa —ñanagürü.

Ore i mexü̃ ga Luca ümatüxü̃ 3:13 Iomraidhean Croise

Ore i mexü̃ ga Luca ümatüxü̃ 19:8

Rü yexguma ga Chaquéu rü inachi rü ñanagürü Ngechuchuxü̃: —Dücax, Pa Corix, choma rü ngẽma ngearü diẽruã̱xgüxü̃na tá chanaxã i ngãxü̃gu i guxü̃ma i chorü ngẽmaxü̃gü. Rü ngẽxguma chi texé tüxü̃ chawomüxẽẽãcüma tüxü̃́ changíxgu, rü ãgümücüe̱xpü̱xcüna tá tüxü̃́ ngĩxü̃ chatáeguxẽxẽ i ngẽma tümaarü diẽru —ñanagürü.

Efesios 4:28

Rü ngẽxguma texé petanüwa ngĩ́ta̱a̱xgu, rü name nixĩ i nüxü̃ tarüxo i ngẽma. Rü name i tümame̱xẽmaxã mea tapuracü nax ngẽmaãcü tüxü̃́ nangẽxmaxü̃ca̱x i tümaarü diẽru nax toguxe ya tüxü̃́ nataxúxemaxã tangauxü̃ca̱x.

Miquéa 6:8

Rü nüma ya Cori ya Tupana rü marü cumaxã nüxü̃ nixu, Pa Duü̃xü̃x, i ta̱xacü nixĩ i nape̱xewa mexü̃ rü ta̱xacü nixĩ i ngẽma cuxü̃́ nanaxwa̱xexü̃. Rü ngẽma cuxü̃́ nanaxwa̱xexü̃ nixĩ nax mexü̃ cuxüxü̃ rü quixaixcümaxü̃ rü curü Tupanaga nax cuxĩnüxü̃ rü tama cugü quicua̱xüxü̃.

Ore i mexü̃ ga Matéu ümatüxü̃ 7:12

Rü pemaxã nüxü̃ chixu, rü ngẽma mexü̃ i pema penaxwa̱xexü̃ nax togü pemaxã naxüxü̃, rü name i ngẽmatama mexü̃ togümaxã pexü. Erü ngẽma nixĩ i Tupanaarü mugüwa ngóxü̃ rü norü orearü uruü̃gü nüxü̃ ixugüxü̃.

Popera ga Yudíugü ga yaxõgüxü̃ca̱x ümatüxü̃ 12:1

Rü yema muxü̃ma ga duü̃xü̃gü ga Tupanaaxü̃́ yaxõgüxü̃ ga yuexü̃, rü ñu̱xma torü ngaicamana nangẽxmagü nax tórü cua̱xruü̃gü yixĩgüxü̃ca̱x. Rü ngẽmaca̱x i ñu̱xmax, ¡rü ngĩxã nüxü̃ tarüxoe i guxü̃ma i ngẽma guxchaxü̃gü rü pecadugü i tüxü̃́ naguxchaxẽẽxü̃ nax mea yaxõgüxü̃! ¡Rü ngĩxã pora taxüe nax nawa ingugüxü̃ca̱x i ngẽma maxü̃ i tape̱xewaama ngẽxmaxü̃!

Ucu̱xẽgüchiga 28:13

Ngẽma duü̃xü̃ i norü pecadu icúxü̃ rü taxũtáma mexü̃ nüxü̃ naxüpetü. Natürü ngẽma duü̃xü̃ i nüxü̃ ixuxü̃ i norü pecadu rü nüxü̃ rüxoxü̃, rü Tupana rü tá nüxü̃́ nüxü̃ inayarüngüma.

Wiyaegü 18:23

Rü nape̱xewa rü taguma ta̱xacürü chixexü̃ chaxü rü chaugüna chadau nax tama pecadu chaxüxü̃ca̱x.

Ore i mexü̃ ga Luca ümatüxü̃ 3:12

Rü Cuáü̃xü̃tawa naxĩ ta ga ñuxre ga yatügü ga Rómaarü ãẽ̱xgacüca̱x diẽru ngĩxü̃ ideetanüxü̃. Rü nanaxwa̱xegü ga Cuáü̃ nax ínabaiü̃xẽẽxü̃. Rü Cuáü̃na nacagü, rü ñanagürügü: —Pa Ngúexẽxẽruxü̃, ¿Ta̱xacü nixĩ i mexü̃ nax tanaxüxü̃ i tomax? —ñanagürügü.

Ore i mexü̃ ga Luca ümatüxü̃ 3:14

Rü ñuxre ga churaragü rü ta Cuáü̃na nacagüe, rü ñanagürügü: —¿Toma rü ta̱xacü nixĩ i mexü̃ nax tanaxüxü̃? —ñanagürügü. Rü nanangãxü̃ ga Cuáü̃ rü ñanagürü: —Tama name i texéxü̃ pexãxũneãcüma tümaarü ngẽmaxü̃gü pepuxü̃. Rü tama name i ta̱xacürü doraxü̃ tümachigaxü̃ pixu. Rü name nixĩ i ngẽma diẽru i ãẽ̱xgacü pexü̃́ ngĩmaxã naxütanücümaxã petaãẽgü rü tama yexeracüca̱x ípeca —ñanagürü.