Lebítanüxü̃arü puracüchiga 23:3 - Tupanaarü Ore

³ Rü 6 i ngunexü̃ tá nixĩ i pepuracüexü̃, natürü ngẽxguma norü 7 i ngunexü̃wa nanguxgu rü taxuxü̃táma i puracü pexü. Rü ngẽma ngunexü̃ rü ngü̃chigaarü ngunexü̃ nixĩ rü nagu tá cha̱u̱xca̱x pengutaque̱xegü. Rü ngextá ípexãpatagüxü̃wa rü ngẽma ngunexü̃ rü tá nagu perüngü̃gü rü choxü̃ picua̱xüü̃gü.

Lebítanüxü̃arü puracüchiga 23:3 Iomraidhean Croise

Ínachoxü̃xü̃chiga 16:23

Rü nüma ga Moiché rü namaxã nüxü̃ nixu rü ñanagürü: —Ngẽma nixĩ i Cori ya Tupana tamaxã nüxü̃ ixuxü̃. Erü moxü̃arü ngunexü̃ rü ngü̃chigaarü ngunexü̃ nixĩ rü ngẽmaca̱x tá Cori ya Tupanaca̱x itarüngügü. Rü ngẽmaca̱x name nixĩ i ñu̱xma penaxü i ngẽma pewemü i pexüxchaü̃xü̃ rü penamuxra i ngẽma perü õna i pemuxrachaü̃xü̃, rü namaxã penguxü̃gü i guxü̃ma i ngẽma pexü̃́ íyaxüxü̃ perü moxü̃ãcüruxü̃ —ñanagürü.

Ínachoxü̃xü̃chiga 16:29

Dücax, choma i Cori ya Tupana rü marü pexca̱x nüxü̃ chaxuneta i wüxi i ngunexü̃ nax nagu perüngü̃ẽxü̃ca̱x. Rü ngẽmaca̱x nixĩ i ngẽxguma norü 6 i ngunexü̃wa nanguxgu rü taxre i ngunexü̃ nagúxü̃ i õna pexna chaxãxü̃. Rü ngẽxguma norü 7 i ngunexü̃wa nanguxgu rü wüxíechigü tá tümapatawatama tangexma rü taxuwama taxũ —ñanagürü.

Ínachoxü̃xü̃chiga 16:30

Rü yemaca̱x ga yema duü̃xü̃gü rü norü 7 ga ngunexü̃gu narüngü̃e.

Ínachoxü̃xü̃chiga 23:12

Rü 6 i ngunexü̃ tá nixĩ i cunaxüxü̃ i curü puracü i cuxüxchaü̃xü̃. Natürü ngẽxguma norü 7 i ngunexü̃wa nanguxgu rü tá curüngü̃ nax ngẽmaãcü nangü̃ẽxü̃ca̱x i curü wocagü rü búrugü rü ngẽmaãcü naporaexü̃ca̱x i curü puracütanüxü̃ rü ngẽma to i nachixü̃anecüã̱x i duü̃xü̃ i cuxü̃tawa ngẽxmaxü̃.

Ínachoxü̃xü̃chiga 34:21

Rü 6 i ngunexü̃ tá nixĩ i pepuracüexü̃, natürü ngẽma norü 7 i ngunexü̃gu rü tá iperüngügü. Rü woo ngẽxguma nanetügüarü oarü buxchigawa nanguxgu rüe̱xna toechigawa nanguxgu rü tá perüngü̃gü.

Ichaía 56:2

Rü tataãxẽ ya yíxema naga ĩnüxe rü aixcüma yanguxẽẽ́xẽ i chorü mugü. Rü tataãxẽ ya yíxema rüngü̃xe i ngü̃xchigaarü ngunexü̃gu rü tügüna dauxe nax tama ta̱xacürü chixexü̃ taxüxü̃ca̱x —ñanagürü ya Tupana.

Ichaía 56:6

Rü ngẽma duü̃xü̃gü i to i nachixü̃anecüã̱xgü i choxü̃ icua̱xüü̃güxü̃ rü tama puracüeamaxü̃ ega ngü̃xchigaarü ngunexü̃wa nanguxgu rü aixcüma yanguxẽẽgüxü̃ i chorü uneta rü choma rü tá chorü ma̱xpǘne ya üünene ya Chióü̃wa chanagagü. Rü chorü yumüxẽpataxü̃wa tá chanataãẽxẽxẽ. Rü choma rü tá chanayaxu i norü ãmaregü i chorü ãmarearü guruü̃wa cha̱u̱xca̱x ínagugüxü̃, erü yima chopata rü Guxü̃ma i Duü̃xü̃güarü Yumüxẽpataxü̃ tá nixĩ i naéga.

Ichaía 58:13

Rü tama name i pepuracüe rü petaxegü i ngü̃xchigaarü ngunexü̃gu. Rü ngẽma chanaxwa̱xexü̃ nixĩ nax pexca̱x rü wüxi i ngunexü̃ i üünexü̃ nax yixĩxü̃ rü wüxi i ngunexü̃ i nagu petaãẽxü̃ nax yixĩxü̃. Rü ngẽma ngunexü̃ rü cha̱u̱xca̱xica tá ípenaxüxüchi. Rü ngẽxguma ngẽmaãcü penaxü̱xgu, rü tama ngẽma ngunexü̃gu pepuracüegu rü tama petaxegügu rü tama dexagü i taxuwama mexü̃maxã pidexagügu, rü ngẽxguma i choma i perü Tupana rü tá pexü̃ chataãẽxẽxẽ. Rü tá pexna chanaxã i ñaa naane ga perü o̱xi ga Acóbumaxã nüxü̃ chixuxü̃ rü tá pexü̃ charüngü̃xẽẽxü̃ nax ñaa nachixü̃anemaxã ipecu̱axgüxü̃ —ñanagürü ga Tupana. Rü Cori ya Tupanatama nixĩ i ngẽma ñaxü̃.

Lebítanüxü̃arü puracüchiga 19:3

Rü wüxíechigü i pema rü name i penatüxü̃ rü peéxü̃ pengechaü̃. Rü ñu̱xũchi name i mea penaxaure i chorü ngü̃chigaarü ngunexü̃. Erü choma nixĩ i perü Cori ya Tupana chixĩxü̃.

Ore i mexü̃ ga Luca ümatüxü̃ 13:14

Natürü yema ngutaque̱xepataü̃arü ãẽ̱xgacü rü nanu, yerü Ngechuchu rü ngü̃xchigaarü ngunexü̃gu ngĩxü̃ narümexẽxẽ ga yema nge. Rü yemaca̱x ga yema ãẽ̱xgacü rü ñanagürü duü̃xü̃güxü̃: —Nangexma i 6 i ngunexü̃ i nagu namexü̃ nax ipuracüexü̃. Rü ngẽma ngunexü̃gügu nixĩ i namexü̃ nax nua pexĩxü̃ nax pegü peyarümexẽẽgüxü̃ca̱x rü tama i ngü̃xchigaarü ngunexü̃gu —ñanagürü.

Ore i mexü̃ ga Luca ümatüxü̃ 23:56

Rü yexguma ngĩpatawa nangugügu, rü ínamexẽẽgü ga pumara rü chíxü̃. Rü irüngü̃gü ga ngü̃xchigaarü ngunexü̃gu, yerü yema nixĩ ga Tupanaarü mu.

Ngechuchuarü ngúexü̃gü ga yamugüxü̃arü puracüchiga 15:21

Yerü woetama nũxcümama wüxichigü ga ĩanewa nayexma ga duü̃xü̃ ga namaxã ngu̱xẽẽtaexü̃ ga yema Moichéarü mugü ga ngutaque̱xepataü̃güwa nadaumatüxü̃ ga wüxichigü ga ngü̃chigaarü ngunexü̃gu —ñanagürü ga Chantiágu.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:10

Rü wüxi ga yüxüarü ngunexü̃gu rü Tupanaãxẽ ya Üünecü chomaxã inacua̱x, rü chango̱xetü rü choweama nüxü̃ chaxĩnü ga wüxi ga naga ga tagaxü̃ ga ñoma cornétagarüxü̃ ixĩxü̃ ga ñaxü̃ choxü̃: “Chanaxwa̱xe nax wüxi i poperagu cunaxümatüxü̃ i ngẽma nüxü̃ cudauxü̃. Rü ñu̱xũchi chanaxwa̱xe i natanüwa cunamu i ngẽma 7 tücumü i yaxõgüxü̃ i Áchiaanearü ĩanegüwa ngẽxmagüxü̃. Rü yima ĩanegü nixĩ: Epéchiu, rü Echamíra, rü Pérgamu, rü Tiatíra, rü Chárdex, rü Filadélfia, rü Laodichéa”, ñaxü̃ choxü̃.