Lebítanüxü̃arü puracüchiga 23:1 - Tupanaarü Ore

¹ Rü nüma ga Cori ya Tupana rü Moichémaxã nidexa rü ñanagürü nüxü̃:

Lebítanüxü̃arü puracüchiga 23:1 Iomraidhean Croise

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 23:31

Rü yexgumarüxü̃ ta ga yema Lebítanüxü̃ rü nanaxwa̱xegü nax chacherdótegüxü̃ nangü̃xẽẽgüxü̃ ga yexguma Cori ya Tupanaca̱x naxü̃nagü ínagugügu ga ngü̃xchigaarü ngunexü̃gu, rü yexwaca̱xü̃cü ga tauemacü ngo̱xgu, rü to ga petagü ga Tupanaca̱x naxüchigagügu. Rü yemaacü guxü̃guma Tupanaca̱x napuracüe ga yema Lebítanüxü̃ yexguma nawa nanguxgu nax naxügüãxü̃ ga Tupanaarü puracü ga nüxna ügüxü̃.

Norü taxre ga to ga popera ga ãẽ̱xgacügüchiga ümatüxü̃ 2:4

Rü dücax, choma rü tá chanaxü ya wüxi ya chorü Cori ya Tupanapata ya taxü̃ne. Rü tá nüxna chanaxã ya yima napata nax nüma nawa nangẽxmaxü̃ca̱x rü ngéma naxca̱x ítanaguxü̃ca̱x i pumarate̱xegü, rü guxü̃guma nape̱xegu tananuxü̃ca̱x i paũ i üünexü̃, rü ngéma naxca̱x ítanaguxü̃ca̱x i torü ãmaregü i guxü̃ i ngunexü̃gu i pa̱xmama rü yáuanecü. Rü ngẽxgumarüxü̃ ta ngéma tá naxca̱x ítanagu i torü ãmaregü i ngẽxguma ngü̃xchigaarü ngunexü̃wa nanguxgu, rü ngẽxguma ngexwacaxü̃cü ya tauemacüarü petachigawa nanguxgu rü ngẽxguma nawa nanguxgu i toamachigü i peta ya Tupana naxwa̱xexü̃ i toma i Iraétanüxü̃ nax tanaxüchigaxü̃.

Norü taxre ga to ga popera ga ãẽ̱xgacügüchiga ümatüxü̃ 8:13

Rü yema ngunexü̃gü ga nagu yéma ínaguaxü̃ nixĩ ga yema ngunexü̃gü ga Moiché nüxü̃ unetaxü̃. Rü yema nixĩ ga ngü̃chigaarü ngunexü̃gu, rü tauemacü ya ngexwacaxü̃cügu, rü yema tomaepü̱x ga petagü ga wüxichigü ga taunecügu naxüchigagüxü̃gu. Rü yema nixĩ ga paũ i ngearü pu̱xẽẽruü̃ã́xü̃arü petachigagu, rü nanetüarü buxgüchigagu, rü düxenügüarü petachigagu.

Ichaía 1:13

Rü tama chanaxwa̱xe i ãmaregü i taxuwama mexü̃ cha̱u̱xca̱x nua pena, erü choma rü marü tama yáxna namaxã chaxĩnü i ngẽma naema i perü ãmaregü ípeguxü̃. Rü pemax rü duü̃xü̃güna pexu nax penaxüchigaxü̃ca̱x ya tauemacü ya ngexwaca ngócü rü ñu̱xũchi ngü̃xchigaarü ngunexü̃. Natürü choma rü tama namaxã chataãxẽ i duü̃xü̃gü i chixexü̃gu maxẽxü̃güarü petagü.

Echequié 44:24

Rü ngẽxguma duü̃xü̃gü nügümaxã nuegu rü ngẽma chacherdótegü tá nixĩ i chorü mugüwa nüxü̃ yaxuxü̃ãcü namexẽẽgüaxü̃́ i ngẽma guxchaxü̃gü. Rü nümagü rü tá nayanguxẽẽgü i chorü mugü rü chorü ucu̱xẽgü nachiga i chorü petagü. Rü mea tá nanaxaure i ngẽma chorü ngü̃xchigaarü ngunexü̃gü.

Echequié 45:17

Rü nüma i ãẽ̱xgacü tá nixĩ i naxãxü̃ i ngẽma naxü̃nagü nax cha̱u̱xca̱x nada̱i̱xü̃ca̱x rü ínaguxü̃ca̱x. Rü ngẽxgumarüxü̃ tá ta inanana i ngẽma ãmaregü i tríguarü o rü chebádaarü o rü bínu i ngẽxguma nango̱xgu ya ngexwacaxü̃cü ya tauemacü rü ngẽxguma ngü̃chigaarü ngunexü̃wa nanguxgu rü ngẽxguma nawa nanguxgu i guxü̃ma i ngẽma petagü ga Iraétanüxü̃wa nüxü̃ chaxunetaxü̃. Rü ngẽxgumarüxü̃ tá ta inanaxã i ngẽma ãmaregü i pecaduarü ütanüruxü̃ ixĩgüxü̃, rü ãmaregü i tríguarü o rü chebádaarü o rü ãmaregü i cha̱u̱xca̱x ínaguxü̃ rü ãmaregü nax choxü̃ nangüxmüxẽẽxü̃ca̱x rü nüxü̃́ nüxü̃ icharüngümaxü̃ca̱x i Iraétanüxü̃arü pecadugü —ñanagürü.

Echequié 46:11

Rü ngẽxguma wüxichigü i peta naxüchigagügu i duü̃xü̃gü rü wüxichigü i wocaxacü i yatüxü̃ca̱x tá inanaxãgü i 20 quíru i trigute̱xe. Rü ngẽxgumarüxü̃ ta wüxichigü i carnéruca̱x tá inanaxãgü i 20 quíru i trigute̱xe. Rü wüxichigü i carnéruxacüca̱x tá inanaxãgü i ngẽma norü ngúchaü̃maxã inaxãgüxü̃. Rü wüxichigü i 20 quíru i trigute̱xemaxã tá inanaxã i 3 litruarü ngãxü̃ i chíxü̃.

Lebítanüxü̃arü puracüchiga 22:33

Rü choma nixĩ ga Equítuanewa pexü̃ íchagaxü̃xü̃ nax perü Tupana chixĩxü̃ca̱x. Rü choma nixĩ ya Cori ya Tupana —ñanagürü.

Lebítanüxü̃arü puracüchiga 23:2

—¡Iraétanüxü̃maxã nüxü̃ ixu i ñaa ore!: “Rü ñaa nixĩ i ngunexü̃gü i choma ya Cori nüxü̃ chaxunetaxü̃ i nagu tá choxü̃ picua̱xüxü̃güxü̃. Rü ngẽma nixĩ i ngunexü̃gü i nagu tá duü̃xü̃güca̱x pengemaxü̃ nax cha̱u̱xca̱x nangutaque̱xegüxü̃ca̱x.

Lebítanüxü̃arü puracüchiga 23:44

Rü yemaacü nixĩ ga Iraétanüxü̃maxã nüxü̃ yaxuxü̃ ga Moiché nachiga ga yema ngunexü̃gü ga Cori ya Tupanaca̱x tá ínaxüxüchigüxü̃.

Gálatas 4:10

Rü dücax i pemax, rü ñu̱xma rü ta rü ngẽma nũxcümaü̃güxü̃ i Yudíugücümagu pexĩãma woo Cristuaxü̃́ nax peyaxõgüxü̃. Rü penaxaure i ñuxre i ngunexü̃gü rü ñuxre ya tauemacügü rü ñuxre ya taunecügü rü ñuxre i petagü, erü nagu perüxĩnüe nax ngẽmaãcü Tupanape̱xewa tá pimexü̃.

Colosenses 2:16

Rü ñu̱xma rü taxuca̱xma tü̱xcüü̃ pexü̃ nixugüe i ngẽma Yudíugü naxca̱x i ngẽma õna i pengõ̱xgüxü̃ rü ngẽma axexü̃ i pixaxgüxü̃. Rü taxuca̱xma tü̱xcüü̃ pexü̃ nixugüe nachiga i ngẽma petaarü ngunexü̃gü i nümagü nagu naxauregüxü̃, rü yimá tauemacügü ya ngexwacaxü̃cü i nagu naxauregüxü̃, rü ngẽma ngü̃xchigaarü ngunexü̃gü i nagu naxauregüxü̃.