Joel 2:21 - Tupanaarü Ore

²¹ Rü ngẽmaca̱x, Pa Duü̃xü̃gü rü Guxü̃ma i Ta̱xacü i Ñoma i Naanewa Maxẽxü̃x, ¡rü petaãẽgü rü taxṹ i pemuü̃exü̃! Erü nüma ya Cori ya Tupana rü taxü̃ i mexü̃gü tá pexca̱x nango̱xẽxẽ.

Joel 2:21 Iomraidhean Croise

Naanearü ügüchiga 15:1

Rü yemawena ga Abráü̃ rü Cori ya Tupana rü nanango̱xetüxẽxẽ rü namaxã nidexa rü ñanagürü nüxü̃: —¡Taxuca̱xma cumuü̃, Pa Abráü̃! Erü choma nixĩ i curü poxü̃ruxü̃. Rü ngẽma ngü̃xẽxẽ i tá cuxna chaxãxü̃ rü tá nataxüchi —ñanagürü.

Wiyaegü 71:19

Pa Tupanax, ngẽma curü porachiga rü curü mecümachiga rü guxü̃wama nangu ñu̱xmata daxũguxü̃ i naanewa. Rü cuma rü cunaxü i taxü̃gü i mexü̃gü. Rü tataxuma ya texé ya cumaxã wüxiguxe.

Wiyaegü 98:8

Rü guxü̃ma i natügü rü name nixĩ i Cori ya Tupanaca̱x naxãũgatanüxü̃ ñoma napéme̱xgüxü̃rüxü̃. Rü guxü̃nema ya ma̱xpǘnegü rü name nixĩ i Tupanape̱xewa nataãẽgü. Erü nüma rü nua naxũ nax ñoma i naanemaxã iyacuáxü̃ca̱x. Rü nüma rü aixcüma tá guxü̃ma i nachixü̃anecüã̱xmaxã meama inacua̱x.

Ichaía 35:1

Ngẽma chianexü̃ i pamarexü̃ i taxúema íxãpataxü̃wa rü wenatáxarü nawa nangẽxma i taãxẽ. Rü ngéma chianexü̃wa tá narüxügü i putüragü i líriugü rü guxü̃watáma nangẽxma i taãxẽ. Rü nüma ya Cori ya Tupana rü wenatáxarü nanamexẽxẽ i Iraéane i chianexü̃, rü ñoma Líbanuanerüxü̃ tá namexẽchi. Rü ñoma Carméruane i mexechixü̃rüxü̃ rü Charóü̃arü metachinüanerüxü̃ rü ngẽma Iraéanewa tá nabaxca i nanetügü. Rü guxãtáma nüxü̃ tadaugü i Cori ya Tupanaarü pora rü ñuxãcü nax namexẽchixü̃ i nümax.

Ichaía 41:10

¡Taxṹ i pemuü̃exü̃, Pa Iraétanüxü̃x! Erü choma rü chapexü̃tagu. ¡Rü taxṹ i pemuü̃exü̃! Erü choma rü perü Tupana chixĩ. Choma rü pora pexna chaxã rü pexü̃ charüngü̃xẽẽxü̃. Rü choma rü chorü tügünechacüxümaxã pexü̃ chingĩ rü pexü̃ íchapoxü̃.

Ichaía 44:23

¡Pa Daxũguxü̃ i Naanex, taãẽãcü Tupanaxü̃ icua̱xüxü̃ naxca̱x i guxü̃ma i ngẽma naxüxü̃! ¡Rü Pa Ñoma i Naanearü Doxonexü̃gü i Taxü̃x, nüxü̃ picua̱xüü̃güx! ¡Rü pemax Pa Ma̱xpǘnegüx rü Pa Naixnecügüx, rü taãẽãcü nüxü̃ picua̱xüü̃gü ya Tupana, yerü nüma nixĩ ga norü poramaxã ínanguxü̃xẽẽãxü̃ ga Iraétanüxü̃ ga Acóbuarü duü̃xü̃gü naxme̱xwa ga norü uanügü!

Ichaía 54:4

¡Rü taxṹ i pemuü̃exü̃! Erü taxũtáma ta̱xacü pemaxã nixugüe rü taxũtáma pexãnee. Rü yema guxchaxü̃gü ga ü̃pa pexü̃ ngupetüxü̃ rü tá nüxü̃ perüngümae rü taxũtáma nüxna pecua̱xãchie nax ñoma nge i yutecürüxü̃ nax pixĩgüxü̃. Erü nüma ya Tupana ya Guxü̃étüwa Ngẽxmacü ya pexü̃ ngóexẽẽcü rü tá pemaxã inacua̱x. Rü yima Iraétanüxü̃arü Tupana ya Üünecü nixĩ ya pexü̃ ínguxü̃xẽẽcü rü namaxã inacua̱x i guxü̃ma i ñoma i naanewa.

Ichaía 55:12

Rü pemax, Pa Iraétanüxü̃, rü tá taãẽãcü Babiróniaanewa ípechoxü̃, rü mea tá pechixü̃aneca̱x pewoegu. Rü ngẽxguma pexü̃ nadaugügu ya yima ma̱xpǘnegü rü taãẽãcü tá pexü̃ nayauxgü. Rü guxü̃ma i ngẽma naigü i naixnecüwa rüxügüxü̃ rü norü taãẽmaxã tá nixĩãxtanügü.

Yeremía 33:3

“¡Choxna naca rü tá cuxü̃ changãxü̃! Rü tá cuxü̃ nüxü̃ chacua̱xẽxẽ i ta̱xacü i taxü̃ i ẽxü̃guxü̃ i taguma nüxü̃ cucuáxü̃.

Ochéa 2:21

Rü choma ya perü Tupana nixĩ i nüxü̃ chixuxü̃ i ngẽma, Pa Iraéanecüã̱xgüx. Rü ngẽxguma nawa nanguxgu i ngẽma ngunexü̃ rü choma rü tá chanapuxẽxẽ nax ngẽmaãcü naxügüxü̃ca̱x i penetügü rü namuxü̃ca̱x i ngẽma trigugü rü bínugü rü chíxü̃gü. Rü ngẽmaãcü Yereéarü metachinüanexü̃wa wena táxarü mea nayae i nanetügü.

Joel 2:20

Rü tá pexna chayaxĩgachixẽxẽ i ngẽma munügü ga nórtewaama ne ĩxü̃, rü tá ngextá ínachianexü̃wa chanamugü. Rü ngẽma nape̱xegu ĩxü̃ rü nataxa i ngearü maxü̃ã́xü̃wa tá chanawoü̃. Rü ngẽma wixweama ügüxü̃ rü Már i Mediteráneuwa tá chanawoü̃. Rü ngẽxma tá niyixe rü tá ngéma nayixanegü. Rü ngẽmaãcü tá poraãcü pexü̃ charüngü̃xẽxẽxü̃ —ñanagürü ga Cori ya Tupana.

Joel 2:26

Rü ñu̱xma rü tá meatama pechibüe i pemax ñu̱xmatáta mea pexü̃́ yangu. Rü choxü̃ tá picua̱xüü̃gü naxca̱x ga yema taxü̃ ga mexü̃ ga pexca̱x chaxüxü̃. Rü tagutáma wena texé pexü̃ taxãneexẽxẽ Pa Chorü Duü̃xü̃güx.

Chacaría 8:15

Natürü i ñu̱xma rü aixcüma tá pexü̃ charüngü̃xẽxẽxü̃, Pa Yudáanecüã̱xgüx rü Pa Yerucharéü̃cüã̱xgüx. ¡Rü ngẽmaca̱x, taxṹ i pemuü̃exü̃!

Wenaxarü naxümatü ga Tupanaarü mugü 4:32

¡Naxca̱x pedau rü penangugü! Rü yexguma noxritama Tupana nango̱xẽẽgu ga duü̃xü̃ rü ñu̱xmata ñomaü̃cüü ¿rü tá ngextá nüxü̃ ipeyangau i to i natücumü i duü̃xü̃ i perüxü̃ Tupana nüxü̃ rüngü̃xẽẽxü̃? Rü woo guxü̃wama i ñoma i naanewa naxca̱x pedaugügu i ta̱xacü i duü̃xü̃güxü̃ ngupetüxü̃ rü taxũtáma nüxü̃ ipeyangau ga yema petanüwa ngupetüxü̃rüxü̃ ixĩxü̃.

1 Chamué 12:16

¡Rü taxṹ i pixĩgachixü̃! Rü tá nüxü̃ pedau i ngẽma taxü̃ i mexü̃ i Cori ya Tupana pepe̱xewa tá üxü̃ i ñu̱xmax.

1 Chamué 12:24

Rü ñu̱xma i pema rü penaxwa̱xe i Cori ya Tupanaaxü̃́ peyaxõgü rü aixcüma nüxü̃ picua̱xüü̃gü. ¡Rü nagu perüxĩnüe nax ñuxãcü poraãcü pexü̃ nax nangü̃xẽxẽxü̃!